Exodu 22
22
Julgamentu Kona Ba Riku-soin
1“Bainhira ema ida naok karau ida ka bibi ida, no nia oho ka nia faan, nunee nia tenki selu fali karau lima troka karau ida nebee nia naok tiha. No nia tenki selu bibi haat troka fali bibi ida nebee nia naok tiha. 2Se ema ida hetan naok-teen nebee tama hela, no nia baku mate naok-teen nee, ema nebee baku la hetan kastigu. 3Maibee se loro matan sae tiha ona, nunee naok-teen tenki hetan kastigu. Naok-teen nee tenki troka fali sasaan hotu nebee nia naok. Se nia la iha buat ida ona, ema tenki faan nia nudar atan hodi troka sasaan nebee nia naok ona. 4Se sasaan nebee nia naok sei iha ninia liman no moris hela, nebee karau, kuda buru ka bibi, nunee nia tenki selu dala rua.
5Bainhira ema lori ninia animál ba haan iha toos ka toos uvas ka nia husik deit ninia animál lao ho livre, no animál nee haan ema seluk nia ai horis hotu iha toos, nia tenki selu fali buat nebee lakon hosi rezultadu nebee diak liu hosi ninia toos luan no hosi ninia toos uvas.
6Bainhira ema sunu ahi no ahi nee haan duut, maibee ahi haan fali hare nebee kuu ona ka hare nebee seidauk kuu ka ahi haan toos tomak, nunee ema nebee sunu ahi nee tenki selu fali.
7Bainhira iha ema ida rai osan ka sasaan balu ho ninia maluk, no ema naok hosi ema nee nia uma, no se ema hetan naok-teen nee, nunee nia tenki selu dala rua. 8Maibee se ema la hetan naok-teen nee, uma nain tenki baa hasoru Maromak hodi jura katak nia la foti ninia maluk nia sasaan. 9Kona ba hirus malu hotu nee, kona ba karau, kona ba kuda buru, kona ba bibi, kona ba ropa, kona ba sasaan saida deit mak lakon, nebee ema dehan buat nee ninian, ema nain rua nee tenki lori problema ba Maromak nia oin. Ida nebee Maromak mak hatudu, nia tenki selu dala rua ba ninia maluk nee.
10Bainhira ema ida rai hela kuda buru ida ho ninia maluk, ka karau ida, bibi ida ka animál saida deit, no animál nee mate, ka animál hetan kanek ka ema duni nia no ema ruma la haree, 11nunee ema nain rua nee tenki jura hodi Nai katak nia la foti ninia maluk nia sasaan. No maluk nee sei simu liafuan nee, no ida seluk la presiza selu fali sasaan nebee lakon. 12Maibee se loos duni ema naok animál nee hosi nia, nunee nia tenki selu fali ba animál nia nain. 13Se animál fuik tata mate animál nee, nunee nia tenki lori mai hatudu animál nia isin hodi prova. Nia la presiza selu animál nebee animál fuik tata mate nee.
14Bainhira ema ida empresta animál ida hosi nia maluk no animál nee hetan kanek ka mate, no ninia nain laos iha nebaa, nunee nia tenki selu. 15Maibee se animál nee nia nain sei iha nebaa, nia la presiza selu. Se nia aluga animál nee, nunee animál nia folin inklui ona.
Julgamentu Kona Ba Justisa Sosiál
16Bainhira mane ida obriga feto raan ida nebee seidauk troka prenda ho mane seluk, no nia toba hamutuk ho feto nee, nunee nia tenki selu barlaki no hola feto nee hodi sai ninia feen. 17Se feto nia aman lakohi mane nee atu hola ninia oan feto, nunee mane nee tenki selu barlaki feto raan nian nee.
18Keta husik buan ida moris.
19See mak toba ho animál ida, tenki foo kastigu mate ba nia.
20See mak foo sakrifísiu ba maromak seluk, laos foo ba Nai deit, tenki halakon nia.
21Keta hanehan ema lao rai sira, tanba uluk imi mos ema lao rai iha Ejitu. 22Keta halo terus ba feto faluk ka oan kiak. 23Se imi halo terus naran deit ba sira, no sira bolu ba Hau, nunee Hau sei rona sira. 24Hau sei sai hirus makaas no oho imi ho surik, no imi nia feen sira sei sai feto faluk no imi nia oan sira sei sai oan kiak.
25Bainhira imi foo empresta osan ba Hau nia povu, ba ema kiak iha imi nia leet, keta sai ema nebee husu tusan ho funan hosi nia. Keta foo todan ba nia ho funan. 26Bainhira imi foti nia ropa hanesan garantia, tenki foo fila fali ropa nee ba nia molok loro matan monu. 27Tanba ho ida nee deit mak nia taka ninia isin. Nia uza ida nee atu toba. Se nia bolu ba Hau, nunee Hau sei rona nia tanba Hau iha grasa.
Julgamentu Oi-oin
28Keta koalia aat hasoru Maromak. Keta foo malisan ba xefi sira iha imi nia rai.
29Keta tardi atu foo oferta hosi imi nia produsaun no imi nia tua uvas. Imi tenki foo imi nia oan mane primeiru sira mai Hau. 30Nunee mos imi tenki halo hanesan nee ho imi nia karau no imi nia bibi. Iha loron hitu nia laran, animál nia oan nee tenki hela ho nia inan, maibee iha loron ualu nee o tenki entrega animál nee ba Hau.
31Imi tenki sai ema nebee santu ba Hau. Imi keta haan animál sira nebee animál fuik tata mate ona iha rai fuik, maibee imi tenki soe ba asu sira.”
Currently Selected:
Exodu 22: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
