1 Korinto 4
4
Apostolu Sira Nia Ministériu
1Tuir lo-loos, imi tenki haree ami nudar Kristu nia atan sira no nudar ema nebee tau matan ba Maromak nia mistériu. 2No ema nebee tau matan nee tenki fiel. 3Maibee ho hau, ida nee buat kiik-oan deit katak imi tesi lia ba hau ka ema nia tribunál ruma mak tesi lia ba hau. Tebes, hau mos la tesi lia ba hau nia aan rasik. 4Tanba hau la hatene kona ba sala ida iha hau nia aan. Maibee ida nee la dehan katak hau inosenti. Maibee Nai mak tesi lia ba hau. 5Nunee keta tesi lia molok tempu loos, molok Nai fila mai. Buat sira nebee subar iha nakukun laran Nia sei lori ba naroman. Nia sei hatudu sai ema nia planu iha fuan laran. Depois Maromak sei gaba ema ida-idak tuir ninia hahalok.
6Maun-alin sira, hau aplika buat hotu nee ba hau nia aan rasik no mos ba Apolo hodi foo benefísiu ba imi. Atu nunee imi bele aprende liu hosi ami kona ba liafuan nee, “La bele hanoin liu fali buat nebee hakerek nanis ona.” Entaun la bele foti aan atu gaba ema ida aas liu ema seluk. 7Tanba see mak haree imi nudar ema oin seluk? No saida mak imi hetan ona nebee laos imi simu deit? Se karik imi simu deit buat nee, tanba saa mak imi gaba aan hanesan imi la simu deit?
8Agora imi bosu ona! Imi sai riku ona! Imi sai ona liurai sira maski laos ho ami! Tebes hau hakarak imi ukun duni atu nunee ami mos bele ukun hamutuk ho imi. 9Tanba hau hanoin katak Maromak lori ami, nebee apostolu sira, atu tama ikus liu ba estádium hanesan ema nebee atu simu kastigu mate, hodi mundu tomak, inklui anju no ema, bele hateke mai ami.#4:9 Iha tempu antigu, Roma iha estádium ba desportu, inklui mos ema baku malu too mate ka oho ema nebee governu lakohi. (Lian Gregu teatru). 10Ami sai ema beik tanba Kristu, maibee imi matenek iha Kristu. Ami fraku, maibee imi forti. Ema foo onra ba imi, maibee ema hakribi ami. 11Too oras nee mos ami hamlaha no hamrook. Ami hatais hena aat no ema baku ami. Ami la iha fatin atu hela. 12Ami kole no servisu ho ami nia liman rasik. Bainhira ema hakribi ami, ami foo bensaun fali. Bainhira ema halo terus ami, ami tahan deit. 13Bainhira sira koalia aat ami, ami foo kamaan fali ba sira.#4:13 ‘foo kamaan’ nee hosi liafuan iha Gregu parakaleo nebee ‘husu atu hakbesik mai’ hodi ajuda ka hamaus ema. Haree versíkulu 16, Mateus 5:4 no Lukas 15:28. Ami sai ona buat foer hosi mundu, no sira haree hela ami nudar bee-teen deit.
14Hau hakerek buat sira nee laos atu hamoe imi, maibee atu foo hanoin ba imi nebee hau nia oan doben sira. 15Tanba maski imi iha mestri rihun ba rihun iha Kristu, maibee imi la iha aman barak. Tanba iha Kristu Jesus hau mak foo moris ba imi liu hosi evanjelhu. 16Nunee hau husu imi atu halo tuir hau nia ezemplu. 17Tanba nee mak hau haruka Timóteo ba imi. Nia mak hau nia oan doben nebee laran metin iha Nai. Nia sei foo hanoin ba imi kona ba hau nia hahalok iha Kristu, nebee hau hanorin iha fatin hotu iha igreja hotu. 18Ema balu foti aan tanba sira hanoin hau la baa vizita imi. 19Maibee, se tuir Nai nia hakarak, la kleur tan hau sei baa vizita imi. Depois hau sei hatene laos kona ba sira nia liafuan maibee kona ba sira nia kbiit. 20Tanba Maromak nia reinu laos iha liafuan, maibee iha kbiit. 21Imi hakarak saida? Hau sei baa vizita imi ho rota, ka ho domin no espíritu nebee maus?
Currently Selected:
1 Korinto 4: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.