2 Korinto 7
7
Paulo Haksolok Tanba Sira
1Entaun, maluk doben sira, tanba ita iha promesa sira nee, mai ita hamoos aan hosi buat hotu nebee bele hafoer isin no espíritu, no sai kompletu iha santidade ho laran nebee hamtauk Maromak.
2Foo fatin ba ami. Ami la halo aat ba ema ida. Ami la halo ema ida sala. Ami la lohi ema ida. 3Hau koalia hanesan nee laos atu kondena imi. Tanba ohin hau dehan tiha ona katak imi mak iha ami nia fuan laran, atu ita mate hamutuk no moris hamutuk. 4Hau koalia nakloke loos ba imi. Hau orgulhu tebes tanba imi. Hau senti kamaan liu. Iha ami nia terus hotu, hau nia laran ksolok liu.
5Tanba bainhira ami too mai iha Masedónia, ami nia isin lolon la deskansa, maibee ami hetan terus oi-oin - ami luta iha liur no tauk iha laran. 6Maibee Maromak, nebee foo kamaan ba sira nebee laran susar, foo kamaan mai ami bainhira Tito nebee vizita ami. 7No laos deit tanba Tito vizita ami, maibee tanba kamaan nebee nia simu hosi imi. Tanba nia foo hatene mai ami katak imi hakarak tebes, no tristi no hanoin tebe-tebes#7:7 Liafuan iha Gregu dehan ‘laran manas’ kona ba nia (laos hirus). mos tanba hau. Nunee hau haksolok liu tan. 8Tanba maski hau halo imi tristi ho hau nia surat, maibee hau la hanoin katak hau sala. Uluk hau hanoin ida nee mak sala, tanba hau haree surat nee halo imi tristi, maski too tempu uitoan deit. 9Maibee agora hau haksolok, laos tanba imi sai tristi, maibee tanba imi nia laran tristi halo imi arepende. Tanba imi senti tristi tuir Maromak nia hakarak, nunee imi la hetan kanek ida tanba ami.
10Tanba laran tristi tuir Maromak halo ita arepende no hetan salvasaun no ita la hanoin fali sala nee. Maibee laran tristi tuir mundu halo ita mate. 11Haree took, oinsaa imi nia laran tristi tuir Maromak halo imi prontu. Imi prontu atu hamoos imi nia aan. Imi mos hamtauk, hakarak duni, laran manas no hetan kastigu! Iha asuntu oi-oin imi hatudu katak imi moos ona. 12Entaun maski hau hakerek ba imi, ida nee laos tanba ema ida nebee halo sala, no laos tanba ema ida nebee hetan kanek, maibee hodi imi bele haree oinsaa imi prontu iha Maromak nia oin. 13Nunee ami hetan laran kamaan. No liu tan laran kamaan nebee ami hetan, ami mos haksolok liu tan tanba Tito iha laran ksolok, no ninia espíritu sai hakmatek tanba imi hotu. 14Tanba iha liafuan saida deit nebee hau gaba imi ba nia, hau la sai moe. Maibee hanesan buat hotu nebee ami dehan ba imi mak loos, nunee mos ami nia liafuan gaba nee iha Tito nia oin sai loos. 15No Nia hadomi imi barak liu tan, tanba nia hanoin hetan oinsaa imi halo tuir liafuan nee no oinsaa imi simu nia ho laran nebee hamtauk no nakdedar. 16Hau haksolok tanba hau iha konfiansa iha imi kona ba buat hotu.
Currently Selected:
2 Korinto 7: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.