Exodu 16
16
Maná Hosi Lalehan
1Bainhira sira sai ona hosi Elim, ema Israel hotu baa too iha rai fuik Sin. Rai Sin nee iha Elim no foho Sinai nia klaran. Sira too iha nebaa iha loron sanulu resin lima, iha fulan segundu, nebee sura hosi loron nebee sira sai hosi Ejitu. 2Iha rai fuik nee, ema Israel hotu murmura hasoru Moisés no Arão. 3Ema Israel dehan ba sira, “Diak liu ami mate iha Ejitu liu hosi Nai nia liman. Tanba iha nebaa ami tuur iha sanan sorin nebee nakonu ho naan, no ami haan paun too bosu! Tanba imi lori ami mai rai fuik nee atu oho ami hotu tanba hamlaha.”
4Depois Nai dehan ba Moisés, “Tebes, Hau atu haraik paun hosi lalehan ba imi. Povu nee sei sai ba no halibur paun natoon ba loro-loron. Nunee Hau bele koko sira, hodi haree sira lao tuir Hau nia lei ka lae. 5Depois, iha loron neen, bainhira sira prepara buat nebee sira lori ba sira nia tenda, sira tenki aumenta, no prepara loron rua nian.” 6Depois Moisés no Arão hatete ba ema Israel hotu, “Orsida lokraik, imi sei hatene katak Nai lori tiha ona imi sai hosi rai Ejitu. 7No aban dadeer imi sei haree Nai nia glória, tanba Nia rona ona imi nia murmura nebee hasoru Nia. Tanba ami rasik nee mak see, hodi nunee imi murmura hasoru ami?” 8Moisés dehan tan, “Bainhira Nai foo imi haan naan iha tempu lokraik no haan paun too bosu iha tempu dadeer, tanba Nai rona ona imi nia murmura hasoru Nia - nunee, ami nee saida? Imi laos murmura hasoru ami, maibee hasoru Nai.”
9Moisés dehan ba Arão, “Hatete ba ema Israel hotu: Mai hakbesik ba Nai, tanba Nia rona ona imi nia murmura hasoru Nia.” 10Bainhira Arão koalia ba ema Israel hotu, sira fila sira nia oin ba rai fuik, no tebes, sira haree Nai nia glória iha kalohan nebaa. 11Nai koalia ba Moisés no dehan, 12“Hau rona ona ema Israel sira nia lian murmura nian. Nunee hatete ba sira: Iha tempu rai nakaras imi sei haan naan no iha tempu dadeer-saan imi sei haan paun too bosu. Nunee imi sei hatene katak Hau mak Nai, imi nia Maromak.”
13Tuir mai, iha tempu rai nakaras, manu kiukai sira semo mai, no taka tomak akampamentu nee. Iha dadeer-saan, mahobeen mai iha rai nebee haleu akampamentu nee. 14Bainhira mahobeen nee suar sai ona, tebes, iha rai fuik nee, iha buat ruma kiik hanesan mahobeen jelu.#16:14 Bainhira rai malirin liu, mahobeen bele sai toos nudar jelu rahun iha rai leten. 15Bainhira ema Israel sira haree, sira hatete ba malu, “Saida mak nee?”#16:15 Ebreu man hu nebee hanesan ho maná. Tanba sira la hatene saida mak nee. Maibee Moisés hatete ba sira, “Ida nee mak paun nebee Nai foo ba imi hodi imi bele haan. 16Nai nia ukun fuan mak nee: halibur ai haan nee. Ema ida-idak foti natoon tuir buat nebee nia presiza. Halibur litru rua#16:16 Ebreu omer, nebee futun ida ka sukat hanesan litru rua. kada ema ida, tuir ema nain hira nebee iha imi nia tenda.” 17Nunee duni ema Israel sira halo tuir, no sira halibur paun. Balu halibur barak no balu uitoan. 18Maibee bainhira sira tetu, ema nebee halibur barak, nia la iha barak liu, no ema nebee halibur uitoan, nia la iha menus liu.#16:18 Haree 2 Korinto 8:15. Ema ida-idak halibur natoon tuir buat nebee nia bele haan. 19Moisés dehan ba sira, “Tenki haan hotu no keta husik too aban dadeer.” 20Maibee iha ema balu nebee la rona ba Moisés no sira husik hahaan balu nee too aban dadeer, no hahaan nee mosu ular no sai dois loos. Nunee Moisés sai hirus ba sira. 21Sira baa halibur dadeer-dadeer no ema ida-idak halibur natoon tuir buat nebee nia bele haan. Maibee bainhira loron manas, hahaan iha rai nee nabeen hotu.
22Tuir mai, ba loron neen nian sira halibur paun loron rua nian, nebee litru haat kada ema ida. No ema nebee lidera povu nee mai foo hatene ba Moisés. 23Depois Moisés dehan ba sira, “Nai hatete ona hanesan nee: Aban mak loron nebee deskansa, loron Sabdu nebee santu ba Nai. Nunee tunu buat nebee imi hakarak tunu, no daan buat nebee imi hakarak daan. No buat nebee restu bele husik deit iha imi nia fatin too aban dadeer.” 24Nunee sira husik deit iha sira nia fatin too aban, tuir Moisés nia liafuan ba sira. No paun nee la dois no la iha ular iha laran. 25Depois Moisés hatete, “Haan ai haan nee loron ohin, tanba loron ohin mak loron Sabdu ba Nai. Iha loron ida nee imi sei la hetan buat ida iha rai nebaa. 26Halibur ai haan nee durante loron neen, maibee iha loron hitu, loron Sabdu nee, iha loron nebee paun la iha.”
27Bainhira too iha loron hitu, ema balu sai ba hodi halibur paun, maibee sira la hetan. 28Nunee Nai hatete ba Moisés, “Too bainhira mak imi lakohi halo tuir Hau nia ukun fuan sira no Hau nia lei sira? 29Atensaun ba, Nai foo tiha ona Sabdu nee ba imi. Tanba nee loron neen Nia foo ba imi paun ba loron rua nian. Hela iha imi nia fatin ida-idak. Ema ida keta sai hosi nia fatin iha loron hitu nee.” 30Nunee duni povu deskansa iha loron hitu.
31Povu Israel hanaran ai haan nee: maná. Maná nee iha oin hanesan fini koentru,#16:31 Koentru (Ind: ketumbar) nee musan kiik no kabuar hanesan fatuk lotuk kiik. nia kór mutin no midar hanesan dosi nebee halo ho bani been. 32Moisés dehan, “Nunee Nai nia ukun fuan: Halibur maná litru rua hodi tau ba imi nia jerasaun tuir mai, hodi sira bele haree paun nebee Hau foo ba imi atu haan iha rai fuik bainhira Hau lori imi sai hosi Ejitu.” 33Tanba nee Moisés dehan ba Arão, “Foti buli ida, tau maná litru rua iha laran, no tau iha Nai nia oin, no rai hela buat nee durante imi nia jerasaun hotu.” 34Entaun Arão halo tuir orden nebee Nai foo ba Moisés, no tau paun nee iha Aliansa nia oin hodi rai di-diak. 35Ema Israel sira haan maná durante tinan haat-nulu, too sira tama ba rai nebee sira bele hela. Sira haan maná too tempu nebee sira too iha fronteira rai Kanaan nian. 36(Sasukat nebee sira uza iha tempu nebaa mak porsentu sanulu nebee sukat hosi litru rua-nulu.)#16:36 Ebreu efaa, nebee litru rua-nulu. Nunee fraze nee mak ‘Omer ida mak parte ida hosi sanlulu nebee sukat hosi efaa ida.’
Currently Selected:
Exodu 16: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
