Exodu 15

Hananu Hosi Moisés

1Depois Moisés hamutuk ho povu Israel kanta knananuk ida nee ba Nai, hanesan nee,

“Hau sei kanta ba Nai, tanba Nia aas liu,

kuda no ema nebee sae kuda Nia soe ona ba tasi laran.

2 Nai mak hau nia forsa no hau nia kanta,

Nia sai ona hau nia salvasaun.

Nia mak hau nia Maromak, no hau sei hahii Nia,

Nia mak hau nia aman nia Maromak, no hau sei gaba Nia.

3 Nai mak hau nia funu nain;

Nai, ida nee mak Ninia naran.

4Faraó nia kuda kareta no nia forsa,

Nia soe Faraó nia komandante diak sira ba Tasi Teberau.

5Tasi klean taka sira;

sira mout ba tasi okos hanesan fatuk.

6O nia liman loos, Oh Nai, iha kbiit nebee iha glória,

O Nia liman loos, Oh Nai, harahun inimigu sira nee.

7Iha O nia majestade nebee boot, O harahun sira nebee hamriik hodi kontra O;

O haruka O nia hirus manas nebee haan sira hanesan ahi haan hare kain.

8Ho iis nebee huu makaas hosi O nia inus, bee nee halibur hamutuk,

bee suli nee hamriik hanesan bou ida;

no bee nee sai maran iha tasi laran.

9Inimigu sira dehan, “Hau sei duni, hau sei toman,

hau sei fahe riku-soin; hau sei hadau buat hotu nebee hau hakarak,

hau sei losu hau nia surik, hau nia liman sei estraga sira!”

10O huu ho O nia anin, no tasi taka tiha sira;

sira mout hanesan makdadi iha tasi boot.

11See mak hanesan O, Oh Nai, iha maromak sira nia leet?

See mak hanesan O, nebee santu ho majestade,

no halo ema tauk ho hahalok boot no milagre sira?

12O lolo O nia liman loos;

no mundu tolan sira.

13Ho O nia domin metin O lori O nia povu nebee O hola fali ona;

ho O Nia forsa O hatudu dalan ba sira baa O nia Fatin Santu.

14Povu sei rona no sai tauk,

no terus sei kaer ema sira iha rai Filisteu.

15Depois xefi sira iha Edom sei hakfodak,

no ema sira iha Moab sei nakdedar;

no povu hotu iha rai Kanaan sei nabeen too lakon.

16Sira sai tauk no hakfodak,

tanba O nia liman nakonu ho podér, sira sai toos hanesan fatuk,

too O nia povu lao liu tiha, Oh Nai,

too O nia povu nebee O hola ona nee sei lao liu.

17O sei lori sira tama ba, no O sei kuda sira iha foho ida nebee O nian;

iha fatin nebee O halo tiha O nia hela fatin, Oh Nai;

fatin santu, Oh Nai, nebee O nia liman rasik mak harii.

18 Nai sei ukun too tinan ba tinan.”

19Tanba Faraó nia kuda, ninia kuda kareta no ema sira nebee sae kuda tama ba tasi. No Nai halo tasi nee fila no taka sira hotu. Maibee ema Israel sira lao iha fatin maran iha tasi klaran. 20Depois Miriam, profetiza nee, nebee Arão nia alin feto, foti tamborin ida iha nia liman no feto hotu tuir nia. Sira baku tamborin no dansa. 21No Miriam diriji sira,

“Hananu ba Nai, tanba Nia aas liu,

kuda no ema nebee sae kuda Nia soe ona ba tasi laran.”

Iha Mara No Elim

22Moisés haruka ema Israel sira lao hosi Tasi Teberau. Sira lao iha rai fuik naran Sur. Durante loron tolu nia laran sira lao iha rai fuik no la hetan bee. 23Sira baa too iha Mara. Maibee sira la bele hemu bee iha Mara tanba bee nee moruk. Tanba nee ema iha rai nee foo naran Mara.#15:23 Mara katak ‘moruk’. 24Nunee sira murmura ba Moisés dehan, “Ami atu hemu saida?” 25Moisés bolu ba Nai, no Nai hatudu ai rohan ida ba nia. Moisés soe ai nee ba bee laran no bee nee sai midar. Iha nebaa Nai foo estatutu ida ba sira no regulamentu ida ba sira no iha nebaa Nai koko sira. 26Nia dehan, “Se imi rona di-diak ba Nai, imi nia Maromak, nia lian, no halo buat nebee loos iha Nia oin, no see imi nia tilun hodi rona Ninia ukun fuan sira no halo tuir Ninia estatutu hotu nee, nunee Hau sei la foo kastigu moras atu kona imi hanesan moras sira nebee Hau foo ona ba ema Ejitu sira. Tanba Hau mak Nai nebee kura imi.”

27Liu tiha nee, sira too iha Elim. Iha nebaa iha bee matan sanulu resin rua no ai kadiru huun hitu-nulu. Depois sira halo akampamentu iha nebaa besik bee ninin.

Currently Selected:

Exodu 15: BK

Highlight

Copy

Compare