Exodu 12

Loron Páskua

1 Nai koalia ho Moisés no Arão iha rai Ejitu, no Nia hatete, 2“Fulan ida nee bele hahuu tempu foun ba imi. Fulan nee sei sai fulan primeiru iha imi nia tinan. 3Hatete ba ema Israel tomak katak iha loron sanulu iha fulan nee, mane ida-idak tenki foti bibi oan ida hodi haan hamutuk ho família hotu: bibi ida ba uma ida. 4Se membru família uma kain nee mak ema uitoan liu atu la bele haan hotu bibi malae nee, mak família nee bele konvida tan vizinhu sira, tuir ema nebee iha, hodi haan bibi malae. Bibi malae nee tenki fahe tuir ema sira nebee mak haan. 5Imi bele hili bibi malae ka bibi timor, maibee tenki bibi aman, idade tinan ida, no la iha buat aat ida. 6Imi tenki rai bibi malae nee too loron sanulu resin haat. Iha lokraik, ema Israel tomak iha sorumutu nee tenki oho bibi oan nee. 7Depois bibi nia raan balu kose ba odamatan nia arus iha sorin-sorin nee no kose mos ba arus iha odamatan leten. Halo ida nee iha uma fatin nebee ema atu haan bibi. 8Iha kalan nee mos nia naan tenki tunu ho ahi no sira tenki haan ho paun nebee la kahur fermentu no ho modo moruk. 9Haan naan tunu nee, keta haan naan matak ka naan daan. bibi oan nee tenki tunu tomak ho ninia ulun, nia ain no kabun laran sira hotu. 10Keta rai naan uitoan too dadeer-saan. Se karik iha naan restu iha dadeer, imi tenki sunu. 11Bainhira imi haan, imi tenki hatais hodi halo viajen. Tau sandálias iha ain no kaer ai-tonka. Imi tenki haan lalais. Ida nee mak Nai nia Páskua. 12Tanba iha kalan nee, Hau sei lao liu rai Ejitu laran tomak, hodi oho oan mane boot hotu-hotu iha Ejitu, inklui ema no animál sira. Hau sei kontra ema Ejitu nia maromak sira. Hau sei tesi lia hasoru sira: Hau mak Nai. 13Raan nee sei sai sinál ida ba uma nebee imi hela. Bainhira Hau haree raan nee, Hau sei lao liu imi. Nunee imi sei la hetan kastigu nebee bele halakon imi bainhira Hau baku rai Ejitu.

Selebra Paun La Iha Fermentu

14Loron nee sei sai istória nebee imi sei hanoin hetan. Imi tenki selebra nudar loron boot ba Nai. Imi ho imi nia jerasaun sira tenki selebra loron boot nee too tinan ba tinan. 15Nai hatete: durante loron hitu, imi keta haan paun nebee iha fermentu. Iha loron primeiru, imi tenki hasai fermentu hotu hosi imi nia uma. Se karik ema ruma haan paun nebee iha fermentu iha loron hitu nia laran nee, entaun ema nee sei lakon tiha hosi Israel. 16Iha loron primeiru, imi sei halo sorumutu santu. No mos iha loron hitu, imi sei halo sorumutu santu. Iha loron nee imi keta halo servisu ida, só deit hodi prepara hahaan. 17Imi sei kontinua nafatin selebra Festa Paun Fermentu Laek#12:17 Loron boot nebee sira haan paun nebee la iha fermentu iha tempu Páskua. Haree Deuteronómiu 16:16. tanba iha loron nee mak Hau lori imi nia forsa sira sai hosi rai Ejitu. Tanba nee, tinan-tinan imi tenki kontinua nafatin selebra loron nee, nebee loron boot, too tinan ba tinan. 18Iha fulan primeiru, iha loron sanulu resin haat iha fulan nee, iha lokraik, imi sei haan paun nebee la kahur fermentu too loron rua-nulu resin ida iha fulan nee, iha lokraik fali. 19Durante loron hitu nia laran keta iha fermentu iha imi nia uma. Tanba se iha ema ruma nebee haan paun nebee iha fermentu, ema nee sei lakon hosi povu Israel. Kastigu nee inklui ema hosi rai liur no ema Israel. 20Hahaan ruma nebee iha fermentu imi keta haan. Imi haan deit paun nebee la kahur fermentu iha imi nia hela fatin hotu.

Páskua Primeiru

21Moisés bolu Israel nia lideransa sira hotu no dehan ba sira, “Família Israel ida-idak tenki hili bibi ida no oho hodi selebra loron Páskua. 22Depois imi tenki foti ai isope#12:22 Ai isope mak ai badak hosi ai horis nia grupu nebee hanesan ho ortelaun. Ai isope nee iha iis morin no haan moruk. Sira uza hodi hoban iha bee santu ka raan no hisik buat ruma iha seremónia. atu tau ba bibi nia raan nebee iha basia. No kose raan nee ba odamatan nia arus leten no arus sorin-sorin. Keta husik ema ida atu sai hosi ninia uma too dadeer-saan.

23Bainhira Nai lao iha rai Ejitu hodi oho ema Ejitu sira, Nia sei haree raan iha arus leten no arus sorin-sorin nee. Nunee Nia sei lao liu deit no Nai sei la foo lisensa ba Estragadór#12:23 Anju nebee hamate ema. atu tama ba imi nia uma hodi oho imi. 24Imi no imi nia jerasaun sira tenki halo tuir orden nee too tinan ba tinan. 25Liu tiha tempu nee, bainhira imi tama ba rai nebee Nai foo ba imi, tuir Ninia promesa nebee Nia foo ona, imi sei kontinua halao nafatin serimónia ida nee. 26Bainhira imi nia oan sira husu, ‘Serimónia ida nee signifika saida?’ 27Imi sei hataan, ‘Ida nee mak Nai nia sakrifísiu Páskua. Tanba Nia lao liu deit ema Israel sira nia uma iha rai Ejitu, iha tempu nebee Nia oho ema Ejitu sira, no Nia salva ita nia família sira.’” Nunee povu nee hakruuk no adora. 28Depois sira baa no halo tuir saida mak Nai hatete ba Moisés no Arão; sira halo ba.

Praga Sanulu: Oan Boot Mate

29Tuir mai, iha kalan boot, Nai oho ema sira nia oan boot hotu iha rai Ejitu, komesa hosi Faraó nia oan, nebee sei tuur iha kadunan, too ema dadur sira nia oan, nebee sei iha komarka. No Nia oho mos animál sira hotu nebee moris primeiru. 30Iha kalan nee, Faraó ho nia atan sira no ema Ejitu hotu hadeer. Iha rai Ejitu tomak ema tanis no halerik makaas tanba iha uma ida-idak iha ema ida nebee mate. 31Iha kalan nee kedas, liurai haruka ema bolu Moisés ho Arão no hatete ba sira, “Imi sai ona hosi hau nia povu, imi ho ema Israel sira hotu! Baa, serví Nai imi nia Maromak tuir buat nebee imi husu ona. 32Lori imi nia karau no bibi sira hotu, hanesan imi husu, no baa ona! No foo bensaun mai hau mos!”

33Ema Ejitu husu ba ema Israel atu sai lalais hosi sira nia rai. Sira hatete, “Ami hotu atu mate!” 34Depois ema Israel sira foti masa paun nebee la kahur fermentu no tau iha basia, no sira falun iha hena no tau ba kabaas. 35Ema Israel sira halo tuir buat nebee Moisés hatete. Nunee sira husu ba ema Ejitu sira atu foo sira nia kelu no korenti sira nebee osan mutin no osan mean, no sira husu mos ropa. 36Nai halo ema Ejitu sira hatudu grasa ba ema Israel sira. Nunee saida mak ema Israel husu, sira foo deit. Nunee ema Israel sira hadau ema Ejitu sira nia riku-soin.

Ema Israel Husik Rai Ejitu

37Ema Israel sira lao sai hosi sidade Ramesés too iha Sukote. Sira maizoumenus mane nain rihun atus neen (600.000) nebee lao ho ain, feto ho labarik la konta. 38Ema barak nebee estranjeiru oi-oin tuir sira mos. Sira lori karau, bibi malae no bibi barak tebe-tebes. 39Ema Israel sira tunu paun nebee la kahur fermentu hosi trigu masa nebee sira lori hosi Ejitu. Paun nee fermentu la iha. Ema Ejitu sira duni sira hosi nebaa derepenti deit. Nunee sira la iha tempu hodi prepara bukae.

40Entaun povu Israel nebee hela iha Ejitu, sira lao ba-mai ona too tinan atus haat tolu-nulu (430). 41Liu tiha tinan atus haat tolu-nulu (430), too iha loron hanesan, Nai nia povu iha suku hotu-hotu sai hosi Ejitu. 42Iha kalan nee, Nai kuidadu sira di-diak hodi lori sira sai hosi Ejitu. Entaun kalan nee mos sai kalan nebee ema Israel foo ba Nai nudar kalan nebee ema Israel tenki komemora nafatin iha sira nia jerasaun hotu.

Lei Kona Ba Selebra Páskua

43 Nai hatete ba Moisés no Arão dehan, “Lei Páskua nian mak nee: ema hosi rai liur keta haan ida nee. 44Maibee atan nebee imi sosa ho osan bele haan, se nia hetan sirkunsizaun ona. 45Ema hosi rai liur no ema nebee servisu ba imi keta haan. 46Naan bibi nee tenki haan hotu iha uma laran. Keta lori sai ba liur. Keta halo tohar bibi nia ruin ida. 47Ema Israel hotu-hotu tenki selebra ida nee. 48Se ema rai liur ruma nebee hela ona ho imi hakarak selebra Festa Páskua ba Nai, mane hotu-hotu iha ninia família tenki hetan sirkunsizaun hodi nia bele hakbesik no tuir festa nee. Bele haree sira nudar rai nain. Ema nebee la hetan sirkunsizaun keta haan ida nee. 49Lei nee hanesan mos ba rai nain hosi Israel no ba ema rai liur nebee hela iha imi nia leet.”

50Ema Israel hotu-hotu halo tuir orden hotu nebee Nai foo ba Moisés no Arão. 51Iha loron nee kedas, Nai lori ema Israel hotu sai hosi rai Ejitu tuir sira nia forsa sira.

Currently Selected:

Exodu 12: BK

Highlight

Copy

Compare