Exodu 31
31
Hili Belazalel no Aholiabe
1 Nai dehan ba Moisés, 2“Haree ba, Hau bolu ona Belazalel, oan hosi Uri, oan hosi Hur, nebee hosi suku Judá. 3Hau halo ona nia nakonu ho Espíritu Maromak nian, ho matenek no kompriensaun no konhesimentu, hodi halo servisu oi-oin. 4Nia bele halo planu diak, hodi servisu ho osan mean, osan mutin no riti; 5no prepara fatuk no monta sira; no bahat ai no bele halo servisu oi-oin. 6No Hau hili ona Aoliabe iha ninia sorin, nebee Ahisamake nia oan, hosi suku Dan. No mos Hau foo tiha ona matenek ba ema matenek hotu nia fuan laran. Nunee sira bele halo buat hotu tuir orden nebee Hau foo ona ba o: 7Tenda Enkontru, Arka Aliansa, Matan Dame nebee iha Arka leten, no sasaan hotu iha Tenda nee, 8no meza ho nia sasaan, kandelabru moos ho nia sasaan hotu, meza sunu insensu nian, 9no altár oferta tunu motuk nian ho nia sasaan hotu, basia fasi nian ho nia fatin, 10no ropa ministériu nian, ropa santu saserdote Arão nian, no ropa ba Arão nia oan mane sira, hodi halao ministériu nudar saserdote, 11no mina unsaun no insensu morin ba fatin Santu; tuir orden hotu nebee Hau foo ona ba o. Sira tenki halo buat hotu nee.”
Loron Nebee Santu
12 Nai dehan ba Moisés, 13“Hatete ba ema Israel sira, nunee, “Tebes imi tenki halo tuir Hau nia loron Sabdu. Tanba ida nee mak sinál entre Hau ho imi, hosi jerasaun ba jerasaun, nunee imi hatene katak Hau mak Nai, nebee halo imi santu. 14Imi tenki kuidadu loron Sabdu, tanba ida nee mak loron santu ba imi. See mak kontra loron nee, nia tenki simu kastigu mate. Tanba see deit nebee halo servisu iha loron nee, imi tenki halakon tiha ema nee hosi povu nia leet. 15Imi tenki servisu iha loron neen nia laran, maibee iha loron hitu imi tenki deskansa iha loron Sabdu nee, nebee loron santu ba Nai. See deit nebee halo servisu iha loron Sabdu, nia sei simu kastigu mate. 16Nunee ema Israel sira tenki halo tuir loron Sabdu, no halao loron Sabdu nee, hosi jerasaun ba jerasaun, tanba ida nee mak aliansa too tinan ba tinan. 17Ida nee mak sinál entre Hau ho ema Israel sira, too tinan ba tinan. Tanba iha loron neen nia laran, Nai halo lalehan ho mundu, no iha loron hitu Nia para servisu hodi deskansa.”
18No bainhira Nai koalia hotu ona ho Moisés iha foho Sinai, Nia foo testemunha iha tahan rua ba Moisés, nee mak fatuk belar rua nebee Maromak rasik mak hakerek ho Ninia liman fuan.
Currently Selected:
Exodu 31: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
