1 Korinto 6
6
Sarani Sira Iha Tribunál
1Bainhira ema ida iha problema ho ninia maluk, nusaa mak nia brani atu baa tribunál hodi hamriik iha ema aat nia oin, no laos baa ema santu sira? 2Imi hatene ka lae katak santu sira sei tesi lia ba mundu? No se imi mak sei tesi lia ba mundu, nusaa mak imi la too atu tesi lia ba asuntu kiik-oan sira nee? 3Imi hatene ka lae katak ita sei tesi lia ba anju sira? Oinsaa liu tan ho asuntu iha moris nee? 4Entaun se imi iha problema ruma, tanba saa mak imi lori problema nee ba sira nebee laos hosi igreja? 5Hau koalia nunee atu hamoe imi. Ida nee tebes ka, katak imi la iha ema matenek klean ida iha imi nia leet atu tesi lia entre maun-alin sira ka? 6Maibee maluk ida lori maluk seluk ba tribunál, ba sira nebee la fiar. 7Bainhira imi iha problema tribunál nian ho imi nia maluk imi lakon ona. Tanba saa mak imi la simu deit sala nee? Tanba saa mak imi la husik deit ema hamatak imi? 8Maibee imi halo aat no hamatak imi nia maun-alin sira! 9Imi kompriende ka lae katak ema aat sei la simu Maromak nia reinu nudar liman rohan? Keta lohi aan: ema nebee halo sala seksuál, adora ídulu, halo sala adultériu, ka mane ida nebee halo sala seksuál ho mane seluk, 10ka naok-teen, kaan-teen, lanu-teen, ka ema nebee koalia aat ba ema seluk, ka ema nebee hamatak sasaan - ema sira nee sei la simu Maromak nia reinu nudar liman rohan. 11No uluk imi balu hanesan nee. Maibee ita nia Maromak hamoos ona imi. Nia halo imi santu no loos hodi Nai Jesus Kristu nia naran liu hosi Ninia Espíritu.
Halai Hosi Sala Seksuál
12“Tuir lo-loos, hau bele halo buat hotu,” maibee laos buat hotu mak diak ba ita. “Tuir lo-loos, hau bele halo buat hotu,” maibee hau sei la sai atan ba buat ida. 13“Ai haan ba kabun, no kabun ba ai haan,” maibee Maromak sei halakon buat rua nee. Isin lolon laos ba sala seksuál, maibee isin lolon ba Nai, no Nai ba isin lolon. 14Maromak foo moris fali ba Nai, no Nia mos sei foo moris fali ba ita liu hosi Ninia kbiit. 15Imi hatene ka lae katak imi nia isin lolon mak parte hosi Kristu? Entaun hau sei foti parte hosi Kristu no halo nia sai parte hosi feto luroon ka? La bele! 16Imi hatene ka lae katak nia nebee sai hamutuk ho feto luroon sai nudar isin lolon ida deit ho nia? Tanba hanesan ema hakerek nanis ona, “Sira nain rua sei sai isin ida deit.”#6:16 Liafuan ‘sai hamutuk’ nee hanesan ‘belit’. Hanesan mos iha versíkulu 17. Haree Jénesis 2:24. 17Maibee ema nebee hamutuk ho Nai sai ida deit ho Nia iha espíritu. 18Halai hosi sala seksuál. Sala seluk hotu nebee ema halo mak iha isin liur. Maibee nia nebee halo sala seksuál mak halo sala hasoru ninia isin rasik. 19Imi hatene ka lae katak imi nia isin lolon mak templu ba Espíritu Santu nebee iha imi nia laran? Imi simu ona Espíritu nee hosi Maromak. Imi laos imi nian. 20Tanba Maromak hola ona imi ho folin ida. Nunee foo glória ba Maromak iha imi nia isin.
Currently Selected:
1 Korinto 6: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.