Apostolu 11
11
Pedro Defende Aan Ba Igreja
1Apostolu sira no maun-alin sira nebee iha Judeia rona katak ema Jentiu sira mos simu Maromak nia liafuan. 2No bainhira Pedro sae too iha Jerusalém, sira nebee hosi grupu sirkunsizaun haksesuk malu ho nia. 3Sira dehan, “Ita tama ba ema nebee la simu sirkunsizaun no haan hamutuk ho sira.” 4Maibee Pedro konta ba sira hosi hahuu tuir buat hotu nebee akontese. Nia dehan, 5“Bainhira hau iha sidade Jope no halo orasaun, hau sai bilaan ho vizaun ida. No hau haree buat ida hanesan hena boot ida nebee tuun hosi lalehan liu hosi lidun haat. Buat nee tuun mai too hau. 6Hau hateke di-diak no haree animál ain haat, animál fuik, buat nebee dolar, no manu sira hosi loro leten. 7Depois Hau rona lian ida dehan mai hau, ‘Pedro, hamriik ona. Oho no haan ba.’ 8Maibee Hau dehan, ‘La bele, Nai. Tanba buat nebee foer ka la moos nunka tama iha hau nia ibun.’ 9Maibee lian hosi lalehan nee hataan hau ba dala rua, ‘Buat nebee Maromak halo moos, keta bolu foer.’ 10Ida nee akontese dala tolu. Depois buat hotu nee sae fali ba lalehan. 11No tebes, iha momentu nee, ema nain tolu mai too uma nebee ami hela. Mane ida haruka sira hosi Sezareia hodi buka hau. 12No Espíritu haruka hau atu baa ho sira, no keta laran ru-rua. Maun-alin nain neen nee mos baa hamutuk ho hau, no ami tama ba mane nee nia uma. 13Nia konta ba ami oinsaa nia haree anju ida iha ninia uma. Anju nee hamriik no dehan ba nia, ‘Haruka ema ba Jope no lori mai Simão, nebee ema bolu Pedro. 14Nia sei foo sai liafuan. Liu hosi liafuan nee o no o nia uma kain tomak bele hetan salvasaun.’ 15No bainhira hau hahuu koalia, Espíritu Santu tuun ba sira hanesan ba ami iha tempu hahuu. 16Depois hau hanoin hetan Nai nia liafuan, nebee Nia dehan, ‘João foo batizmu ho bee, maibee imi sei simu batizmu ho Espíritu Santu.’#11:16 Haree Marcos 1:8. 17Entaun se Maromak foo prezenti nee ba sira hanesan Nia foo mos mai ita bainhira ita fiar ba Nai Jesus Kristu, oinsaa mak hau bele taka dalan ba Maromak?” 18Bainhira sira rona tiha buat sira nee, sira nonook deit. No sira foo glória ba Maromak, no dehan, “Entaun Maromak foo mos ba ema Jentiu sira atu arepende hodi hetan moris.”
Igreja iha Antiokia
19Uluk, bainhira Estevão mate, ema haterus sarani sira.#11:19 Haree Apostolu 7:58-8:1. No sira namkari tanba terus nee no baa too rai Fenísia, Xipre no Antiokia. Maibee sira haklaken liafuan ba ema Judeu sira deit. 20Ema sira nee balu hosi Xipre no Sirene. Bainhira sira too iha Antiokia, sira koalia mos ba ema Helen sira no haklaken kona ba Nai Jesus. 21No Nai nia liman mak hamutuk ho sira. Ema barak fiar no fila ba Nai. 22Igreja iha Jerusalém rona kona ba ida nee. Entaun sira haruka Barnabé atu baa too iha Antiokia. 23Bainhira nia too, nia haree Maromak nia grasa. Nia kontenti no foo korajen ba sira hotu atu kontinua ho laran metin ba Nai. 24Tanba Barnabé mak ema diak. Nia nakonu ho Espíritu Santu no fiar. No ema barak tan fiar ba Nai. 25Depois Barnabé baa Tarsu hodi buka Saul. 26Bainhira nia hetan Saul, nia lori Saul ba Antiokia. Sira halibur hamutuk ho igreja nee durante tinan ida tomak no hanorin ema barak. Iha Antiokia mak foin ema komesa bolu eskolante sira Kristaun.
27Iha tempu nebaa, profeta sira tuun mai hosi Jerusalém ba Antiokia. 28No ida naran Agabus foo sai liu hosi Espíritu katak rai hamlaha boot sei akontese iha mundu tomak (ida nee akontese iha Cláudio nia tempu). 29Entaun eskolante sira, tuir ida-idak nia kbiit, desidi atu haruka ajuda ba maun-alin sira nebee hela iha Judeia. 30No sira halo ida nee duni, hodi haruka ajuda ba katuas sira liu hosi Barnabé no Saul nia liman.
Currently Selected:
Apostolu 11: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
