Exodu 28

Kona Ba Ropa Saserdote Nian

1“O tenki bolu o nia maun Arão, hamutuk ho nia oan mane sira, atu mai ba o. Sira sei mai hosi povu Israel nia leet, hodi halao ministériu ba Hau nudar saserdote, inklui Arão no nia oan mane sira, Nadab, Abiú, Eleazar no Itamar. 2O tenki halo ropa nebee santu ba Arão, o nia maun, nebee iha glória no amostra nebee furak.

3O tenki koalia ho ema matenek hotu nebee Hau halo nakonu ona ho espíritu matenek, hodi sira bele halo Arão nia ropa hodi nia sai santu. Nunee nia bele serví Hau nudar saserdote. 4O tenki halo ropa hanesan tuir mai nee: taka hirus matan, faru efode, unuk, batina nebee iha kór, turbante#28:4 Hena naruk nebee bobar haleu ulun nudar xapeu. no sintu. Nunee sira tenki halo ropa santu ba Arão no ba ninia oan mane sira. No nia bele serví Hau nudar saserdote. 5Tanba nee sira tenki foti osan mean, kabas kór azúl, kór uvas no kór mean no hena nebee diak.

6Faru efode nee sira tenki halo hosi osan mean, no kabas kór azúl, kór uvas no kór mean no hena linhu, nebee suku halo kapaas. 7No halo alat rua iha kabaas fatin nebee tau ba efode, iha ninin rua, iha nia tutan fatin. 8No halo tais hanesan sintu nebee iha faru efode. Halo hanesan faru efode, tuir ninia oin, halo hosi osan mean, ho kabas kór azúl, kór uvas no kór mean, no hena linhu. 9O tenki foti fatuk onix rua no hakerek Israel nia oan sira nia naran iha fatuk nee. 10Hakerek naran neen iha fatuk ida, no hakerek naran neen iha fatuk seluk, tuir sira nia idade. 11Halo hanesan ema nebee hakerek iha fatuk, hanesan karimbu. Nunee duni o tenki hakerek Israel nia oan sira nia naran iha fatuk rua nee. No tenki monta fatuk nee ho osan mean. 12Depois o tenki tau fatuk rua nee iha sasaan kabaas nebee taka iha faru efode hodi hanoin hetan ema Israel sira. Nunee iha Nai nia oin Arão sei lori sira nia naran iha nia kabaas rua nee hodi sai sinál atu hanoin hetan sira. 13O tenki monta fatuk nee ho sasaan osan mean. 14O tenki halo korenti rua hosi osan mean nebee moos, hanesan tali nebee sasin. O tenki halo hodi kesi tutan ba osan mean nebee monta nee.

15O tenki halo alat julgamentu nebee taka iha hirus matan, nebee halo ho servisu matenek. Nia tenki halo hanesan faru efode. Halo ho osan mean ho kabas kór azúl, kór uvas no kór mean, no hena linhu. 16Hena nee halo kuadradu no bele dobra ba rua. Nia naruk sentímetru rua-nulu resin rua no nia luan sentímetru rua-nulu resin rua.#28:16 Sukat tuir liman fuan sira. 17O tenki monta fatuk nee ho linha haat. Iha linha primeiru tau rubi, topáziu no berilu. 18Iha linha segundu tau turkeza, safira no diamante. 19Iha linha terseiru tau jasintu, agata no ametista. 20Iha linha ba dala haat tau krizolitu, onix no jaspe.#28:20 Fatuk sira nee mak fatuk murak nebee iha kór oi-oin no karun, no fatuk balu nee la hatene loos. Tenki monta sira iha fatin osan mean hodi kaer metin. 21Tenki tau fatuk sanulu resin rua hodi hakerek Israel nia oan sira nia naran nebee ema nain sanulu resin rua. Hakerek hanesan o halo karimbu; naran ida ba fatuk ida hosi suku sanulu resin rua iha Israel. 22O tenki halo alat taka hirus matan nee ho korenti nebee halo hanesan tali nebee sasin diak ho osan mean nebee moos. 23O tenki monta kadeli rua ho osan mean iha alat taka hirus matan nee. Tau kadeli nee iha rohan rua iha alat taka hirus matan. 24Korenti osan mean nee tenki kesi ho kadeli rua iha alat taka hirus matan nia rohan. 25No korenti nia rohan rua seluk nee o tenki kesi tutan iha fatin osan mean nebee o monta ona iha faru efode iha kabaas, iha parte oin. 26O tenki halo kadeli rua hosi osan mean no tau iha alat taka hirus matan nia rohan, iha laran nebee hasoru malu ho faru efode. 27No o tenki halo kadeli osan mean rua no kesi iha faru efode nia sorin rua, iha parte kraik iha oin, besik fatin tutan malu, iha faru efode nia sintu tais nia leten. 28Depois o sei kesi alat taka hirus matan nee ho nia kadeli kesi iha faru efode nia kadeli nee ho tali kór azúl, iha sintu tais nia leten. Nunee nia tenki iha faru efode nafatin no alat taka hirus matan nee la bele hasai. 29Nunee duni Arão tenki lori naran Israel sira iha nia fuan laran, nebee hakerek iha alat julgamentu taka hirus matan nian, bainhira nia tama ba Fatin Santu. Ida nee sei sai sinál hodi hanoin hetan nafatin iha Nai nia oin. 30No iha alat julgamentu taka hirus matan nee nia laran o tenki tau Urim no Tumim.#28:30 Sasaan espesiál nebee saserdote uza hodi hetan desizaun hosi Maromak karik hanesan ema dada rifa. Númeru 27:21, 1 Samuel 14:41. Tenki tau iha Arão nia fuan leten, bainhira nia tama ba hasoru Nai. Nunee Arão lori nafatin julgamentu ba ema Israel sira iha nia fuan leten, iha Nai nia oin.

31O tenki halo unuk efode nian tomak hosi hena kór azúl. 32Tenki halo kuak iha leten nebee iha klaran. Ninia kuak kakorok nee tenki iha ninin nebee haleu kuak, nebee suku metin, hanesan gola ida,#28:32 Ebreu karik dehan ‘hanesan faru besi funu nian iha kakorok’. nunee la bele naklees. 33Iha unuk nia ninin o tenki halo ai fuan delima hosi hena kór azúl, kór uvas no kór mean, nebee haleu unuk nia ninin iha kraik, no kahur ho sinu kiik sira hosi osan mean. 34Nunee unuk iha sinu kiik osan mean ida depois ai fuan delima ida, no sinu kiik osan mean ida depois ai fuan delima ida, tu-tuir malu haleu unuk nia ninin iha okos. 35Arão tenki uza unuk nee bainhira nia halao ministériu. No unuk sei halo lian nebee bele rona bainhira nia tama ba Fatin Santu iha Nai nia oin no bainhira nia sai, nunee nia la bele mate.

36O mos tenki halo kaebauk ho osan mean nebee moos, no iha kaebauk nee o tenki hakerek liafuan nee hanesan o hakerek iha karimbu: Santu ba Nai. 37O tenki kesi tali kór azúl ba kaebauk nee, no o tenki monta ba turbante, iha nia oin. 38Kaebauk nee o tenki tau iha Arão nia reen toos, no Arão tenki lori sala nia todan nebee mai hosi buat sira nebee santu, nebee oferta santu nebee ema Israel sira lori mai hodi sai santu; nunee kaebauk nee tenki iha Arão nia reen toos nafatin, nunee Nai bele simu sira.

39O tenki borda ninia batina nebee halo hosi hena linhu, no halo hena nebee taka ulun hosi hena linhu no o tenki borda sintu ho kór oi-oin.

40O tenki halo batina sira ba Arão nia oan sira no o tenki halo mos sintu ba sira. O tenki halo mos xapeu ba sira, hodi foo glória no halo furak. 41O tenki foo buat hotu nee ba o nia maun Arão ho nia oan sira hodi hatais. Depois o sei kose mina unsaun ba sira, konsagra sira no halo sira santu, nunee sira bele serví Hau nudar saserdote. 42Halo kalsa ba sira hodi taka sira nia isin molik. Kalsa nee halo naruk hosi kanotak too iha kelen. 43Arão ho nia oan sira tenki hatais kalsa nee, bainhira sira tama ba Tenda Enkontru ka bainhira sira mai iha altár hodi serví iha Fatin Santu. Nunee la bele lori sala ba sira hodi mate. Ida nee mak estatutu ba nia no ninia bei-oan sira nebee tuir mai too rohan laek.”

Currently Selected:

Exodu 28: BK

Highlight

Copy

Compare