Exodu 14

Faraó Duni Povu Israel

1 Nai koalia ho Moisés, no Nia dehan, 2“Haruka ema Israel atu fila ba Pi-Hairote, entre Migdol no tasi, iha Baal-Zefon nia oin, nebee iha tasi ninin. 3Nunee Faraó sei koalia kona ba ema Israel, ‘Sira lao dalan sala ona iha rai ida nee. Rai fuik halo sira lao sala ona.’ 4Hau sei halo Faraó nia fuan toos no nia sei duni sira. No Hau sei hatudu Hau Nia glória ba Faraó no nia forsa tomak. Nunee ema Ejitu sei hatene katak Hau mak Nai.” Depois sira halo hanesan nee.

5Bainhira ema foo hatene ba liurai Ejitu katak povu Israel halai tiha ona, nunee liurai Faraó no ninia atan sira troka hanoin kona ba nasaun nee. Sira dehan, “Saida mak ami halo tiha hodi husik ema Israel baa ona hodi la serví tan ami?” 6Depois nia komesa prepara nia kuda kareta no lori nia povu sira hamutuk ho nia. 7Nia lori kuda kareta atus neen (600) nebee diak, no kuda kareta hotu iha Ejitu, ida-idak ho nia komandante rasik. 8Nunee Nai halo liurai Faraó nia fuan toos no sira duni ema Israel sira. Maibee ema Israel sira lao nafatin ho aten brani. 9Ema Ejitu duni sira, Faraó nia kuda no kuda kareta, no nia ema nebee sae kuda no ninia forsa militár. Ema Ejitu sira duni ema Israel sira no toman sira iha tasi ninin, besik Pi-Hairote, iha Baal-Zefon nia oin.

10Bainhira Faraó besik ona, ema Israel haree hetan ema Ejitu sira. Tebes duni, ema Ejitu sira komesa tuir sira. Ema Israel sira tauk tebe-tebes no bolu ba Nai. 11Sira hatete ba Moisés, “La iha rate iha Ejitu ka? Tanba nee ita lori ami mai hodi mate iha rai fuik nee? Tanba saa mak ita halo hanesan nee mai ami no lori ami sai hosi Ejitu? 12Ami hatete tiha ona ba ita iha Ejitu, ‘Husik ami serví ba ema Ejitu sira. Diak liu ami serví ba ema Ejitu sira duké mate iha rai fuik.’” 13Maibee Moisés hatete ba povu nee, “Keta tauk, hamriik metin no haree salvasaun nebee mai hosi Nai, nebee Nia sei halo ba imi ohin loron. Imi sei nunka haree fali ema Ejitu sira nee. 14Nai rasik sei funu iha imi nia fatin, no imi sei nonook deit.”

Hakur Tasi Teberau

15 Nai dehan ba Moisés, “Tanba saa mak o bolu ba Hau? Haruka ema Israel atu lao ba oin. 16No foti o nia ai tonka no lolo ai tonka ba tasi hodi fera tasi nee. Nunee ema Israel sira bele lao liu hosi tasi nee nia klaran iha rai maran. 17Maibee tebes, Hau sei halo ema Ejitu sira nia fuan toos. Nunee sira sei lao tuir ema Israel sira. No Hau sei hatudu Hau nia glória ba Faraó no nia forsa tomak, ninia kuda kareta no ninia ema sira nebee sae kuda. 18Nunee ema Ejitu sira sei hatene katak Hau mak Nai, bainhira Hau hatudu Hau nia glória ba Faraó, ninia kuda kareta, no ninia ema sira nebee sae kuda.”

19Depois anju Maromak nian, nebee lao iha akampamentu Israel sira nia oin, muda fali ba sira nia kotuk. Riin kalohan nee muda hosi sira nia oin no hamriik iha sira nia kotuk. 20Nunee riin kalohan nee hamriik iha klaran ho ema Ejitu nia akampamentu iha sorin ida no ema Israel nia akampamentu iha sorin seluk. Nunee sira iha kalohan no nakukun. No iha kalan, kalohan sai naroman. Nunee sira la bele besik ba malu durante kalan tomak.

21Depois Moisés lolo nia liman ba tasi. No iha kalan nee, Nai halo tasi nee fila fali ba ho anin lorosae. Anin nee huu makaas durante kalan tomak no halo tasi sai maran. Nunee tasi nee fahe ba rua.

22No ema Israel sira lao liu hosi tasi nia klaran nebee maran. Tasi sai hanesan moru iha sira nia liman loos no liman karuk. 23Depois ema Ejitu sira duni tuir sira. Faraó nia kuda hotu no nia kuda kareta no nia ema sira nebee sae kuda tama too iha tasi klaran. 24Iha dadeer-saan, Nai nebee iha riin ahi no riin kalohan haree ema Ejitu sira, no halo konfuzaun ba forsa Ejitu. 25Nia halo kareta nia roda komesa belit hodi lao ba oin susar. Nunee ema Ejitu sira dehan, “Mai ita halai tiha hosi ema Israel sira. Tanba Nai mak funu iha sira nia fatin hasoru ema Ejitu.”

26 Nai dehan ba Moisés, “Lolo o nia liman ba tasi, nunee tasi sei fila no taka ema Ejitu, taka sira nia kuda kareta no ema sira nebee sae kuda.” 27Nunee Moisés lolo nia liman ba tasi no, iha dadeer-saan, tasi fila fali ba ninia fatin. Ema Ejitu sira halai hasoru tasi nee, no Nai halakon ema Ejitu sira iha tasi klaran. 28Tasi nee fila fali, no taka kuda kareta no ema sira nebee sae kuda kareta, no Faraó nia forsa tomak, nebee tuir ema Israel sira ba tasi. La iha ema ida hosi sira nebee sei moris. 29Maibee ema Israel sira lao iha rai maran iha tasi klaran, no tasi nee hanesan moru iha sira nia liman loos no liman karuk.

30Nunee iha loron nebaa, Nai salva ema Israel sira hosi ema Ejitu sira nia liman. No ema Israel sira haree ema Ejitu sira nia mate isin namkari iha tasi ibun. 31Bainhira ema Israel sira haree buat nebee Nai halo ho forsa makaas ba ema Ejitu sira, nunee povu nee hamtauk ba Nai no sira fiar ba Nai no Moisés, Ninia atan nee.

Currently Selected:

Exodu 14: BK

Highlight

Copy

Compare