Apostolu 25
25
Paulo Husu Atu Baa Cesar
1Bainhira Festo tama distritu nee, no liu tiha loron tolu, nia sae hosi Sezareia ba Jerusalém. 2Depois saserdote boot no ema Judeu nia xefi sira foo hatene ba nia kona ba sira nia kazu hasoru Paulo. Sira husu nia 3atu halo favór ida no haruka Paulo mai Jerusalém. Tanba sira iha planu atu halo emboskada iha dalan hodi oho Paulo. 4Maibee Festo hataan katak Paulo tenki hein iha Sezareia no nia rasik besik atu fila fali ba nebaa. 5Nia dehan, “Husik ema nebee iha kbiit iha imi nia leet tuun mai ho hau, no se iha buat ruma hasoru mane nee, imi bele akuza nia.”
6Bainhira Festo hela hamutuk ho sira too loron ualu ka sanulu tan, nia tuun ba Sezareia. Loron tuir mai nia tuur iha kadeira tesi lia nian no haruka ema lori Paulo mai. 7Bainhira Paulo mai ona, ema Judeu sira nebee tuun mai hosi Jerusalém hamriik haleu nia, no sira foo sala barak no todan hasoru Paulo. Maibee sira la bele prova buat sira nee. 8Paulo defende aan no dehan, “Hau la halo sala hasoru ema Judeu sira nia lei, ka hasoru Templu, ka hasoru César.” 9Maibee Festo hakarak halo favór ida ba ema Judeu sira. Entaun nia dehan ba Paulo, “O bele sae ba Jerusalém ka? Nunee hau bele tesi lia ba o kona ba buat sira nee.” 10Paulo dehan, “Hau hamriik dadaun iha César nia kadeira tesi lia nia oin. Tuir lo-loos ita boot tenki tesi lia mai hau iha nee. Hau la halo sala ida hasoru ema Judeu sira. No ita boot hatene lo-loos ida nee. 11Se karik hau mak sala nain, no merese atu simu kastigu mate, hau la buka atu hasai aan hosi kastigu mate nee. Maibee se karik la iha buat ida atu prova sira nia kazu hasoru hau, entaun la iha ema ida nebee bele entrega hau ba sira. Hau husu atu baa César.” 12Festo konsulta ho ninia tribunál depois nia hataan, “O husu atu baa César. Entaun ba César o sei baa.”
Paulo Iha Agripa No Berenice Nia Oin
13Liu tiha loron balu, liurai Agripa no Berenice mai iha Sezareia atu vizita Festo. 14Bainhira sira hela iha nebaa too loron barak ona, Festo foo hatene ba liurai kona ba Paulo nia kazu. Nia dehan, “Iha mane ida nebee Felix husik iha komarka. 15Bainhira hau baa Jerusalém, xefi saserdote no ema Judeu nia katuas sira foo sai sira nia kazu hasoru ema nee. No sira hakarak hau tesi lia atu kondena nia. 16Hau hataan ba sira katak tuir Roma nia kostumi ami la entrega ema atu simu kastigu molok ema nee bele hasoru ninia akuzadór sira oin ho oin. Ema bele foo sala ba nia, depois nia tenki iha oportunidade atu defende aan. 17Nunee bainhira sira too mai, hau la demora tan no loron tuir mai hau tuur iha kadeira tesi lia nian no haruka ema lori mane nee mai. 18Bainhira akuzadór sira nee hamriik, sira la foo sala ida nebee hau hanoin sira atu foo. 19Maibee sira iha asuntu ruma hasoru nia kona ba sira nia relijiaun, no kona ba ema ida naran Jesus, nebee mate ona, no Paulo dehan katak Nia moris hela. 20No tanba hau la hatene oinsaa atu investiga pergunta sira nee, hau husu nia se nia hakarak baa Jerusalém hodi hau bele tesi lia ba nia kona ba asuntu sira nee. 21Maibee bainhira Paulo husu atu hein desizaun hosi liurai boot, hau haruka ema lori nia ba komarka too hau bele haruka nia ba César.” 22Depois Agripa dehan ba Festo, “Hau mos hakarak rona mane nee.” Festo dehan, “Aban, ita boot sei rona nia.”
23Loron tuir mai, Agripa no Berenice mai ho serimonia boot. Sira tama tribunál hamutuk ho komandante boot sira no ema boot sira hosi sidade nee. Depois Festo haruka ema lori Paulo mai. 24Festo dehan, “Liurai Agripa, no ema hotu nebee marka prezensa iha nee ho ami. Imi haree mane nee, nebee ema Judea sira hotu husu mai hau iha Jerusalém, no mos iha nee, no hakilar katak nia la bele moris tan. 25Maibee bainhira hau haree katak nia la halo buat ida nebee merese atu simu kastigu mate, no katak nia rasik husu atu baa liurai boot, hau desidi atu haruka nia baa. 26Maibee hau la iha buat ida nebee metin atu hakerek ba hau nia nai kona ba nia. Tanba nee mak hau lori nia mai iha imi nia oin, liu-liu ba ita boot, liurai Agripa, atu nunee, bainhira ita buka hatene di-diak tiha, hau bele iha buat ruma atu hakerek. 27Tanba hau hanoin laduun diak atu haruka ema dadur ida no la hakerek sala nebee ema akuza hasoru nia.”
Currently Selected:
Apostolu 25: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
