Exodu 29

Konsagra Arão Ho Ninia Oan Sira

1“O tenki halo ida nee ba sira, hodi halo sira santu, nunee sira bele serví Hau nudar saserdote: foti karau aman oan ida, no bibi malae aman rua nebee la iha kanek ida, 2paun nebee la kahur fermentu no paun kabuar nebee la kahur fermentu no halo ho mina, no paun mihis nebee la kahur fermentu no kose ho mina; no halo hotu hosi trigu. 3O tenki tau hotu iha bote ida no lori paun sira nebee iha bote nee hamutuk ho karau aman oan ida no bibi malae aman rua. 4Depois Arão no ninia oan mane sira tenki mai iha odamatan iha Tenda Enkontru, no o tenki fasi sira ho bee. 5Depois o sei foti ropa sira nee no foo ba Arão hodi hatais batina, unuk efode nian, efode, no alat taka hirus matan, no kesi sintu tais iha efode nee. 6Depois tau turbante iha nia ulun no tau kaebauk santu iha turbante nee. 7Liu tiha nee, o tenki foti mina unsaun no fui iha nia ulun leten hodi foo unsaun ba nia. 8O tenki haruka ninia oan sira hakbesik no o foo hatais batina ba sira. 9O tenki kesi sintu ba sira, ba Arão no ba ninia oan sira, no xapeu ba sira. Nunee sira simu knaar nudar saserdote. Ida nee mak estatutu too rohan laek. Ho ida nee o tenki konsagra Arão ho ninia oan sira.

10Depois o lori karau aman oan nee ba iha Tenda Enkontru nia oin, no Arão ho ninia oan mane sira tenki tau liman ba iha karau aman nee nia ulun leten. 11No o tenki oho karau aman nee iha Nai nia oin, iha odamatan ba Tenda Enkontru. 12O tenki foti raan balu hosi karau aman nee no o tau ho o nia liman fuan ba altár nia dikur sira, no raan restu sira nee o tenki fakar ba rai iha altár nia sorin. 13Depois o foti bokur sira nebee taka iha nia kabun, aten nebee boot, ríns rua no bokur sira nebee belit iha sira, no tunu iha altár nee. 14Maibee naan karau aman nee, no nia kulit no nia teen, o tenki sunu too hotu ho ahi iha akampamentu liur. Ida nee mak oferta sala nian.

15Depois o tenki foti bibi malae aman ida, no Arão no ninia oan mane sira tenki tau sira nia liman iha bibi malae aman nia ulun leten. 16O tenki oho bibi malae aman nee no foti ninia raan no fakar haleu iha altár nia sorin. 17O tenki koa bibi malae aman nee hodi halo pedasuk sira. Fasi tiha foer nebee iha nia tee boot no nia ain no tau hamutuk ho pedasuk sira nee no ninia ulun. 18Depois o tenki sunu bibi malae tomak nee too hotu iha altár nia leten. Ida nee mak oferta tunu motuk, oferta ida nebee morin ba Nai, no oferta nebee halo ho ahi ba Nai.

19Depois o sei foti bibi malae aman ida seluk nee, no Arão no nia oan mane sira tenki tau sira nia liman iha bibi malae nee nia ulun. 20O tenki oho bibi malae nee. O sei foti raan uitoan hosi nia no kose ba Arão nia tilun tahan loos no Arão nia oan sira nia tilun tahan loos, sira nia liman fuan boot iha liman loos no ain fuan boot iha ain loos, no raan restu sira nee fakar haleu iha altár nia sorin sira. 21O tenki foti raan balu hosi altár nee nia leten no hosi mina unsaun nian no o sei hisik ba Arão ho ninia ropa, no mos ninia oan mane sira no sira nia ropa. Nunee nia sei sai santu, no ninia ropa, ninia oan mane sira no ninia oan mane sira nia ropa hamutuk ho nia.

22Hosi bibi malae aman nee o tenki foti ninia bokur, ninia ikun nebee iha bokur, bokur nebee taka ninia teen, nia aten nebee boot, ninia ríns rua hamutuk ho bokur nebee belit ho sira, no ninia ain loos (tanba bibi malae aman nee mak oferta konsagrasaun), 23no o sei foti mos paun ida, paun kabuar ida nebee iha mina no paun mihis hosi bote laran nebee paun la kahur fermentu, iha Nai nia oin. 24O tenki tau hotu iha Arão nia liman tane leten no iha ninia oan mane sira nia liman tane leten. No sira tenki muda ba-mai ho liman hodi foo oferta nebee hasae ba Nai iha Ninia oin. 25Depois o tenki foti hotu hosi sira nia liman no sunu iha altár leten, hanesan oferta nebee morin iha Nai nia oin. Ida nee mak oferta nebee halo ho ahi ba Nai.

26Nunee o tenki foti bibi malae nia hirus matan, hosi Arão nia konsagrasaun, no muda ba-mai ho liman hodi foo oferta hasae ba Nai, ida nee sei sai o nian. 27O tenki halo santu naan hirus matan hosi oferta nebee hasae ba Nai, no ain hosi oferta nebee hasae hosi bibi malae aman nebee oferta konsagrasaun, hosi buat nebee Arão nian no nia oan mane sira nian. 28Ida nee mak parte Arão nian no nia oan mane sira nian tuir estatutu too tinan ba tinan, nebee mai hosi ema Israel sira. Tanba ida nee mak oferta nebee hasae, hosi ema Israel sira, ida nebee foti hosi oferta dame nian nebee oferta hasae ba Nai.

29Arão nia ropa santu nee tenki tuun ba ninia oan sira tuir mai. Nunee sira bele uza bainhira sira simu mina unsaun no konsagrasaun ho ropa nee. 30Oan mane nebee tuir Arão nudar saserdote tenki uza ropa nee durante loron hitu nia laran bainhira nia tama ba iha Tenda Enkontru hodi serví iha Fatin Santu.

31Oferta bibi malae aman ba konsagrasaun nee o tenki foti no nia naan nee o tenki daan iha Fatin Santu. 32Arão ho ninia oan mane sira tenki haan naan bibi malae aman nee ho paun nebee iha bote laran iha odamatan ba Tenda Enkontru. 33Sira sei haan oferta hotu nebee uza hodi taka sala, hodi konsagra sira no halo sira moos, maibee ema liur keta haan buat nee tanba oferta nee mak santu. 34Se karik sei iha naan restu hosi konsagrasaun sira nee, no hosi paun nee, nebee hela too dadeer fali, nunee o tenki sunu hotu ho ahi. Keta haan tanba ida nee mak santu.

35O tenki halo hanesan nee ba Arão no ninia oan mane sira, tuir buat hotu nebee Hau manda ba o, durante loron hitu o tenki konsagra sira. 36Loro-loron o tenki oferese karau aman ida hanesan oferta sala nian hodi taka sala. O tenki hamoos altár nee, hodi taka nia sala, o tenki kose mina ba nia hodi nia sai santu. 37Durante loron hitu nia laran o tenki taka sala altár nian nee. O tenki halo nia santu, nunee altár nee sai santu liu; buat hotu nebee kona altár nee sei sai santu.

Oferta Dadeer No Lokraik

38“O tenki oferese ida nee iha altár leten: bibi malae oan rua ho idade tinan ida. O tenki halo nafatin loro-loron. 39Bibi malae oan ida o tenki oferese iha dadeer-saan no bibi malae oan ida seluk o tenki oferese bainhira loro matan monu ona. 40Bibi malae oan primeiru nee tenki oferese hamutuk ho trigu nebee diak kilograma ida ho mina azeiti litru ida. No tua uvas litru ida nebee oferta hemu nian. 41Bibi malae oan ida seluk nee o tenki oferese iha tempu loro matan monu tiha ona; hanesan mos ho oferta trigu nian no oferta hemu nian iha dadeer. O tenki halo hanesan oferta nebee morin, oferta nebee halo ho ahi ba Nai. 42O tenki halo oferta tunu motuk nee nafatin too jerasaun ba jerasaun. Halo iha odamatan Tenda Enkontru nia oin, iha Nai nia oin, iha fatin nebee Hau sei hasoru o no koalia ho o. 43Iha nebaa Hau sei hasoru malu ho ema Israel sira, no fatin nee sei sai santu ho Hau nia glória. 44Hau sei halo santu Tenda Enkontru no altár nee. No Hau sei halo santu Arão ho nia oan mane sira. Nunee sira bele serví Hau nudar saserdote. 45Hau sei hela iha povu Israel nia leet no Hau sei sai sira nia Maromak. 46Nunee sira sei hatene katak Hau mak Nai, sira nia Maromak, ida nebee lori sira sai hosi rai Ejitu, nunee Hau bele hela iha sira nia leet. Hau mak Nai, sira nia Maromak.”

Currently Selected:

Exodu 29: BK

Highlight

Copy

Compare