1 Korinto 7
7
Laen Ho Feen
1Agora, kona ba#7:1 Iha lian Gregu ‘Agora, kona ba ...’ katak atu foo resposta ba liafuan hosi surat nebee ema Korinto hakerek ona ba Paulo. Haree 1 Korinto 7:25, 8:1, 12:1, 16:12. buat sira nebee imi hakerek ona mai hau, “Ita halo diak bainhira mane la hola feto.” 2Maibee tanba sala seksuál, diak liu mane ida-idak iha ninia feen rasik, no feto ida-idak iha ninia laen rasik. 3Laen tenki foo ba ninia feen no feen tenki foo ba ninia laen tuir sira nia direitu nudar feen-laen. 4Feen la ukun ninia isin lolon rasik, maibee laen mak ukun. No mos laen la ukun ninia isin lolon rasik, maibee feen mak ukun. 5Feen-laen la bele hadook aan ba malu, só deit se imi konkorda karik too tempu uitoan, atu imi bele entrega aan ba orasaun. Depois mai hamutuk fali hodi Satanás la bele tenta imi, tanba imi la toman atu kontrola aan.
6Maibee hau foo sujestaun ida, laos orden ida. 7Tanba hau hakarak ema hotu moris hanesan hau. Maibee ema ida-idak iha ninia prezenti rasik hosi Maromak, ema ida iha prezenti oin ida, no ema seluk iha oin seluk.
8Ba klosan sira no feto faluk sira hau dehan katak diak liu sira la kaben hanesan hau mos la kaben. 9Maibee se sira la toman atu kontrola aan, husik sira kaben. Tanba diak liu ema kaben duké laran lakan atu hetan buat nee.
10No ba kaben nain sira hau foo orden nee (laos hau maibee Nai mak foo): feen la bele haketak aan hosi ninia laen. 11Maibee se nia haketak aan karik, nia tenki hela mesak atu la kaben fali. Se lae, nia tenki dame malu fali ho ninia laen. No laen la bele soe ninia feen.
12Ba sira seluk hau dehan (laos Nai maibee hau mak dehan): Se maun-alin ida iha feen nebee la fiar, no feen nee hakarak atu hela nafatin ho nia, entaun nia la bele soe ninia feen. 13No feto nebee iha laen nebee la fiar, no laen nee hakarak atu hela nafatin ho nia, entaun nia la bele soe ninia laen. 14Tanba laen nebee la fiar sei sai santu tanba ninia feen, no feen nebee la fiar sei sai santu tanba ninia laen. Se lae, imi nia oan sira nee la moos. Maibee agora sira santu ona. 15Maibee se kaben nain ida nebee la fiar hakarak haketak malu, husik nia ba. Bainhira hanesan nee, kaben nain ida nebee fiar nee la iha kastigu. Maromak bolu ona imi ba dame. 16Tanba feen, o la hatene karik, o bele salva o nia laen. Ka laen, o la hatene karik, o bele salva o nia feen.
Moris Tuir Oinsaa Maromak Bolu Ita
17Diak liu ema ida-idak lao tuir moris nebee Nai foo ona ba nia, nebee bainhira Maromak bolu nia. Ida nee mak hau nia regra iha igreja hotu. 18Iha ema ruma nebee simu ona sirkunsizaun#7:18 Lee kona ba halo sunat iha Jénesis 17:11 no nota. Igreja resolve problema kona ba sirkunsizaun iha Apostolu 15. bainhira Maromak bolu nia? Nia lalika hasai sinál sirkunsizaun nian. Iha ema ruma nebee seidauk simu sirkunsizaun bainhira Maromak bolu nia? Nia lalika simu sirkunsizaun. 19Se ema simu sirkunsizaun ka lae, ida nee la iha folin; só deit atu halo tuir Maromak nia ukun fuan sira. 20Husik ema ida-idak hela nafatin iha ninia moris nebee nia iha bainhira Maromak bolu nia. 21O mak atan bainhira Maromak bolu o ka? La buat ida. (Maibee se o bele hetan liberdade, entaun hetan ba.) 22Tanba bainhira Nai bolu ema ida nebee atan, ema nee sai Nai nia ema nebee livre. No bainhira Nai bolu ema ida nebee livre, ema nee sai Kristu nia atan. 23Maromak hola ona imi ho folin ida. Entaun keta sai atan ba ema. 24Nee duni maun-alin sira, husik ema ida-idak hela ho Maromak tuir moris nebee nia iha ona bainhira Maromak bolu nia.
Klosan No Faluk
25Agora, kona ba sira nebee seidauk kaben, hau la iha ukun fuan hosi Nai. Maibee hau foo hau nia hanoin nudar ema nebee ita bele fiar tanba Nai nia laran luak. 26Hau hanoin katak diak liu ema kontinua hela iha situasaun hanesan tanba tempu susar nee. 27O kesi ona ba feen ida ka? Keta buka atu sai livre. O livre hosi feen ida ka? Keta buka feen ida. 28Maibee se o kaben karik, o la halo sala ida. Se feto klosan kaben karik, nia la halo sala ida. Maibee sira nebee kaben sei hetan susar iha moris nee.#7:28 Gregu dehan ‘iha isin’, nebee moris iha mundu nee, laos iha moris espirituál. No hau hakarak atu imi la hetan susar nee. 29Hau dehan ida nee, maun-alin sira, katak tempu badak ona. Hosi ohin ba oin, husik sira nebee iha feen moris hanesan sira la iha feen, 30no sira nebee tanis hanesan sira la tanis, no sira nebee haksolok hanesan sira la haksolok, no sira nebee sosa hanesan sira la iha sasaan, 31no sira nebee uza mundu nee hanesan sira la uza. Tanba mundu nia oin hanesan nee komesa lakon ona.
32Hau hakarak imi la iha hanoin susar. Nia nebee la kaben hanoin kona ba buat nebee Nai nian no oinsaa nia bele halo Nai kontenti. 33Maibee ema nebee kaben ona hanoin kona ba buat mundu nian, no oinsaa nia bele halo ninia feen kontenti. 34Ema nee nia hanoin fahe ba rua. Feto nebee la kaben no feto nebee klosan hela hanoin kona ba buat nebee Nai nian, atu oinsaa nia bele santu iha isin no espíritu. Maibee feto nebee kaben ona hanoin kona ba buat nebee mundu nian, no oinsaa nia bele halo ninia laen kontenti. 35Hau koalia hotu nunee hodi foo benefísiu ba imi, laos atu lasu imi. Hau hakarak promove moris loos no oinsaa imi bele serví deit Nai ho laran tomak.
36Maibee se mane ruma hanoin katak nia la halo diak ba ninia feto klosan, no se nia liu ona, no hakarak duni, entaun husik sira kaben, sira la halo sala ida. 37Maski nunee, nia nebee metin iha ninia fuan laran, no nia la presiza, no nia iha kbiit atu kontrola aan, no nia desidi metin iha ninia fuan laran atu tau matan ba ninia feto nudar klosan, nia halo diak. 38Entaun nia nebee kaben ho ninia feto halo diak, no nia nebee la kaben halo diak liu tan.
39Feen ida kesi metin ho ninia laen bainhira laen nee moris hela. Maibee se ninia laen mate, nia livre atu kaben fali ho mane seluk tuir ninia hakarak, naran katak iha Nai. 40Maibee tuir hau nia hanoin, nia sei kontenti liu se nia moris hanesan nee nafatin. No hau hanoin katak hau mos iha Maromak nia Espíritu.
Currently Selected:
1 Korinto 7: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.