Exodu 30

Altár Sunu Insensu

1“O tenki halo altár hodi sunu insensu. O tenki halo hosi ai kasi. 2Altár nee nia luan sentímetru haat-nulu resin lima no naruk sentímetru haat-nulu resin lima, nunee nia kuadradu. No nia aas sentímetru sia-nulu. No halo dikur sira hamutuk ho altár nee. 3O tenki falun ho osan mean nebee moos. Falun iha leten no haleu altár nia sorin hotu no nia dikur sira. O tenki halo ninin nebee haleu iha altár nee nia leten. 4O tenki halo kadeli osan mean rua ba altár iha ninin nee nia kraik, iha sor-sorin. Iha nia ain rua o tenki halo kadeli rua, hodi hatama ai naruk atu lori altár nee. 5O tenki halo ai naruk nee hosi ai kasi no o tenki falun ho osan mean. 6O tenki tau altár nee iha veo nia oin, nebee taka Arka Aliansa, iha Matan Dame nia oin nebee iha Aliansa nia leten, iha fatin nebee Hau hasoru o. 7Iha leten, Arão tenki sunu insensu dadeer-dadeer hosi buat morin. Bainhira nia hamoos ahi oan sira, nia tenki sunu morin nee. 8No bainhira Arão halakan ahi oan sira nee iha tempu loro matan monu ona, nia tenki sunu insensu iha fatin nee. Nunee o sei iha insensu nafatin iha Nai nia oin too jerasaun ba jerasaun. 9Iha altár nee nia leten o keta oferese insensu seluk, oferta tunu motuk ka oferta trigu nian. No o keta fui oferta hemu nian iha altár leten. 10Tinan ida dala ida, Arão tenki halo oferta taka sala iha dikur sira nia leten, ho raan hosi oferta taka sala. Nia tenki halo oferta taka sala tinan ida dala ida ba altár nee hosi jerasaun ba jerasaun. Ida nee mak santu liu ba Nai.”

Oferta Sensus Nian

11 Nai dehan ba Moisés, 12“Bainhira o sura ema Israel sira iha tempu sensus, sira ida-idak tenki foo oferta osan dame ba Nai tanba sira nia moris. Sira tenki foo oferta nee bainhira ema rejistu sira. Nunee sira la hetan kastigu iha tempu sensus. 13Ema ida-idak tenki foo ida nee bainhira sira lao liu ema sira nebee sura sira: osan grama neen, tetu tuir osan hosi Fatin Santu (osan besi ida tomak nee nia todan mak grama sanulu resin rua),#30:13 Osan besi ida mak ‘sekel’ nebee todan grama sanulu resin rua. Sira iha mos ‘sekel sorin’ nebee iha folin sekel ida fahe ba rua. nunee osan grama neen sei sai oferta ba Nai. 14Ema ida-idak nebee rejistu nee, hosi ema nebee tinan rua-nulu ba leten, tenki foo oferta nee ba Nai. 15Ema riku la bele foo liu, no ema kiak la bele foo menus hosi osan grama neen, bainhira sira foo oferta nee ba Nai hodi taka sala hosi sira nia moris. 16O tenki foti osan dame nee hosi ema Israel sira no uza iha ministériu iha Tenda Enkontru. Nunee oferta nee bele sai sinál hodi hanoin nafatin iha Nai nia oin, no taka sala hosi imi nia moris.”

Fatin Fasi

17 Nai dehan ba Moisés, 18“O tenki halo basia hodi fasi no nia tuur fatin hosi riti. O tenki tau basia entre Tenda Enkontru no altár, no tau bee iha laran. 19Arão ho nia oan sira tenki fasi liman ho ain ho bee iha nebaa. 20Bainhira sira tama ba Tenda Enkontru, sira tenki fasi aan ho bee, nunee sira la bele mate. Nunee mos bainhira sira hakbesik ba altár hodi halao ministériu no sunu oferta ahi nian ba Nai. 21Sira tenki fasi sira nia liman no ain, nunee sira la bele mate. Ida nee sei sai estatutu ba sira too tinan ba tinan, ba Arão no ba ninia jerasaun sira.”

Mina Unsaun

22 Nai dehan ba Moisés, 23“Foti mina morin tolu: mira been diak kilu neen, ai kaneli sura sorin deit nebee kilu tolu, no duut morin kilu tolu, 24no ai kameli kilu neen, tuir kilu#30:23-24 Ebreu hakerek sekel nebee sekel 500 mak 6kg. nebee tetu iha Fatin Santu, no mina azeiti litru haat. 25O tenki halo mina nee nudar mina unsaun santu. O tenki kahur di-diak tuir metodu nebee ema matenek ida halo mina morin. Ida nee mak mina unsaun nebee santu. 26O tenki kose mina nee ba Tenda Enkontru no Arka Aliansa, 27no meza ho nia sasaan hotu, no kandelabru ho nia sasaan, no altár sunu insensu, 28no altár oferta tunu motuk nian ho nia sasaan hotu, no basia fasi ho nia tuur fatin. 29O tenki halo santu sasaan nee, nunee sasaan nee sei sai santu liu. No ema hotu nebee kona sasaan nee sei sai santu. 30O sei foo unsaun no konsagra Arão ho nia oan mane sira, nunee sira bele serví Hau nudar saserdote. 31No o tenki dehan ba ema Israel sira, ‘Ida nee mak mina unsaun santu ba Hau durante o nia jerasaun hotu. 32Keta fakar mina nee ba ema baibain nia isin, no la bele halo mina hanesan nee tuir nia medida. Ida nee mak mina nebee santu, no mina nee tenki sai santu ba imi. 33Ema nebee kahur mina morin hanesan nee ka fakar mina nee ba ema liur sira nia isin, imi tenki halakon tiha ema nee hosi ninia povu.’”

Insensu Nebee Santu

34 Nai dehan ba Moisés, “Foti buat morin nee: ai been morin, onika, gabanu no insensu,#30:34 Insensu nee mai hosi ai been nebee bele halo mos mina morin. Ai been nee hosi ai badak (Boswellia sacra). Haree mos iha Levítiku 2:1, Nehemias 13:5, Kanta 3:6, Isaias 66:3 no Mateus 2:11. no tetu hanesan. 35O tenki halo insensu hosi buat morin nee, hanesan ema matenek nain ida mak halo tuir nia metodu. Kahur hamutuk, halo moos no santu. 36O tenki deut insensu balu nee too uut, no o tenki tau uitoan iha Arka Aliansa nia oin, iha Tenda Enkontru nia laran. Iha nebaa Hau sei hasoru o. Buat nee tenki sai santu liu ba o. 37No insensu nebee imi kahur nee, ida nee mos o keta halo tuir nia medida ba o nia aan rasik. O tenki haree ida nee nudar buat nebee santu ba Nai. 38Ema nebee halo buat morin nee hodi nia bele horon, o tenki halakon nia hosi ninia povu.

Currently Selected:

Exodu 30: BK

Highlight

Copy

Compare