2 Korinto 10
10
Paulo Defende Ninia Ministériu
1Agora, hau rasik, Paulo, husu imi ho laran haraik aan no laran maus hosi Kristu - hau rasik nebee haraik aan bainhira hau hamutuk ho imi oin ho oin, maibee hatudu brani bainhira hau dook. 2Hau husu ho laran ba imi katak hau la presiza hatudu laran brani nebee hau hanoin duni atu hatudu ba ema nebee hanoin ami lao tuir isin.#10:2 Isin nee refere ba mundu nia hahalok. Haree Roma 8:4 no nota. Ema balu hanoin Paulo halo tuir mundu nia hahalok nebee karik nia naok osan balu nebee sira foo. 3Tanba maski ami lao iha isin, ami la halo funu tuir isin. 4Tanba ami nia armas funu nian la mai hosi isin, maibee armas nee iha kbiit hosi Maromak atu sobu fortaleza sira.#10:4 Fortaleza nee hanesan uma seguru no forti nebee halo hosi fatuk. Haree 2 Samuel 5:7. Nia koalia kona ba espíritu aat ka hahalok aat nia fatin seguru. 5Ita bele sobu rahun hanorin hotu no hanoin aas nebee ema harii hasoru Maromak nia matenek. Nunee ita bele kaer hanoin hotu atu halo tuir Kristu. 6No bainhira imi halo tuir lo-loos, ami prontu atu kastigu hahalok hotu nebee la halo tuir.
7Haree took buat nebee iha imi nia oin. Se ema ruma fiar katak nia mak Kristu nian, entaun diak liu nia foo hanoin ba nia aan rasik katak hanesan nia mak Kristu nian, nunee mos ami mak Kristu nian. 8Tanba maski hau gaba aan barak uitoan kona ba ami nia kbiit, nebee Nai foo mai ami atu harii imi laos atu harahun imi, hau sei la sai moe. 9Hau lakohi imi hanoin katak hau koko halo imi tauk ho hau nia surat sira. 10Tanba sira dehan, “Ninia surat sira todan no forti, maibee bainhira nia rasik mai iha nee nia fraku no ninia liafuan la iha folin.” 11Ema hanesan nee tenki hatene katak buat nebee ami hakerek iha surat bainhira ami dook, ami sei halo nunee bainhira ami hamutuk ho imi. 12Laos ami brani atu sura aan ka kompara aan ho sira nebee foti aan. Maibee bainhira sira tetu no kompara aan ho sira nia maluk, sira lakon kompriensaun.
13Maibee ami sei la gaba aan kona ba buat nebee liu fali ami nia knaar, só tuir deit knaar nebee Maromak fahe ona ba ami, nebee inklui mos imi. 14Tanba se ami la baa too imi karik, nunee ami foti aan aas liu. Maibee laos hanesan nee, tanba ami mak ema primeiru atu lori Kristu nia evanjelhu ba imi. 15Ami la gaba aan kona ba ema seluk nia servisu nebee liu fali ami nia knaar. Maibee ami hein katak bainhira imi nia fiar aumenta ba beibeik, nunee mos ami nia direitu iha imi nia leet bele sai luan liu tan. 16Nunee ami bele haklaken evanjelhu iha área sira nebee iha imi nia sorin ba, hodi nunee ami sei la gaba aan kona ba servisu nebee ema seluk halo ona tuir sira nia knaar. 17“Ema nebee gaba aan, tenki gaba aan tanba Nai.” 18Tanba laos ema nebee foti aan mak simu knaar, maibee nia nebee Nai mak foti.
Currently Selected:
2 Korinto 10: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.