2 Korinto 8
8
Foo Ho Karidade
1Maun-alin sira, ami hakarak foo hatene ba imi kona ba grasa nebee Maromak foo ona ba igreja sira iha Masedónia. 2Sira hasoru tempu nebee koko sira ho terus makaas. Maibee sira haksolok tebes, no maski sira kiak too rabat rai sira hatudu karidade nebee riku liu. 3Tanba sira foo tuir sira nia kbiit, no hau foo sasin katak sira foo liu fali sira nia kbiit tuir sira nia hakarak. 4Sira husu ami fila-fila ho laran hodi sira bele hatudu grasa nebee hola parte iha ministériu atu ajuda santu sira. 5No sira halo ida nee laos tuir ami nia hanoin, tanba primeiru sira entrega aan ba Nai, depois ba ami tuir Maromak nia hakarak. 6Entaun ami husu tan ba Tito katak hanesan nia hahuu ona, nunee nia tenki halo too hotu hahalok grasa nian#8:6 Hahalok grasa nian refere ba osan nebee sira atu foo hodi ajuda santu sira iha Jerusalém. Kapítulu 8 no 9 koalia kona ba asuntu nee. nee iha imi nia leet. 7Maibee, hanesan imi halo diak liu iha buat hotu, nebee iha fiar, iha liafuan, iha matenek, iha laran nebee sempre prontu, no iha ami nia domin ba imi,#8:7 Manuskritu balu dehan ‘iha imi nia domin ba ami’. haree katak imi halo diak liu iha hahalok grasa nee mos.
8Hau koalia hanesan nee laos nudar mandamentu ida, maibee atu prova liu hosi ema seluk nia laran prontu katak imi mos iha domin loos. 9Tanba imi hatene ona ita nia Nai Jesus Kristu nia grasa, katak maski Nia riku Nia sai kiak tanba imi. Nia sai kiak nee atu imi bele sai riku. 10No iha asuntu nee hau foo hau nia hanoin: ida nee foo benefísiu ba imi. Tanba imi hahuu tinan ida liu ba laos deit atu halo servisu nee maibee atu hatudu katak imi hakarak duni atu halo ida nee. 11Entaun agora, halo hotu servisu nee, atu nunee imi nia laran nebee hakarak duni bele hanesan imi nia hahalok nebee sei halo too hotu, tuir buat nebee imi iha. 12Tanba se ema hakarak foo, Maromak bele simu ninia prezenti tuir buat nebee nia iha, laos tuir buat nebee nia la iha.#8:12 Liafuan iha Gregu la inklui ‘Maromak’ no ‘prezenti’ maibee dehan ‘buat nee simu ona tuir ...’. 13Tanba hau la dehan katak ema seluk bele hetan kamaan, no imi hetan fali todan. Maibee atu halo hanesan. 14Imi nia riku-soin iha tempu agora bele ajuda sira iha buat nebee sira falta, atu nunee sira nia riku-soin bele ajuda imi iha buat nebee imi falta. Nunee ita halo hanesan. 15Nee tuir buat nebee ema hakerek nanis ona, “Ema nebee halibur barak la iha resin, no ema nebee halibur uitoan la falta buat ida.”#8:15 Hosi Exodu 16:18.
Kona ba Tito
16Maibee agradese ba Maromak, tanba Nia halo Tito nia fuan laran prontu atu hanoin imi hanesan hau hanoin imi. 17Tanba Tito la simu deit buat nebee ami husu maibee nia rasik prontu duni atu baa vizita imi tuir ninia hakarak. 18Ami sei haruka maun ida atu baa hamutuk ho Tito. Ema nee iha konhesimentu iha igreja hotu nia leet tanba nia hatene haklaken evanjelhu. 19No laos nee deit, maibee igreja sira foo ona knaar ba nia atu halo viajen ho ami bainhira ami halao grasa nian nee. Ami halo ministériu nee hodi foo glória ba Nai no hatudu katak ami hakarak foo. 20Ami halo ida nee hodi ema la bele foo sala mai ami kona ba prezenti boot nebee ami lori. 21Tanba ami hanoin atu halo diak, laos deit iha Nai nia oin, maibee mos iha ema nia oin. 22No hamutuk ho sira ami haruka ami nia alin ida nebee ami koko ona. Ami haree katak nia badinas iha buat barak. No agora nia badinas liu tan tanba nia iha konfiansa boot iha imi. 23Kona ba Tito nee, nia mak hau nia maluk no nia servisu hamutuk ho hau tanba imi. Kona ba ami nia maun-alin sira nee, sira mak manu-ain hosi igreja sira, no sira mak Kristu nia glória. 24Entaun hatudu prova ba sira, iha igreja sira nia oin, kona ba imi nia domin no tanba saa mak ami gaba imi.
Currently Selected:
2 Korinto 8: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.