Apostolu 12
12
Herodes Oho Tiago No Kastigu Pedro
1Iha tempu nebaa, liurai Herodes lolo ninia liman atu halo terus ba ema balu hosi igreja. 2Nia oho Tiago, João nia maun, ho surik. 3Bainhira nia haree ida nee halo ema Judeu sira kontenti, nia desidi atu kaer mos Pedro. Iha tempu nebaa sira halo festa Paun Fermentu Laek.#12:3 Sira halo festa Paun Fermentu Laek durante loron hitu no ikus mai halo Páskua. Haree Exodu 12. 4Bainhira nia kaer ona Pedro, nia tau Pedro iha komarka. Nia entrega Pedro ba soldadu grupu haat atu tau matan ba nia. Grupu ida-idak iha soldadu nain haat. Tanba nia hanoin atu hein too Páskua hotu mak foin hatudu Pedro ba povu. 5Nunee Pedro hela iha komarka. Maibee igreja kontinua halo orasaun ho laran manas ba Maromak tanba nia.
Pedro Sai Livre
6Bainhira Herodes hanoin atu lori nia sai, iha kalan nee duni, Pedro toba dukur iha soldadu nain rua nia klaran. Sira kesi nia ho korenti no guarda sira hein iha odamatan oin ba komarka nee. 7No tebes, Nai nia anju mosu mai ba Pedro, no naroman ida nabilan iha komarka. Anju nee baku Pedro nia sorin hodi fanu nia, no dehan, “Hamriik lalais!” No korenti sira monu hosi ninia liman. 8Anju nee dehan ba nia, “Hatais aan, no kesi o nia sandálias.” Pedro halo tuir. Anju dehan ba nia, “Hatais o nia unuk no tuir hau.” 9Depois nia lao sai no tuir anju. Nia la hatene katak buat nebee anju halo dadaun nee mak realidade, maibee nia hanoin katak nia haree vizaun ida. 10Bainhira sira liu ona guarda primeiru no segundu, sira mai too portaun besi nebee tama ba sidade. Portaun nee nakloke deit ba sira no sira lao sai. Sira kontinua lao liu dalan ida. Depois anju sees hosi nia. 11Bainhira Pedro hanoin lo-loos, nia dehan, “Agora hau hatene duni katak Nai haruka tiha ona Ninia anju no salva hau hosi Herodes nia liman, no hosi povu Judeu sira nia planu hotu.”
12Bainhira nia hatene ona ida nee, nia baa Maria nia uma. Maria mak João nia inan. João nia naran seluk mak Marcos. Iha nebaa ema barak halibur hamutuk no halo hela orasaun. 13Pedro dere odamatan iha dalan no atan feto ida naran Rode mai atu haree. 14Bainhira nia rona Pedro nia lian, nia la loke odamatan tanba nia haksolok liu. Maibee nia halai no foo hatene katak Pedro hamriik iha odamatan liur. 15No sira dehan ba nia, “O bulak!” Maibee nia dehan nafatin katak ida nee loos duni. Entaun sira dehan, “Nee mak Pedro nia anju.” 16Maibee Pedro kontinua dere odamatan. Bainhira sira loke tiha odamatan no haree nia, sira hakfodak. 17Maibee nia foo sinál ho liman atu halo sira nonook no nia konta ba sira oinsaa Nai lori nia sai hosi komarka. No nia dehan, “Foo hatene buat sira nee ba Tiago, no ba maun-alin sira.” Depois nia sai, no baa fatin seluk.
18Bainhira rai loron ona, soldadu sira hanoin barak kona ba buat nebee akontese ba Pedro. 19No bainhira Herodes buka ona nia, no la hetan nia, Herodes husu tan guarda sira, depois haruka ema oho sira. Tuir mai, nia tuun hosi Judeia ba Sezareia no hela iha nebaa.
Herodes Mate
20Herodes sai hirus makaas ho ema Tiro no Sidon. Entaun sira mai nudar ema ida deit atu hasoru nia. Sira hetan apoiu hosi liurai nia funsionáriu boot naran Blasto, no husu dame. Tanba sira nia rai depende ba liurai nia rai hodi hetan ai haan. 21Iha loron nebee sira marka, Herodes hatais ninia ropa liurai nian, tuur iha ninia kadunan, no halo diskursu ba sira. 22No povu nee hakilar, no dehan, “Ida nee lian hosi maromak ida, laos hosi ema ida!” 23Iha momentu nee kedas, Nai nia anju kona nia, tanba nia la foo glória ba Maromak. No ular haan tiha nia no nia iis kotu.
24Maibee Maromak nia liafuan haburas no habelar ba nafatin.
25Bainhira Barnabé no Saul halao ona sira nia ministériu, sira fila fali hosi Jerusalém. No sira lori João, nebee ema bolu Marcos.
Currently Selected:
Apostolu 12: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
