Exodu 40

Moisés Harii Nai Nia Tenda Enkontru

1 Nai koalia ho Moisés, no Nia dehan, 2“Iha loron primeiru iha fulan primeiru, o tenki harii Hau nia Tabernakulu, nebee Tenda Enkontru. 3Hatama Arka Aliansa ba Tenda nee, no tau veo iha Arka Aliansa nia oin. 4Iha Tenda laran, tau mos meza ida no tau sasaan hotu tu-tuir malu iha meza leten. Hatama kandelabru no halakan ahi oan sira ba. 5Tau altár osan mean hodi sunu insensu iha Arka Aliansa nia oin no tara kortina iha Tabernakulu nia odamatan oin. 6No tau altár oferta tunu motuk nian iha Tabernakulu nia oin nebee iha Tenda Enkontru. 7Tau basia entre Tenda Enkontru no altár no tau bee iha laran. 8Depois monta kortina nebee haleu fatin Tenda nian no tara kortina iha fatin nee nia oin.

9Depois o sei foti mina unsaun hodi kose ba Tabernakulu no sasaan hotu-hotu iha laran hodi konsagra sira. Nunee buat hotu nee sei sai santu. 10Nunee mos o sei kose mina ba altár oferta tunu motuk nian no nia sasaan hotu hodi konsagra altár nee. No altár nee sei sai santu liu. 11Kose mina ba basia no nia ain fatin hodi konsagra nia. 12Depois o sei haruka Arão ho nia oan sira ba iha Tenda Enkontru nia odamatan no fasi sira ho bee. 13O sei foo hatais ropa saserdote nian ba Arão. Kose mina ba nia no konsagra nia hodi nia bele serví Hau nudar saserdote. 14Nunee mos ho ninia oan sira, bolu sira mai no tau faru ba sira. 15Kose mina ba sira hanesan o kose mina ba sira nia aman hodi sira bele serví Hau nudar saserdote. Liu hosi unsaun nee, sira nia suku sei serví Hau nafatin nudar saserdote, hosi jerasaun ba jerasaun.”

16Moisés halo tuir orden hotu nee hosi Nai; nia halo tuir duni. 17Nunee iha loron ida, fulan ida, tinan segundu, Tabernakulu nee hamriik. 18Moisés harii Tabernakulu nee. Nia tau ain, ai kabelak sira, ai naruk sira no harii ai riin sira nee. 19Depois nia monta hena iha Tabernakulu fatin nee no dada lona hodi taka Tenda nia kakuluk tuir Nai nia orden ba Moisés. 20Tuir mai, nia foti Nai nia aliansa no tau iha Arka nia laran. Depois nia monta Arka nia ai naruk no tau Matan Dame iha Arka leten hodi taka Arka nee. 21Depois nia tau Arka nee iha Tabernakulu laran, no tara veo iha oin, hodi subar Arka Aliansa, tuir Nai nia orden ba Moisés. 22Nia tau meza iha Tenda Enkontru laran, nebee iha Tabernakulu nia parte norte, iha veo nia sorin liur. 23No tau iha meza leten nee paun nebee iha Nai nia oin, tuir Nai nia orden ba Moisés. 24Moisés tau kandelabru iha Tenda Enkontru laran, iha meza nia oin, iha Tabernakulu nia parte súl. 25No nia sunu ahi oan sira nee iha Nai nia oin, tuir Nai nia orden ba Moisés. 26Nia tau Altár osan mean iha Tenda Enkontru laran, iha veo nia oin. 27No nia sunu insensu morin, tuir Nai nia orden ba Moisés. 28Moisés tara kortina iha Tabernakulu nia odamatan oin. 29No iha Tabernakulu nia Tenda Enkontru nia odamatan sorin nia tau altár oferta tunu motuk nian. Iha altár nia leten nia oferese oferta tunu motuk no oferta trigu nian, tuir Nai nia orden ba Moisés. 30Nia tau basia iha Tenda Enkontru no altár nia klaran, no nia tau bee ba basia laran hodi hariis. 31No Moisés, Arão ho nia oan sira fasi liman no ain iha nebaa. 32Bainhira sira atu tama ba Tenda Enkontru, ka besik ba altár, sira hariis, tuir Nai nia orden ba Moisés. 33Moisés monta kortina nebee haleu Tabernakulu no altár. No nia tara kortina iha portaun ba fatin nee. Nunee Moisés halo remata servisu nee hotu.

Nai Falun Tiha Tenda Enkontru

34Depois kalohan falun Tenda Enkontru, no fatin nee sai nakonu ho Nai nia glória. 35Tanba nee Moisés la bele tama ba Tenda Enkontru laran. Tanba kalohan hela iha nebaa, no Tenda nee sai nakonu ho Nai nia glória. 36Bainhira kalohan nee sae hosi Tenda, ema Israel sira lao sai fali tuir sira nia viajen. 37Maibee bainhira kalohan nee la sae, sira mos la sai hosi nebaa too loron nebee kalohan nee mos sae. 38Nai nia kalohan hela iha Tabernakulu nee nia leten hanesan kalohan iha loron no ahi iha kalan. Nunee Israel nia uma kain tomak bele haree ida nee durante sira nia viajen hotu.

Currently Selected:

Exodu 40: BK

Highlight

Copy

Compare