Exodu 38

Halo Altár Sunu Oferta No Basia

1Nia halo altár nebee sunu oferta tunu motuk hosi ai kasi, nebee naruk metru rua sentímetru rua-nulu resin rua, no luan metru rua sentímetru rua-nulu resin rua. Nunee altár nee kuadradu. Nia aas metru ida sentímetru tolu-nulu resin lima. 2Nia halo dikur sira iha lidun haat. Dikur sira nee sai ida deit ho altár no nia falun altár ho riti. 3Nia halo sasaan hotu nebee presiza ba altár nee: sanan, kanuru, manko, garfu no bikan ahi klaak sira. Nia halo sasaan hotu nee hosi riti. 4Nia halo redi ba altár nebee homan ho riti. No nia tau redi nee iha altár nia ibun okos iha altár laran, nebee iha klaran. 5Nia fui kadeli haat hodi monta iha redi riti nia lidun haat. Kadeli nee sai fatin hodi hatama ai naruk sira. 6Nia halo ai naruk sira nee hosi ai kasi, no falun sira ho riti. 7No nia hatama ai naruk sira nee ba kadeli iha altár nia sorin sira. Nunee ema bele lori altár. Nia halo altár nee mamuk iha laran no halo hosi ai kabelak.

8Nia halo basia no nia tuur fatin hosi riti. Nia hetan riti nee hosi lalenok#38:8 Iha tempu uluk sira halo lalenok hosi riti nebee halo moos too nabilan. nebee mai hosi feto sira nebee hein iha odamatan ba Tenda Enkontru.

Halo Fatin Luan

9Nia halo fatin luan nebee haleu Tenda: iha parte súl nia halo kortina sira ba sorin nee hosi hena diak, nebee naruk metru haat-nulu resin lima. 10Nia halo ai riin rua-nulu, no ain rua-nulu ba ai riin sira nee hosi riti. Nia halo kait sira iha ai riin sira nee no sasaan tutan nee nia halo hosi osan mutin. 11Iha parte norte, nia halo kortina sira nebee naruk metru haat-nulu resin lima. Nia halo ai riin rua-nulu no ain rua-nulu hosi riti. Nia halo kait sira iha ai riin sira nee no sasaan tutan nee hosi osan mutin. 12Iha parte oeste: iha kortina sira nebee naruk metru rua-nulu resin rua ho balu, ho ai riin sanulu no ain sanulu. Nia halo kait sira iha ai riin sira nee no sasaan tutan nee hosi osan mutin. 13Iha parte leste nebee metru rua-nulu resin rua ho balu, 14kortina sira iha odamatan nia sorin ida naruk metru neen sentímetru hitu-nulu resin lima, ho ai riin tolu no ain tolu. 15No mos hanesan nee ba sorin seluk. Iha odamatan nia sorin rua iha Tenda nia fatin, nia halo kortina sira nebee naruk mak metru neen sentímetru hitu-nulu resin lima, ho ai riin tolu no ain tolu. 16Kortina hotu nebee haleu Tenda fatin nee, nia halo hosi hena diak. 17Ain sira ba ai riin sira nee, nia halo hosi riti. No kait sira iha ai riin sira nee no sasaan tutan nee, nia halo hosi osan mutin. No nia falun nia ulun ho osan mutin. No iha ai riin sira hotu iha Tenda fatin nee nia halo sasaan tutan ho osan mutin. 18Kortina ba portaun atu tama ba Tenda fatin nee sira suku borda ho kór oi-oin, kór azúl, kór uvas no kór mean, no hena diak. Nia halo kortina nee luan metru sia no aas metru rua sentímetru rua-nulu resin lima, tuir kortina nia aas iha Tenda fatin. 19No odamatan nee iha ai riin haat. Nia halo ain haat nee hosi riti, maibee kait sira nee nia halo hosi osan mutin. No nia halo nia ai riin nia ulun no nia sasaan tutan sira hosi osan mutin. 20Nia halo estaka hotu ba Tabernakulu no fatin nebee haleu Tabernakulu nee halo hosi riti.

Folin Hodi Harii Tabernakulu

21Ida nee mak lista folin sira atu harii Tabernakulu, nebee Tabernakulu Aliansa. Sira sura folin tuir orden hosi Moisés. Ema Levi toma konta ba ida nee, liu hosi Itamar nia liman, nebee oan hosi Arão, saserdote nee. 22Belazalel, Uri nia oan, Hur nia oan, hosi suku Judá, halo buat hotu tuir orden nebee Nai foo ba Moisés. 23Nia hamutuk ho Aoliabe, Ahisamake nia oan, hosi suku Dan, nebee badaen ida. Nia ema matenek ida no nia ema ida nebee hatene suku borda ho kór oi-oin hosi kabas kór azúl, kór uvas no kór mean, no hosi hena diak.

24Osan mean hotu nebee uza ba servisu hotu hodi harii Fatin Santu nee, nebee osan mean hosi oferta, mak tonelada ida, tetu tuir Fatin Santu nia sistema.#38:24 Ebreu dehan ‘talentu rua-nulu resin sia, sekel atus hitu tolu-nulu tuir Fatin Santu nia sekel’ nebee talentu ida todan kilu tolu-nulu resin lima no sekel ida mak grama sanulu resin rua. Nunee sira sukat hanesan nee iha versíkulu nebee tuir mai. 25Osan mutin nebee hetan bainhira sura oferta hosi komunidade nee mak liu tonelada tolu ho balu, tetu tuir Fatin Santu nia sistema. 26Ema ida-idak selu grama neen, nebee osan besi sorin ida, hosi ema ida-idak tuir sira nia naran iha lista sensus nian. Sira sura ema nebee halo tinan rua-nulu ba leten. Ema hamutuk rihun atus neen tolu atus lima lima-nulu (603.550). 27Osan mutin tonelada tolu ho balu, sira uza hodi fui ain Tenda nian, no ain ba veo. Nee mak ain atus ida nebee uza tonelada tolu ho balu, nunee todan kilograma tolu-nulu ho balu kada ain ida. 28Hosi osan mutin restu nebee kilograma rua-nulu grama atus tolu nee, nia halo besi kait sira hodi tutan ba ai riin, no falun ai riin tutun sira no halo sasaan tutan nee. 29Riti nebee sira foo iha oferta nee mak tonelada rua ho balu. 30Nia uza riti nee hodi halo ain ba ai riin sira iha odamatan ba Tenda Enkontru, no altár riti, no nia redi riti, no sasaan hotu ba altár nee, 31no ain ba ai riin iha fatin nebee haleu Tabernakulu, ain odamatan nebee tama Tabernakulu fatin, no estaka hotu ba Tabernakulu, no estaka hotu ba fatin nebee haleu Tabernakulu.

Currently Selected:

Exodu 38: BK

Highlight

Copy

Compare