Exodu 13

Loron Boot: Paun Nebee La Iha Fermentu

1 Nai dehan ba Moisés, 2“Halo santu ba Hau oan primeiru hotu, ema Israel hotu nebee loke oan fatin ba dala ida, ema no animál. Sira mak Hau nian.”

3Depois Moisés hatete ba sira, “Hanoin hetan loron ohin, tanba iha loron nee imi sai hosi Ejitu, hosi fatin nebee imi mak atan. Nai lori imi sai hosi nebaa ho liman forti. Nunee keta haan paun nebee iha fermentu. 4Loron ohin, nebee iha fulan Abib, mak loron nebee imi sai. 5Bainhira Nai lori imi baa too iha rai Kanaan, nebee ema Hiti, ema Amoreu, ema Heveu no ema Jebuseu nia rai, nebee Nia promete tiha ona ba imi nia bei-ala sira atu foo ba imi, rai nebee nakonu ho susu been no bani been, nunee imi tenki serví Nia iha fulan ida nee. 6Haan paun nebee la kahur fermentu durante loron hitu. No loron ba dala hitu sei sai loron festa nian ba Nai. 7Paun nebee la iha fermentu nee imi tenki haan durante loron hitu. Imi keta haree buat foer ruma iha imi nia hela fatin hotu. 8Iha loron nee, imi tenki foo hatene ba imi nia oan mane sira, ‘Ita halo hanesan nee tanba buat nebee uluk Nai halo ba ita iha tempu nebee ita sai hosi Ejitu.’ 9Ida nee sei sai sinál iha imi nia liman no hodi imi hanoin nafatin iha imi nia ulun, nunee lei Nai nian sei iha imi nia ibun. Tanba Nai lori ita sai hosi Ejitu ho liman forti. 10Tinan-tinan imi tenki halo tuir lei nee tuir ninia tempu.

Estatutu Kona Ba Oan Primeiru

11Bainhira Nai lori ona imi too iha ema Kanaan nia rai, hanesan Nia jura ona ba imi no imi nia bei-ala sira, rai nebee Nia sei foo duni ba imi, 12nunee imi tenki foo ba Nai buat hotu nebee loke oan fatin ba dala ida, no animál hotu nebee moris uluk. Imi tenki foo animál aman primeiru nee ba Nai. 13Kuda buru nebee moris uluk imi tenki hola fali#13:13 Ebreu pawdaw, nebee iha sentidu katak ita selu buat ruma hodi hetan fali ka salva fali buat nebee lakon. Haree mos kultura iha Rut 3-4. ho bibi ida. Se karik imi lakohi selu nee imi tenki halo tohar ninia kakorok. Maibee kona ba ema, imi nia oan mane primeiru imi tenki selu duni. 14No bainhira imi nia oan husu ba imi iha loron tuir mai, ‘Ida nee signifika saida?’ Imi tenki hataan ba sira hanesan nee, ‘Nai lori ita sai hosi Ejitu ho liman forti. 15Bainhira Faraó ho fuan toos lakohi husik ami baa, nunee Nai oho oan primeiru hotu iha rai Ejitu, hosi ema nia oan primeiru too animál nia oan primeiru. Tanba nee hau halo sakrifísiu ba Nai ho buat hotu nebee loke oan fatin ba dala ida, nebee animál aman. Maibee hau nia oan mane primeiru hotu nee, hau tenki hola fali.’ 16Ida nee sei sai sinál iha imi nia liman no sai símbolu iha imi nia reen toos.#13:16 Tuir mai, iha Jesus nia tempu no too agora mos, sira halo ida nee. Haree Mateus 23:5 no dezenhu. Tanba Nai lori ita sai hosi Ejitu ho liman forti.”

Riin kalohan No Ahi

17Bainhira Faraó husik povu nee baa ona, Maromak la husik sira atu lao liu hosi ema Filisteu sira nia dalan, maski dalan nee besik liu. Tanba Maromak dehan, “Keta halo be sira arepende bainhira sira hasoru funu, no sira fila fali baa Ejitu.” 18Maibee Maromak lori sira lao liu hosi dalan ba rai fuik, nebee liu hosi Tasi Teberau. No ema Israel sira prontu atu hasoru funu iha dalan bainhira sira sai hosi Ejitu. 19Moisés lori José nia ruin. Tanba José haruka ema Israel nia oan sira jura, “Maromak sei mai vizita imi, nunee imi tenki lori hau nia ruin hosi nee mos.” 20Nunee sira sai hosi Sukote no halo akampamentu iha Etam, iha rai fuik nia ninin. 21Nai lao iha sira nia oin. Iha tempu loron, riin kalohan hatudu dalan ba sira, no iha kalan, riin ahi foo naroman ba sira. Nunee sira bele lao loron no kalan. 22Riin kalohan iha loron no riin ahi iha kalan la sai hosi povu nia oin.

Currently Selected:

Exodu 13: BK

Highlight

Copy

Compare