2 Korinto 1
1
Kumprimentus
1Hosi Paulo, nebee Kristu Jesus nia apostolu ida tuir Maromak nia hakarak, no ita nia maluk Timóteo. Ba Maromak nia igreja iha Korinto, ho santu sira hotu nebee iha rai Akaia tomak:
2Grasa ba imi, no dame, hosi ita nia Aman Maromak no Nai Jesus Kristu.
Maromak Foo Kamaan
3Bensaun ba ita nia Nai Jesus Kristu nia Maromak no Aman. Nia mak Aman nebee hatudu laran luak no Maromak nebee foo kamaan hotu. 4Nia foo kamaan ba ita iha ita nia terus hotu, atu nunee ita bele foo kamaan ba ema seluk nebee iha terus saida deit, liu hosi kamaan nebee ita simu hosi Maromak. 5Tanba hanesan ita simu Kristu nia susar barak, nunee mos liu hosi Kristu mak ita simu kamaan barak. 6Se ami hetan terus, nee atu imi hetan kamaan no salvasaun. No se ami hetan kamaan, nee atu imi mos hetan kamaan. Imi sei hetan kamaan bainhira imi tahan ho pasiénsia iha susar nebee hanesan ami nia susar. 7Ami iha esperansa metin kona ba imi. Tanba ami hatene katak bainhira imi hetan susar hanesan ami nia susar, nunee imi sei hetan kamaan hanesan ami nia kamaan.
8Maun-alin sira, ami hakarak imi hatene kona ba terus nebee ami hasoru iha Ázia. Tanba ami hasoru terus nebee todan tebe-tebes, liu fali ami nia kbiit, too ami hanoin oinsaa mak ami bele moris. 9Ami hanoin katak ami simu ona kastigu mate. Ami hasoru terus nee atu ami la fiar ba ami nia aan rasik, maibee atu ami fiar ba Maromak nebee bele halo ema moris hias hosi mate. 10Nia salva ami hosi perigu boot nebee atu oho ami, no Nia sei salva tan ami. Ami tau ona esperansa ba Nia katak Nia sei salva fali ami. 11Imi mos tenki ajuda ami liu hosi orasaun, atu nunee ema barak sei foo agradese kona ba ami tanba bensaun nebee ami simu liu hosi ema barak nia orasaun.
Paulo Troka Ninia Planu
12Ami gaba aan tanba testemunha hosi ami nia konsiénsia. Tanba ami hela iha mundu nee, liu-liu iha imi nia leet, ho laran loos#1:12 Liafuan Gregu hanesan ‘ida’ ka ‘klaru’ katak laos laran makerek. Manuskritu balu dehan ‘santu’. no laran moos hosi Maromak, laos ho ema nia matenek maibee ho Maromak nia grasa. 13Tanba ami la hakerek buat seluk ba imi, só deit buat nebee imi lee ona no kompriende. No hau hein katak imi sei kompriende hotu - 14hanesan mos imi kompriende balu deit kona ba ami - atu nunee iha ita nia Nai Jesus nia loron imi sei gaba ami hanesan mos ami gaba imi.
15Hau hatene duni ida nee, no tanba nee mak uluk hau hakarak vizita imi, atu nunee imi bele hetan grasa ba dala rua. 16Uluk hau hakarak vizita imi iha hau nia viajen ba Masedónia, no vizita fali imi bainhira hau fila hosi Masedónia, no atu imi bele ajuda hau iha hau nia viajen ba Judeia. 17Bainhira hau halo planu nee, hau halo planu arbiru deit ka? Hau halo hau nia planu tuir ema nia hanoin ka? Hau dehan, “Sin, sin,” no “Lae, lae,” iha tempu hanesan ka? 18Maibee hanesan Maromak mak fiel, ami nia liafuan ba imi nee laos “Sin” no “Lae”. 19Tanba Silvano, Timóteo no hau haklaken ona kona ba Maromak nia Oan, Jesus Kristu, iha imi nia leet. No Nia laos “Sin” no “Lae,” maibee iha Nia mak “Sin” nafatin. 20Tanba Maromak nia promesa hotu mak “Sin” iha Jesus. Nunee liu hosi Jesus ita dehan Amén ba Maromak tanba Ninia glória. 21Agora, Maromak mak hametin ami hamutuk ho imi iha Kristu. Nia fui mina ona ba ita. 22Nia tau ona Ninia sinál ba ita no foo ona Ninia Espíritu iha ita nia fuan laran nudar garantia ida.
23Maibee hau husu Maromak sai sasin hasoru hau - tanba tebes hau la baa fali Korinto hodi hau la foo todan tan ba imi. 24Nee laos ami domina imi nia fiar, tanba imi hamriik metin ona iha imi nia fiar. Maibee ami servisu hamutuk ho imi atu imi bele sai haksolok.
Currently Selected:
2 Korinto 1: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.