2 Korinto 11
11
Paulo No Apostolu Falsu
1Hau hakarak imi tahan hau hodi hau bele koalia beik uitoan. Tahan hau ba! 2Tanba hau laran moras kona ba imi ho laran moras Maromak nian. Tanba hau promete imi ba Laen ida deit, atu entrega imi nudar feto raan ida nebee moos ba Kristu. 3Maibee hau tauk katak hanesan samea lohi Eva ho ninia matenek, nunee mos imi nia hanoin sei lao sees hosi dalan ida nebee loos no moos iha Kristu. 4Tanba se ema ida mai no haklaken Jesus oin seluk nebee ami la haklaken, ka se imi simu espíritu nebee la hanesan ida nebee imi simu ona, ka se imi simu ‘evanjelhu’ nebee la hanesan ida nebee imi simu ona, nunee imi tahan duni ida nee. 5Tebes, hau hanoin katak hau la kiik liu fali apostolu boot sira nee. 6Tanba se hau koalia ladun diak, hau sei matenek. Tebes, ami hatudu klaru ona buat hotu nee ba imi.
7Hau haraik aan atu foti aas imi tanba hau haklaken gratis Maromak nia evanjelhu ba imi. Nunee hau sala ka? 8Hau naok hosi igreja sira seluk tanba hau simu kolen hosi sira hodi serví imi. 9No bainhira hau hamutuk ho imi, no hau presiza buat ruma, hau la foo todan ba imi ida. Tanba maun-alin sira hosi Masedónia foo buat nebee hau presiza. Nunee hau la foo todan ba imi no hau hanoin atu kontinua halo hanesan nee. 10Hodi Kristu nia lia loos nebee iha hau nia laran, hau sei la para atu gaba aan iha rejiaun Akaia. 11Tanba saa? Tanba hau la hadomi imi ka? Maromak hatene katak hau hadomi imi!
12No buat nebee hau halo nee, hau sei kontinua halo hela hodi hasoru ema seluk nia liafuan. Tanba sira gaba aan atu dehan katak sira servisu hanesan ami. 13Tanba ema hanesan nee mak apostolu falsu, sira servisu atu lohi imi no sira finji hanesan Kristu nia apostolu sira. 14Ita la hakfodak, tanba Satanás finji hanesan anju naroman nian. 15Nunee ita la hakfodak bainhira ninia atan sira mos finji hanesan atan moris loos nian. Sira nia rohan sei tuir sira nia hahalok.
Paulo Nia Terus
16Hau dehan fali, keta hanoin katak hau mak beik. Maibee se imi hanoin hanesan nee, entaun simu hau nudar ema beik ida, atu nunee hau mos bele gaba aan uitoan. 17Buat nebee hau koalia atu gaba aan ho konfiansa nee, hau koalia laos tuir Nai, maibee hanesan ema beik ida. 18Hanesan ema barak gaba aan tuir isin, hau mos sei gaba aan. 19Tanba imi kontenti atu tahan ema beik sira, tanba imi matenek ona! 20Tanba imi simu deit ema nebee halo imi sai atan, ka sira hamatak imi, ka naok hosi imi, ka foti aan ka basa imi nia oin. 21Hau moe katak ami fraku liu atu halo hanesan nee! Maibee iha buat hotu nebee ema seluk brani atu gaba aan - hau koalia nudar ema beik ida - hau mos brani atu gaba aan hanesan nee. 22Sira ema Ebreu ka? Hau mos. Sira ema Israel ka? Hau mos. Sira bei-oan hosi Abraão ka? Hau mos. 23Sira Kristu nia atan ka? Hau mak ida nebee diak liu (hau koalia hanesan ema bulak). Hau servisu barak liu tan, no tama komarka dala barak liu tan, ema baku hau too sura la bele, no dala barak hau besik atu mate.#11:23 Haree ezemplu iha Apostolu 16:22-23. 24Dala lima hau simu kastigu hosi ema Judeu sira nia liman nebee sira baku hau dala haat-nulu menus ida.#11:24 Lei hosi Moisés bandu sira atu la bele baku ema too dala haat-nulu. Haree Deuteronómiu 25:1-3. 25Dala tolu ema baku hau ho ai dona. Dala ida sira tuda fatuk atu oho hau. Dala tolu roo mout. Loron ida kalan ida hau namlele deit iha tasi. 26Hau halo viajen dala barak. Hau hasoru perigu hosi mota sira, perigu hosi naok-teen sira, perigu hosi hau nia povu, perigu hosi ema Jentiu sira, perigu iha sidade laran, perigu iha rai fuik, perigu iha tasi no perigu hosi maun-alin falsu. 27Hau tenki servisu todan no hetan terus. Kalan barak hau la dukur. Hau hamlaha no hamrook, no dala barak hahaan la iha no hau malirin ho isin molik. 28No liu fali buat hotu nebee akontese, loro-loron hau senti todan tanba hau preokupa kona ba igreja hotu. 29See mak fraku no hau la fraku? See mak monu ba sala no hau la laran nakali?
30Se hau tenki gaba aan, hau sei gaba aan kona ba buat nebee hatudu katak hau fraku. 31Nai Jesus nia Maromak no Aman, nebee simu bensaun too rohan laek, hatene katak hau la bosok. 32Iha Damasku, governadór nebee iha liurai Aretas nia okos tau guarda iha sidade Damasku hodi kaer hau. 33Maibee ema hatuun hau iha bote ida liu hosi janela ida iha moru, no hau halai sai hosi ninia liman.#11:33 Haree Apostolu 9:24-25.
Currently Selected:
2 Korinto 11: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.