Exodu 23

Keta Estraga Justisa

1Keta lori lia bosok; keta sai sasin nebee la loos hodi ajuda ema aat. 2Keta halo tuir ema lubun boot nebee halo aat. Keta koalia tuir ema barak nebee koalia lia falsu hodi estraga justisa. 3No keta prefere ema fraku nia kazu iha tribunál.

4Bainhira o haree o nia inimigu nia karau ka kuda buru lao lakon, lori fali animál nee ba ninia nain. 5Bainhira o haree kuda buru hosi o nia inimigu nee monu tanba nia lori sasaan todan, keta hein haree deit. O tenki ajuda nia ho nia kuda buru nee.

6Keta hadau justisa hosi ema mukit iha nia kazu. 7Hadook aan hosi lia bosok. Keta oho ema inosenti no ema loos. Tanba Hau la hamoos sala hosi ema nebee iha hahalok aat. 8Keta simu prezenti subar,#23:8 Nee katak osan korupsaun ka suborno. tanba prezenti subar nee sei halo ema sira nebee haree diak sai delek, no halo liafuan hosi ema loos sai aat.

9Keta hanehan ema lao rai sira, tanba imi hatene ema lao rai sira nia moris nee oinsaa, tanba uluk imi mos ema lao rai iha Ejitu.

Lei Kona Ba Loron Boot

10Durante tinan neen o sei kuda iha o nia rai no foti rezultadu. 11Maibee iha tinan hitu, o tenki husik hela deit rai nee. Nunee ema kiak sira hosi o nia povu bele haan. No buat nebee sira husik, animál fuik bele haan. O tenki halo hanesan nee mos ba o nia toos uvas no toos oliveira.

12O bele servisu iha loron neen nia laran maibee loron hitu o tenki deskansa. Nunee o nia karau no kuda buru bele deskansa. No o nia atan feto nia oan mane no ema lao rai bele dada iis.

13O tenki rona di-diak ba buat hotu nebee Hau koalia ba o. Keta temi maromak sira seluk nia naran. Keta husik ema seluk rona buat nee hosi o nia ibun.

14“Imi tenki halo festa tolu ba Hau iha tinan ida nia laran. 15Imi tenki halo tuir Festa Paun Fermentu Laek. Iha loron hitu nia laran imi tenki haan paun nebee fermentu la iha hanesan Hau manda ona ba imi. Halo tuir festa nee iha loron nebee dehan tiha ona iha fulan Abibe,#23:15 Hanesan fulan Marsu ba Abríl. tanba iha fulan nee mak imi sai hosi Ejitu. Maibee ema la bele mai hasoru Hau ho liman mamuk. 16Imi mos presiza halo tuir Festa Kolheta, bainhira kuu rezultadu primeiru nebee imi kuda iha toos. No mos Festa Haloot Rezultadu, bainhira rezultadu hosi imi nia kolen tama hotu hosi toos bainhira tinan remata. 17Tinan ida dala tolu, imi nia mane hotu tenki hasoru Nai Maromak.

18Keta foo sakrifísiu nia raan ba Hau ho paun nebee iha fermentu. No naan bokur hosi festa nee keta husik too aban dadeer.

19Rezultadu primeiru hosi imi nia toos nee tenki lori ba Nai nia uma, o nia Maromak nian. Keta daan bibi oan iha nia inan nia susu been.

Hasai Ema Kanaan

20Tebes Hau haruka anju ida iha imi nia oin, hodi kuidadu imi iha dalan no lori imi ba fatin nebee Hau prepara ona. 21Kuidadu atu rona nia no halo tuir ninia liafuan. Keta kontra nia, tanba nia sei la foo perdaun ba imi, tanba Hau nia naran mak iha nia.

22Maibee se o rona duni ninia liafuan no halo tuir buat hotu nebee Hau koalia tiha ona, Hau sei sai inimigu ba imi nia inimigu sira, no kontra sira nebee mak kontra imi.

23Tanba Hau nia anju sei lao iha imi nia oin no lori imi ba ema Amoreu, ema Hiti, ema Perizeu, ema Kanaan, ema Heveu no ema Jabes sira no Hau sei estraga sira. 24Imi keta adora sira nia maromak sira ka serví sira, no keta tuir sira nia hahalok, maibee imi tenki estraga sira hotu no baku rahun sira nia fatuk lulik sira. 25Maibee imi tenki serví Nai, imi nia Maromak. Nunee Nia sei foo bensaun ba imi nia ai haan#23:25 Lian Ebreu dehan ‘paun’. no imi nia bee. No Hau sei hasai tiha moras hosi imi nia leet. 26Iha imi nia rai, feto sira hotu sei la abortu no sira nia oan hotu sei moris. Hau sei halo imi moris naruk. 27Hau sei halo ema tauk iha imi nia oin. Hau sei foo konfuzaun ba ema nebee imi hasoru. No Hau sei halo imi nia inimigu sira halai hosi imi. 28Hau sei haruka dihi siri baa uluk imi, no sira sei duni sai ema Heveu, ema Kanaan, no ema Hiti sira hosi imi nia oin. 29Hau sei la duni sira sai hosi imi iha tinan ida nia laran, hodi nunee rai nee la bele mamuk, no animál fuik sira la bele aumenta barak liu imi. 30Hau sei hasai sira neineik-neineik hosi imi nia oin, too imi aumenta ona. Nunee imi sei hela iha rai nebaa. 31Hau sei tau baliza iha imi nia rai hosi Tasi Teberau too tasi Filisteu nian, hosi rai fuik too Mota Eufrates. Tanba Hau sei entrega ema sira iha rai nebaa ba imi nia liman, nunee imi bele duni sira sai hosi imi nia oin. 32Keta halo aliansa ho sira ka sira nia maromak sira. 33Sira la bele hela iha imi nia rai, hodi sira la dada imi atu halo sala hasoru Hau. Tanba se imi serví sira nia maromak sira, ida nee sei sai duni lasu ida ba imi.

Currently Selected:

Exodu 23: BK

Highlight

Copy

Compare