Apostolu 9
9
Saul Arepende
1Maibee Saul kontinua ameasa Nai nia eskolante sira no koalia atu oho sira. Nia baa saserdote boot 2no husu surat sira ba sinagoga sira iha Damasku, katak se nia hetan ema hosi Dalan nee, maski mane ka feto, nia bele kesi sira no lori ba Jerusalém. 3Bainhira nia lao iha dalan no nia besik iha Damasku, derepenti naroman hosi lalehan leno haleu nia. 4Nia monu ba rai no rona lian ida nebee dehan ba nia, “Saul, Saul, tanba saa mak o halo terus mai Hau?” 5No nia dehan, “See mak Ita, Nai?” Nai dehan, “Hau mak Jesus nebee o haterus.” 6Nia nakdedar no bilaan, no nia dehan, “Nai, Ita hakarak hau halo saida?” Nai dehan ba nia, “Hamriik ba, no tama iha sidade. Depois o sei hatene saida mak o tenki halo.” 7Ema nebee lao hamutuk ho nia hamriik hela no la bele koalia. Sira rona lian nee maibee sira la haree ema ida. 8Saul hamriik hosi rai. Bainhira nia loke tiha ninia matan nia la bele haree buat ida. Entaun sira kaer nia liman no lori nia tama ba Damasku. 9Ba loron tolu nia la bele haree, no nia la haan ka hemu.
10Iha eskolante ida iha Damasku nebee naran Ananias. Nai koalia ba nia iha vizaun ida, no dehan, “Ananias.” Nia dehan, “Hau mak nee, Nai.” 11Nai dehan ba nia, “Hamriik ba, no tama dalan ida naran Loos. Husu iha Judas nia uma kona ba ema ida naran Saul, hosi Tarsu. Tanba tebes, nia halo hela orasaun. 12Nia haree ona iha vizaun ida ema ida naran Ananias mai no tau ninia liman ba nia, atu nia bele haree fali.” 13Depois Ananias hataan, “Nai, hau rona tiha ona hosi ema barak kona ba mane nee katak nia halo aat barak ba Ita nia santu sira iha Jerusalém. 14No nia iha nee ho kbiit hosi xefi saserdote sira atu kesi ema hotu nebee bolu ba Ita nia naran.” 15Maibee Nai dehan ba nia, “Lao ba, tanba nia mak Hau nia alat nebee Hau hili atu lori Hau nia naran ba ema Jentiu sira, liurai sira no ema Israel sira. 16Tanba Hau sei hatudu ba nia terus hotu nebee nia tenki simu tanba Hau nia naran.” 17Nunee Ananias lao ba, no nia tama ba uma nee. Nia tau ninia liman ba Saul, no dehan, “Maun Saul, Nai Jesus, nebee mosu ba ita iha dalan bainhira ita lao hela, Nia haruka hau atu ita bele haree fali no sai nakonu ho Espíritu Santu.” 18No derepenti buat ruma hanesan ikan nia kulit kiik kiik nee monu hosi Saul nia matan, no nia bele haree fali. Nia hamriik no simu batizmu. 19Bainhira nia simu hahaan, ninia isin forti fali. No Saul hela loron balu ho eskolante sira nebee iha Damasku.
Saul Haklaken Kona Ba Jesus
20Saul haklaken kedas iha sinagoga sira kona ba Kristu, katak Nia mak Maromak nia Oan. 21No ema hotu nebee rona nia hakfodak. Sira dehan, “Laos nia mak ema nebee foo terus ba sira iha Jerusalém nebee bolu ba Naran nee? No laos nia mai iha nee atu halo hanesan, atu kesi sira no lori sira ba xefi saserdote sira?” 22Maibee Saul hetan kbiit liu tan, no nia halo konfuzaun ba ema Judeu sira nebee hela iha Damasku. Tanba nia prova katak Jesus mak Kristu.
Saul Halai Sai Hosi Damasku
23Liu tiha loron barak, ema Judeu sira koalia hamutuk no halo planu atu oho nia. 24Maibee Saul hatene sira nia planu. Sira hein iha portaun loron-kalan atu oho nia. 25Tuir mai, iha kalan, ninia eskolante sira lori nia no hatuun nia iha moru liur liu hosi bote ida.
Saul iha Jerusalém
26Bainhira Saul mai too Jerusalém, nia koko atu halibur hamutuk ho eskolante sira. Maibee sira hotu tauk nia no la fiar katak nia sai eskolante ida. 27Maibee Barnabé foti nia, no lori nia ba apostolu sira. Barnabé konta ba sira oinsaa Saul haree Nai iha dalan, no katak Nai koalia ona ho nia, no oinsaa iha Damasku nia haklaken ho brani hodi Jesus nia naran. 28Entaun nia lao ba-mai hamutuk ho sira iha Jerusalém. No nia haklaken ho aten brani hodi Nai nia naran. 29Nia koalia no diskuti malu ho ema Helen sira. Maibee sira buka atu oho nia. 30Bainhira maun-alin sira nee hatene ida nee, sira lori nia tuun ba Sezareia, no haruka nia baa Tarsu. 31Entaun igreja sira hetan tempu hakmatek iha rai tomak iha Judeia, Galileia no Samaria. Sira sai metin liu tan no lao ho laran nebee hamtauk ba Nai no simu kamaan hosi Espíritu Santu. No sira aumenta ba bei-beik.
Pedro Kura Eneias
32Bainhira Pedro lao ba-mai iha sira hotu nia leet, nia mos tuun ba santu sira nebee hela iha Lida. 33No iha nebaa nia hetan mane ida naran Eneias. Eneias toba deit iha ninia kama too tinan ualu ona, tanba nia ema aleijadu. 34Pedro dehan ba nia, “Eneias, Jesus Kristu kura ona o. Hamriik ba, no aruma o nia kama.” No nia hamriik kedas. 35Ema hotu nebee hela iha Lida no Saron haree nia, no sira hotu fila ba Nai.
Dorcas Moris Hias
36Iha Jope iha eskolante ida naran Tabita, nebee bele tradus ba Dorcas.#9:36 Tabita hosi lian Aramaiku no Dorcas hosi lian Gregu. Liafuan nee katak ‘gazela’ nebee hanesan bibi rusa. Feto nee nakonu ho hahalok diak no karidade. 37Iha tempu nebaa, nia moras, no nia mate. Bainhira sira foo hariis tiha ninia mate isin, sira tau nia iha kuartu iha andar leten. 38Lida besik Jope no eskolante sira rona katak Pedro mak iha nebaa. Nunee sira haruka ema nain rua ba nia, atu husu nia, “Favór ida, mai lai, no keta demora.” 39Entaun Pedro hamriik no baa kedas ho sira. Bainhira nia too, sira lori nia ba kuartu iha andar leten. Feto faluk hotu hamriik hela no tanis. Sira hatudu ropa no tais ba Pedro nebee Dorcas halo bainhira nia hamutuk ho sira. 40Maibee Pedro haruka sira sai ba liur. Depois nia hakneak no halo orasaun. Nia fila oin ba mate isin nee no dehan, “Tabita, hadeer ba.” No Dorcas loke ninia matan. Bainhira Dorcas haree Pedro, nia tuur. 41Pedro kaer ninia liman no ajuda nia hamriik. Depois Pedro bolu santu sira no feto faluk sira, no hatudu ba sira Dorcas nebee moris fali. 42Ema hotu iha Jope tomak hatene kona ba ida nee, no ema barak fiar ba Nai. 43Pedro hela loron barak iha Jope ho ema ida naran Simão nebee habai animál kulit.#9:43 Simão halo servisu kona ba prepara animál kulit hodi uza. Servisu nee inklui hoban kulit iha tasi been no rai mutin nebee kahur ho been no buat seluk tan too ita bele uza animál kulit nee.
Currently Selected:
Apostolu 9: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
