Apostolu 10
10
Pedro No Cornélio
1Iha Sezareia iha mane ida naran Cornélio. Nia mak komandante#10:1 Komandante ba soldadu, naran ‘senturiaun’, nebee xefi ba soldadu nain atus ida. ida ba kompanhia ida naran Batalhaun Itália. 2Nia mak ema loos nebee hamtauk Maromak hamutuk ho ninia uma kain tomak. Nia foo ezmola barak ba povu no sempre halo orasaun ba Maromak. 3Nia haree mo-moos vizaun ida maizoumenus tuku tolu lokraik. Iha vizaun nee, anju ida mai hosi Maromak ba nia, no dehan ba nia, “Cornélio.” 4Bainhira nia haree anju nee nia tauk no dehan, “Saida, Nai?” No anju dehan ba nia, “O nia orasaun no ezmola sira sae nudar buat nebee foo hanoin ba Maromak. 5Entaun agora, haruka ema ba Jope no bolu ema ida naran Simão, nebee ema bolu Pedro. 6Nia hela ho ema ida naran Simão nia uma nebee habai animál kulit. Ninia uma besik tasi.” 7Bainhira anju nebee koalia ba Cornélio sai ona, Cornélio bolu ema nain rua hosi ninia atan sira no soldadu ida nebee ema loos no hein nia. 8Nia konta buat hotu nee ba sira no haruka sira ba Jope.
Pedro Nia Vizaun
9Loron tuir mai, bainhira sira lao dadaun no besik ba sidade, Pedro sae ba uma leten no halo orasaun, maizoumenus iha meiudia. 10Nia sai hamlaha tebes no hakarak haan. Maibee bainhira ema sei prepara hela hahaan, nia sai bilaan ho vizaun ida. 11Nia haree lalehan nakloke, no buat ida hanesan hena luan tuun ba nia, hanesan ema kaer lidun haat hodi hatuun ba rai. 12No animál oi-oin iha hena laran nee, inklui buat nebee dolar iha rai no manu sira iha loro leten. 13No nia rona lian ida nebee dehan, “Pedro, hamriik ona. Oho no haan ba.” 14Maibee Pedro dehan, “La bele, Nai. Tanba hau nunka haan buat ida nebee foer ka la moos.”#10:14 Lei hosi Moisés bandu atu la bele haan animál balu. Haree Levítiku 11, Deuteronómiu 14:3-20 ho dezenhu. 15Lian nee koalia fali ba nia ba dala rua, “Buat nebee Maromak halo moos, keta bolu foer.”#10:15 Liafuan ‘foer’ nee bele iha sentidu katak ‘baibain’. Iha versíkulu 14, 15, 28 no 11:9. Haree mos 21:28. 16Ida nee akontese dala tolu. Depois hena nee sae kedas ba iha lalehan.
17Bainhira Pedro hanoin hela iha ninia fuan laran kona ba vizaun nee katak saida, tebes, ema nebee Cornélio haruka foin husu kona ba Simão nia uma, no sira hamriik iha odamatan. 18Sira bolu no husu kona ba Simão, nebee ema bolu Pedro, katak nia hela iha nebaa ka lae. 19Bainhira Pedro hanoin hela vizaun nee, Espíritu dehan ba nia, “Tebes, ema nain tolu buka o. 20Hamriik no tuun ba kraik. Baa hamutuk ho sira no keta laran ru-rua, tanba Hau mak haruka sira.” 21Pedro tuun ba sira, no nia dehan, “Hau mak ema nebee imi buka. Tanba saa mak imi mai?” 22Sira dehan, “Cornélio, nebee komandante ida, mak mane nebee loos no hamtauk Maromak. Ema Judeu sira nia nasaun tomak koalia diak kona ba nia. Anju santu ida haruka nia atu bolu ita ba ninia uma hodi rona liafuan hosi ita.” 23Entaun Pedro konvida sira tama no hela ho nia. Loron tuir mai, Pedro baa hamutuk ho sira, no maun-alin balu hosi Jope mos akompanha nia. 24Loron tuir mai, sira tama tiha ba Sezareia. No Cornélio hein hela sira. Cornélio halibur hamutuk tiha ona ninia família no belun diak sira iha nebaa. 25Bainhira Pedro tama, Cornélio hasoru nia, no monu iha ninia ain, no adora nia. 26Maibee Pedro foti nia, no dehan, “Hamriik ba. Hau mos ema ida.” 27No bainhira Pedro koalia dadaun ho nia, Pedro tama ba uma laran no haree ema barak halibur hamutuk ona. 28Nia dehan ba sira, “Imi rasik hatene ona katak lei bandu ema Judeu ida atu la bele hasoru malu ka vizita ema ida hosi nasaun seluk. Maibee Maromak hatudu ona hau katak hau la bele bolu ema ida foer ka la moos. 29Nunee bainhira imi bolu hau mai, hau mai kedas no la hanoin ida nee. Entaun hau husu tanba saa mak imi bolu hau?”
30No Cornélio dehan, “Loron haat liu ba, maizoumenus oras hanesan nee, iha tuku tolu lokraik, hau halo orasaun iha hau nia uma. No tebes, ema ida nebee hatais ropa nabilan hamriik iha hau nia oin. 31Ema nee dehan, ‘Cornélio, Maromak rona tiha o nia orasaun no Nia hanoin hetan o nia ezmola. 32Nee duni, haruka ema ba Jope hodi bolu mai Simão, nebee ema bolu Pedro. Nia hela iha Simão nia uma, besik tasi, ema nebee habai animál nia kulit.’ 33Entaun hau haruka kedas ema ba ita. No ita hatudu laran diak atu mai. Nunee agora ami hotu hein iha nee iha Maromak nia oin hodi rona buat hotu nebee Nai haruka ita atu foo sai.”
Ema Jentiu Sira Rona Liafuan Diak
34Entaun Pedro loke ninia ibun, no dehan, “Loos duni, hau haree katak Maromak la hanoin ema ida liu fali ema seluk. 35Maibee Nia simu ema hosi nasaun hotu nebee hamtauk Nia no halo buat nebee loos. 36Maromak haruka evanjelhu ba ema Israel, no haklaken dame liu hosi Jesus Kristu. Jesus mak Nai ba buat hotu. 37Imi hatene ona buat nebee akontese iha rai Judeia tomak, komesa hosi Galileia tuir batizmu nebee João haklaken. 38Maromak fui mina ba Jesus hosi Nazaré ho Espíritu Santu no kbiit. Nia baa iha nebee-nebee hodi halo diak no kura ema hotu nebee diabu halo terus, tanba Maromak hamutuk ho Nia. 39Ami mak sasin ba buat hotu nebee Nia halo iha ema Judeu sira nia rai no iha Jerusalém. No sira oho Nia bainhira sira tara Nia iha ai huun ida.#10:39 Haree Apostolu 5:30 no nota. 40Maromak halo Nia moris hias ona iha loron terseiru. Maromak halo Nia mosu mai, 41laos ba povu hotu, maibee ba ami nebee Maromak hili ona nudar sasin sira. Ami haan hemu ho Nia bainhira Nia moris hias ona hosi mate. 42Nia haruka ami atu haklaken ba povu no foo sasin katak Maromak foti Nia atu sai Juis ba ema moris no ema mate. 43Profeta hotu foo sasin katak ema hotu nebee tau fiar iha Nia sei hetan perdaun ba sala liu hosi Ninia naran.”
Ema Jentiu Sira Simu Espíritu Santu
44Bainhira Pedro koalia dadaun kona ba buat sira nee, Espíritu Santu tuun ba sira hotu nebee rona liafuan nee. 45No fiar nain sira, nebee iha sirkunsizaun no mai ho Pedro, hakfodak tanba Maromak#10:45 Versíkulu nee la dehan ‘Maromak’. fakar mos prezenti Espíritu Santu ba ema Jentiu sira. 46Tanba sira rona ema sira nee koalia ho lian oi-oin no hahii Maromak. Depois Pedro dehan, 47“See mak bandu sira atu la bele simu batizmu ho bee? Tanba sira simu ona Espíritu Santu hanesan ami.” 48No nia haruka sira atu simu batizmu hodi Jesus Kristu nia naran. Depois sira husu nia atu hela loron ruma ho sira.
Currently Selected:
Apostolu 10: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
