1 Korinto 5
5
Sala Seksuál Mak Hafoer Igreja
1Hau rona katak iha imi nia leet iha ema nebee halo sala seksuál. Hahalok nee, ema Jentiu mos la simu, katak mane ida toba ho ninia aman nia feen. 2No imi loko aan! Laos imi tenki tanis? Hasai tiha nia nebee halo ida nee hosi imi nia leet.
3Tanba maski hau laos iha nebaa iha isin, maibee hau iha nebaa iha espíritu. No hanesan hau iha nebaa, hau tesi lia ona ba nia nebee halo ida nee. 4Bainhira imi halibur hamutuk hodi Nai Jesus nia naran, no hau nia espíritu mos iha nebaa, ho ita nia Nai Jesus nia kbiit, 5entrega ema nee ba Satanás hodi halakon isin,#5:5 Paulo koalia kona ba halakon hahalok nebee tuir isin, katak hahalok aat. Haree Roma 8:1-11. atu nunee ninia espíritu bele hetan salvasaun iha Nai nia loron.
6Imi nia hahalok gaba aan nee la diak. Imi kompriende ka lae katak fermentu uitoan halo masa tomak sae?#5:6-8 Fermentu nee buat kiik-oan nebee aumenta too barak iha masa trigu laran hodi halo masa sae. Maromak foo orden atu sira la bele kahur fermentu iha sira nia trigu iha Festa Páskua. Jesus halo komparasaun ho fermentu no hahalok aat - uitoan deit bele impaktu sarani sira hotu! Haree Exodu 12:15 no Mateus 16:5-12, Lucas 12:1, Galásia 5:9 no mos Marcos 8:15. 7Hasai tiha fermentu tuan atu imi bele sai masa foun, nebee fermentu la iha. Tanba Kristu, ita nia Bibi Oan Páskua nian, sai ona ita nia sakrifísiu.#5:7 Haree João 1:29 no nota. 8Tanba nee, mai ita selebra festa nee, laos ho fermentu tuan nebee fermentu hosi hahalok aat no sala, maibee ho paun fermentu laek katak laran moos no lia loos.
9Hau hakerek ona iha hau nia surat katak imi keta lao hamutuk ho ema nebee halo sala seksuál. 10Nee laos kona ba ema iha mundu nee, nebee halo sala seksuál, ka kaan-teen sira, sira nebee hamatak ema nia sasaan ka sira nebee adora ídulu. Se hanesan nee karik, imi tenki sai hosi mundu. 11Maibee agora hau hakerek ba imi atu keta lao hamutuk ho ema ida nebee lori naran nudar maun-alin se nia halo sala seksuál, kaan buat ruma, adora ídulu, koalia aat, lanu ka hamatak sasaan. La bele haan hamutuk ho ema hanesan nee. 12Tanba saa mak hau tesi lia ba ema iha liur? Laos imi tenki tesi lia ba sira nebee iha laran? 13Maromak sei tesi lia ba sira nebee iha liur. “Hasai tiha ema aat hosi imi nia leet.”#5:13 Haree Deuteronómiu 17:7.
Currently Selected:
1 Korinto 5: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.