Exodu 19

Nai Hatudu Aan Iha Foho Sinai

1Iha loron primeiru, fulan terseiru, hosi tempu nebee ema Israel sai hosi Ejitu, sira too iha rai fuik Sinai. Sira too iha Sinai iha loron primeiru nee duni. 2Tanba povu Israel husik tiha Refidim no sira lao too iha rai maran naran Sinai. Israel halo akampamentu iha rai fuik nee hodi hela iha foho Sinai nia huun. 3No Moisés sae ba foho hodi hasoru Maromak. Nai koalia ba Moisés hosi foho nee, Nia hatete, “Foo hatene ba Jacó nia jerasaun, no dehan ba ema Israel, 4‘Imi haree ona saida mak Hau halo ba ema Ejitu sira, no oinsaa Hau lori imi fila fali mai Hau hanesan iha makikit nia liras leten. 5Agora se imi rona tebe-tebes Hau nia liafuan no kaer metin Hau nia aliansa, nunee imi sei sai Hau nia riku-soin rasik hosi nasaun hotu. Tanba mundu tomak mak Hau nian. 6Imi sai povu ida nebee reinu saserdote sira nian, nasaun ida nebee santu.’ O tenki hatoo liafuan nee ba ema Israel.”

7Entaun Moisés tuun mai no bolu lider sira hodi halibur hamutuk. No nia hatoo ba sira liafuan hotu nebee Nai manda ona ba nia. 8Entaun sira hotu hataan hamutuk, “Ami hakarak halo tuir liafuan hotu nee hosi Nai.” Depois Moisés hatoo povu nia resposta ba Nai. 9Nai hatete ba Moisés, “Tebes, Hau sei hasoru o maibee Hau sei falun aan ho kalohan metin. Ema sira sei rona Hau koalia ba o, no sira sei fiar o too tinan ba tinan.” Bainhira Moisés hatoo povu nia liafuan ba Nai, 10Nai hatete ba Moisés, “Baa halibur povu nee, no konsagra sira ohin no aban, no sira tenki fasi sira nia ropa. 11Iha loron ba dala tolu, imi tenki prontu ona. Tanba iha loron ida nee Hau atu tuun ba foho Sinai hodi povu hotu bele haree. 12Marka tiha sinál nebee haleu foho nee hanesan baliza, no hatete, ‘Kuidadu aan, keta sae foho nee, no keta book baliza nee. Se ema ruma book foho nee, tenki foo kastigu mate ba nia. 13Ema tenki tuda ho fatuk ka hana ho rama ba ema nebee book foho nee. Halo ida nee ba ema no animál, keta husik nia moris.’ Bainhira korneta halo lian kleur ona foin povu bele sae foho.”#19:12-13 Haree Ebreu 12:20. 14Entaun Moisés tuun hosi foho no konsagra povu no sira fasi sira nia ropa. 15Nunee Moisés hatete ba povu nee, “Aban bainrua imi tenki prontu no keta halo relasaun seksuál ho feto.”

16Iha loron terseiru, iha dadeer-saan, povu rona rai tarutu no haree rai lakan. Kalohan metan mosu iha foho leten no korneta halo lian makaas tebes. Ema hotu iha akampamentu nakdedar. 17Moisés lori sira sai hosi akampamentu hodi hasoru Maromak, no sira hamriik iha foho huun nebaa. 18Suar taka metin foho Sinai tomak, tanba Nai tuun baa foho nee ho ahi. Suar nee sae hanesan suar nebee sae hosi fornu, no foho tomak nakdedar makaas. 19Korneta halo lian makaas no aumenta makaas liu tan. Moisés koalia, no Maromak hataan ho lian. 20Nai tuun ba foho Sinai. Nia tuun ba foho tutun. Nia bolu Moisés atu baa foho tutun nee. No Moisés sae ba leten.

21Depois Nai hatete ba Moisés, “Tuun ona ba kraik, no manda povu atu keta hakat liu baliza hodi hakbesik no haree Nai, hodi ema barak sei la mate. 22Maski saserdote sira nee atu hakbesik ba Nai, sira tenki konsagra aan. Se lae, Nai bele kastigu sira.” 23Moisés hatete ba Nai, “Povu nee la bele sae foho Sinai tanba O foo ona orden mai ami, ‘Marka baliza haleu foho nee hodi halo santu.’” 24Nai hataan, “Baa lai! Tuun ona ba kraik, depois fila mai iha nee ho Arão. Maibee saserdote sira no povu keta hakat liu baliza hodi mai hasoru Nai. Se sira hakat liu, Hau sei kastigu sira.” 25Nunee Moisés tuun baa hasoru povu, hodi hatoo lia menon nee ba sira.

Currently Selected:

Exodu 19: BK

Highlight

Copy

Compare