Exodu 18

Jetro Hasoru Moisés

1Jetro mak saserdote iha Midian, no nia Moisés nia banin mane. Jetro rona buat hotu nebee Maromak halo ba Moisés no Ninia povu Israel, no oinsaa Nai lori ema Israel sai hosi Ejitu. 2Depois Jetro, Moisés nia banin mane, lori Moisés nia feen Zipora mai. Uluk Moisés haruka nia feen atu fila ba. 3Zipora iha oan mane nain rua: ida naran Gerson, (tanba Moisés dehan, “Hau sai ema lao rai iha rai liur”),#18:3 Iha Ebreu ‘ema lao rai’ hanesan liafuan ‘Gerson’. 4no oan ida seluk naran Eliezar, (tanba nia dehan, “Hau nia aman nia Maromak mak ajuda hau no salva hau hosi surik Faraó nian”).#18:4 Eliezer iha sentidu katak ‘Maromak mak ajuda hau.’ 5Jetro, nebee Moisés nia banin mane, mai hamutuk ho Moisés nia oan sira no nia feen no sira too Moisés nia fatin iha rai fuik, fatin nebee nia hela iha foho Maromak nian. 6Nunee Jetro haruka ema foo hatene ba Moisés, “Hau, o nia bani mane, Jetro, mai ona hamutuk ho o nia feen no o nia oan mane nain rua.” 7Depois Moisés sai ba hodi hasoru ninia banin mane. Nia hakneak ba ninia banin mane no rei nia. Sira husu ba malu diak ka lae, depois sira tama ba tenda laran. 8Depois Moisés konta ba ninia banin mane kona ba buat hotu nebee Nai halo ba Faraó no ema Ejitu sira tanba Israel, no problema hotu nebee sira hasoru iha dalan no oinsaa Nai salva sira. 9Jetro haksolok ho buat diak hotu nebee Nai halo ona ba Israel, nebee Nia salva sira hosi ema Ejitu sira nia liman.

10Depois Jetro dehan, “Hahii ba Nai nebee salva imi hosi ema Ejitu sira nia liman no hosi Faraó nia liman, ba Nia nebee salva povu nee hosi ema Ejitu sira nia liman nia okos. 11Agora hau hatene, Nai mak boot liu maromak sira seluk hotu. Tanba iha tempu nee, ema Ejitu sira foti aan iha povu Israel nia oin.” 12No Jetro, Moisés nia banin mane, foo oferta tunu motuk no sakrifísiu sira ba Maromak. Nunee Arão no katuas hotu hosi Israel mai haan hamutuk ho Moisés nia banin mane iha Maromak nia oin.

Moisés Hili Juis Sira

13Loron tuir mai, Moisés tuur hodi tesi lia ba ema Israel sira. No ema Israel sira hamriik iha Moisés nia oin hosi dadeer-saan too rai nakaras. 14Bainhira Moisés nia banin mane haree buat hotu nebee Moisés halo ba ema Israel, nia husu, “O halo saida ba ema Israel sira? Tanba saa mak o tuur mesak deit, no ema sira nee hotu hamriik iha o nia oin hosi dadeer-saan too rai nakaras?” 15Moisés hataan ba ninia banin mane, “Tanba ema sira nee mai hau hodi husu Maromak nia liafuan. 16Bainhira sira iha problema ba malu, sira mai hau no hau tesi lia ba sira. Nunee hau foo hatene ba sira kona ba Maromak nia estatutu sira no Ninia lei sira.” 17Maibee Moisés nia banin mane dehan ba nia, “Buat nebee o halo nee la diak. 18O sei sai kole loos. O no mos ema sira nebee hamutuk ho o sei sai kole. Tanba servisu nee todan liu ba o, no o la bele halo mesak. 19Nunee rona tuir hau nia liafuan. Hau sei foo konselhu ba o no Maromak sei hamutuk ho o. O hamriik hodi reprezenta povu iha Maromak nia oin no o lori sira nia problema ba Maromak. 20O tenki hanorin estatutu no lei sira ba povu, no hatudu ba sira dalan ida nebee sira tenki lao tuir, no servisu nebee sira tenki halo. 21No mos o tenki buka ema nebee laran forti hosi povu nia leet, no ema nebee hamtauk ba Maromak, ema fiel nebee odi hahalok nebee hadau riku-soin. Hili ema sira nee hodi lidera ema nain rihun ida, lidera ema nain atus ida, lidera ema nain lima-nulu no lidera ema nain sanulu. 22Loro-loron, sira tenki tesi lia ba ema sira. Sira bele lori problema boot ba o. Maibee problema nebee kiik nee, sira rasik bele tesi lia. Nunee sira bele halo kamaan o nia servisu, no sira bele servisu hamutuk ho o. 23Se o halo hanesan nee, no Maromak sei manda o hanesan nee, nunee o bele halo nafatin, no ema sira nee bele fila ba sira nia fatin ho laran kamaan.”

24Moisés rona liafuan nee hosi ninia banin mane no nia halo tuir. 25Moisés hili ema hosi Israel nebee iha laran forti. Nia foo knaar ba sira atu sai lider ba ema sira nee. Nunee sira sai lider ba ema nain rihun ida, no lider ba ema nain atus ida, no lider ba ema nain lima-nulu, no lider ba ema nain sanulu. 26Loro-loron sira tesi lia ba ema Israel sira. Problema sira nebee boot, sira lori ba Moisés. Maibee problema sira nebee kiik, sira rasik tesi lia deit. 27Depois Moisés husik ninia banin mane atu fila fali baa ninia rai.

Currently Selected:

Exodu 18: BK

Highlight

Copy

Compare