Exodu 39
39
Halo Ropa Saserdote Nian
1Sira uza kabas kór azúl, kór uvas no kór mean, hodi halo ropa ministériu nian hodi halao ministériu iha Fatin Santu. Sira halo ropa santu sira ba Arão, tuir Nai nia orden ba Moisés.
2Nia halo faru efode hosi osan mean, kabas kór azúl, kór uvas no kór mean, no hena diak. 3Sira tuku osan mean hodi halo belar no mihis. Depois nia koa hodi halo kabas osan mean. Nia uza kabas nee hodi suku ho hena kór azúl, kór uvas no kór mean, no hena diak. No sira halo ho servisu matenek. 4Sira halo alat rua iha kabaas fatin nebee tau ba efode, iha ninin rua, iha nia tutan fatin. 5Sira halo sintu tais nebee kesi iha efode hanesan faru efode nebee halo hosi osan mean, kabas kór azúl, kór uvas no kór mean, no hena diak, tuir Nai nia orden ba Moisés.
6Sira halo fatuk onix rua, nebee monta iha osan mean, no sira hakerek Israel nia oan sira nia naran, hanesan sira hakerek iha karimbu. 7Depois nia tau fatuk rua nee iha faru efode nia kabaas fatin, hodi foo hanoin ba ema Israel sira, tuir Nai nia orden ba Moisés.
8Nia halo alat taka hirus matan ho servisu matenek. Nia halo hanesan faru efode, hosi osan mean, kabas kór azúl, kór uvas no kór mean, no hena diak. 9Sira halo alat taka hirus matan nee kuadradu, dobra ba rua, naruk sentímetru rua-nulu resin rua no luan sentímetru rua-nulu resin rua. 10Sira monta fatuk ho linha haat, iha linha primeiru: rubi, topáziu no berilu, ida nee mak linha primeiru; 11iha linha segundu: turkeza, safira no diamante; 12iha linha terseiru: jasintu, agata no ametista, 13iha linha ba dala haat: krizolitu, onix no jaspe. Sira monta iha fatin osan mean hodi kaer metin. 14Sira halo fatuk sanulu resin rua, hodi hakerek Israel nia oan sira nia naran nebee ema nain sanulu resin rua. Sira hakerek hanesan iha karimbu, naran ida ba fatuk ida-idak hosi suku sanulu resin rua iha Israel. 15Sira halo korenti sira iha alat taka hirus matan nia rohan, sira halo hanesan tali nebee sasin ho osan mean moos. 16Sira halo fatin osan mean rua no kadeli osan mean rua, no sira tau kadeli rua nee iha alat taka hirus matan nia rohan. 17Sira tau korenti osan mean rua iha kadeli rua nebee monta iha alat taka hirus matan nia rohan. 18No korenti nia rohan rua seluk nee sira kesi iha fatin osan mean rua. Nunee sira taka iha kabaas fatin iha faru efode, iha nia oin. 19Sira halo kadeli rua ho osan mean no kesi iha alat taka hirus matan nia rohan, iha laran, nebee hasoru malu ho faru efode. 20Sira halo kadeli rua tan hosi osan mean no kesi iha faru efode nia sorin rua, iha parte kraik iha oin, besik fatin tutan malu, iha faru efode nia sintu tais nia leten. 21Depois sira kesi alat taka hirus matan ho nia kadeli sira ba iha kadeli faru efode nian ho tali azúl, nunee iha faru efode nia sintu tais nia leten. No alat taka hirus matan nee la bele losu hosi faru efode tuir Nai nia orden ba Moisés.
22Nia halo mos unuk efode nian nebee homan ho kór azúl. 23No unuk nee iha kuak nebee iha klaran, no sira suku halo gola ida iha kuak kakorok nee nia ninin, nunee kuak la bele naklees. 24Iha unuk nia ninin sira halo ai fuan delima hosi kabas kór azúl, kór uvas no kór mean, no hena diak. 25Sira halo mos sinu kiik sira hosi osan mean nebee moos no sinu kiik tau kahur malu ho ai fuan delima, nebee haleu unuk nia ninin iha kraik. 26Nunee sinu kiik ida depois ai fuan delima ida, no sinu kiik ida depois ai fuan delima ida, tu-tuir malu haleu unuk nia ninin iha okos. Sira halo nunee hodi halao ministériu, tuir Nai nia orden ba Moisés.
27Sira halo batina sira ba Arão no nia oan mane sira hosi hena diak nebee sira homan. 28Sira halo turbante hosi hena diak, no xapeu hosi hena diak, no mos kalsa sira nebee halo hosi hena diak. 29Sira halo sintu ida hosi hena diak nebee suku borda ho kabas kór azúl, kór uvas no kór mean, tuir Nai nia orden ba Moisés.
30Sira mos halo kaebauk santu nebee tau iha reen toos hosi osan mean nebee moos, no iha kaebauk nee sira hakerek hanesan karimbu: Santu ba Nai. 31Sira uza tali azúl hodi kesi kaebauk nee ba turbante, tuir Nai nia orden ba Moisés.
Moisés Simu Sasaan Tabernakulu
32Nunee servisu hotu ba Tabernakulu nebee hanaran Tenda Enkontru nee kompletu ona. Ema Israel sira halo tuir orden hotu nebee Nai manda ona ba Moisés; sira halo duni. 33Sira lori Tabernakulu nee ba Moisés, inklui Tenda ho nia sasaan hotu: nia kait, ai kabelak, ai naruk, ai riin no ai riin nia ain, 34no lona hosi bibi malae aman nia kulit sira nebee mean, no lona hosi animál seluk nia kulit sira, no veo nebee taka Arka, 35Arka Aliansa ho ai naruk, Matan Dame, 36meza ho nia sasaan hotu no paun Prezensa nian, 37kandelabru hosi osan mean nebee moos, no nia ahi oan sira nebee monta iha sira nia fatin, no nia sasaan hotu, no mina hodi halo naroman, 38altár hosi osan mean, mina unsaun, insensu nebee morin, no kortina ba odamatan Tenda nian, 39altár riti ho nia redi riti, nia ai naruk sira, no nia sasaan hotu, no basia ho nia tuur fatin, 40no kortina sira ba fatin nebee haleu Tabernakulu, nia ai riin no nia ai riin nia ain, no kortina ba odamatan ba fatin nee, nia tali no nia estaka, no nia sasaan hotu nebee uza hodi halao ministériu iha Tabernakulu nee, iha Tenda Enkontru, 41no ropa ministériu nian hodi halao ministériu iha Fatin Santu, no ropa santu ba saserdote Arão, no nia oan mane sira nia ropa, hodi halao ministériu nudar saserdote. 42Buat hotu nebee Nai manda ona ba Moisés, nunee ema Israel sira halo kompletu. 43No Moisés haree servisu hotu nee, no tebes sira halo tuir buat nebee Nai manda ona; nee duni sira halo. Nunee Moisés foo bensaun ba sira.
Currently Selected:
Exodu 39: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
