Apostolu 8
8
Saul Hanehan Igreja
1Saul konkorda ho Estevão nia mate nee. Iha loron nebaa, ema hahuu foo terus makaas ba igreja iha Jerusalém. No sarani sira namkari ba distritu hotu iha Judeia no Samaria, só apostolu sira deit mak hela iha Jerusalém. 2No ema nebee hamtauk Maromak#8:2 Ka ‘iha hahalok diak’, ho signifika katak sira kuidadu atu halo diak tuir Maromak nia hakarak. lori Estevão hodi hakoi nia. No sira tanis lelir makaas kona ba nia. 3Saul kria problema barak ba igreja. Nia tama uma ida-idak, rasta sai mane no feto no hatama sira ba komarka.
Filipe Haklaken Iha Samaria
4Nunee sira nebee namkari ba fatin seluk kontinua baa fatin hotu-hotu hodi haklaken evanjelhu. 5Filipe tuun ba sidade Samaria, no haklaken kona ba Kristu ba sira. 6No povu nee, ho laran ida deit, foo atensaun ba buat sira nebee Filipe dehan bainhira sira rona nia no haree milagre sira nebee nia halo. 7Tanba espíritu aat sira hakilar ho lian makaas no sai mai hosi ema barak nebee sira domina. No ema barak nebee isin maten no ain kudeik hetan kura. 8No ema haksolok tebes iha sidade nee.
Matan-dook Simão Fiar
9Maibee iha mane ida iha sidade nee, naran Simão. Uluk nia matan-dook no halo povu iha Samaria admira. Nia dehan katak nia rasik mak ema makaas. 10Ema hotu, hosi kiik too boot, foo atensaun ba nia. Sira dehan, “Mane nee mak kbiit hosi Maromak, nebee hanaran Makaas.” 11Sira foo atensaun ba nia tanba kleur ona nia halo sira admira ho ninia hahalok lulik nian. 12Maibee bainhira sira fiar Filipe nebee haklaken evanjelhu kona ba Maromak nia reinu no Jesus Kristu nia naran, sira simu batizmu, inklui mane no feto sira. 13Simão mos fiar. No bainhira nia simu batizmu, nia lao tuir Filipe. Simão admira kona ba milagre no sinál sira nebee Filipe halo.
14Bainhira apostolu sira iha Jerusalém rona katak Samaria simu Maromak nia liafuan, sira haruka Pedro no João ba sira. 15Pedro no João tuun ba no halo orasaun ba sira, atu sira bele simu Espíritu Santu. 16Tanba Espíritu seidauk tuun ba sira. Sira simu deit batizmu iha Nai Jesus nia naran. 17Pedro no João tau sira nia liman ba ema sira nee, no sira simu Espíritu Santu. 18Bainhira Simão haree katak Espíritu Santu mai ba ema liu hosi apostolu sira nia liman, nia oferese osan. 19No nia dehan, “Foo mos kbiit nee mai hau, atu bainhira hau tau hau nia liman ba see-see deit, sira bele simu Espíritu Santu.” 20Maibee Pedro dehan ba nia, “O nia osan sei lakon ho o, tanba o hanoin katak o bele sosa Maromak nia prezenti ho osan. 21O la iha parte ka fatin iha liafuan nee. Tanba o nia fuan laran la loos iha Maromak nia oin. 22Nunee arepende hosi o nia hahalok aat. Halo orasaun ba Maromak. Karik o nia hanoin iha o nia fuan laran bele hetan perdaun. 23Tanba hau haree katak o iha hanoin moruk,#8:23 Pedro dehan Simão iha kabun been nebee moruk. no hahalok nebee la loos sei kastigu fali o.” 24Simão hataan, “Halo orasaun ba Nai tanba hau, katak buat sira nebee ita koalia la bele kona hau.”
25Bainhira sira foo sai no haklaken Nai nia liafuan, sira fila fali ba Jerusalém. No sira kontinua haklaken evanjelhu iha ema Samaria sira nia aldeia barak.
Filipe No Ema Etiópia
26Nai nia anju koalia ba Filipe, no dehan, “Hamriik ba, no baa diresaun súl nian. Lao tuir dalan nebee tuun hosi Jerusalém ba Gaza, nebee iha rai fuik maran.” 27Filipe hamriik no baa. No tebes, iha mane ida hosi Etiópia, nebee funsionáriu ida.#8:27 Ema nebee kapa ona hodi serví liurai feto. Nia mak nai ulun ida hosi Kandase, liurai feto hosi ema Etiópia sira. Ema nee toma konta ba liurai feto nia riku-soin hotu. Foin dadauk, nia mai too Jerusalém hodi adora, 28no nia fila fali ba. Nia tuur iha ninia kuda kareta no lee hela surat profeta Isaias nian. 29Depois Espíritu dehan ba Filipe, “Hakbesik no lao hamutuk ho kuda kareta nee.” 30Entaun Filipe halai ba nia, no rona nia lee hela surat profeta Isaias nian. Filipe dehan, “Ita kompriende buat nebee ita lee ka lae?” 31Nia dehan, “Oinsaa mak hau bele kompriende, se la iha ema ida atu esplika mai hau?” No nia konvida Filipe atu sae no tuur ho nia. 32Nia lee iha fatin ida hosi eskritura nebee dehan,
“Hanesan bibi malae nebee ema lori atu oho,
no hanesan bibi malae oan nebee nonook bainhira ema tesi nia fulun,
nia la loke ninia ibun.
33Ema hamoe nia no la foo justisa ba nia,
see mak bele konta kona ba ninia oan sira?
Tanba ema hasai ninia moris hosi mundu.”#8:32-33 Hosi Isaias 53:7-8.
34Funsionáriu nee dehan ba Filipe, “Hau husu ita, profeta nee koalia kona ba see? Kona ba ninia aan rasik ka kona ba ema seluk?” 35Depois Filipe loke ninia ibun, no hahuu hosi eskritura nee, nia foo sai evanjelhu kona ba Jesus ba ema Etiópia nee. 36No bainhira sira baa dadaun iha dalan, sira mai too bee lihun ida. Funsionáriu nee dehan, “Haree took bee iha nee! Saida mak hapara hau atu simu batizmu?”#8:36 Manuskritu balu aumenta versíkulu 37, ‘Filipe dehan, “Se ita fiar ho ita nia fuan laran tomak, ita bele.” Nia hataan, “Hau fiar katak Jesus Kristu mak Maromak nia Oan.”’ 38Funsionáriu haruka ema para kuda kareta. No sira nain rua tuun ba bee, Filipe no funsionáriu, no Filipe foo batizmu ba nia. 39Bainhira sira sai hosi bee laran, Nai nia Espíritu lori sai Filipe. Funsionáriu nee la haree tan Filipe. No funsionáriu nee kontinua ninia viajen ho haksolok. 40Maibee Filipe mosu iha Azotus. No bainhira nia lao liu, nia haklaken evanjelhu iha sidade hotu too nia mai iha Sezareia.
Currently Selected:
Apostolu 8: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
