Exodu 4

Maromak Foo Kbiit Ba Moisés

1Depois Moisés hataan, “Maibee oinsaa, se ema Israel sira la fiar no la foo atensaun ba hau nia liafuan nee? No sira sei dehan, ‘Nai la hatudu aan ba ita.’” 2Nunee Nai husu ba nia, “Saida mak iha o nia liman nee?” Nia hataan, “Ai tonka.” 3Nai hatete, “Soe ida nee ba rai.” Moisés soe ai tonka ba rai, no ai tonka nee nakfilak aan ba samea ida. Moisés halai kedas hosi samea nee. 4Nai hatete ba Moisés, “Lolo o nia liman no kaer nia ikun.” Moisés lolo liman no kaer samea nee, nunee samea nakfilak aan ba ai tonka iha nia liman. 5Nai hatete, “Halo nunee hodi ema Israel sira fiar katak Hau, Nai, nebee sira nia bei-ala nia Maromak, Abraão nia Maromak, Isak nia Maromak no Jacó nia Maromak, mak hatudu aan ba o.” 6Nai hatete tan ba nia, “Agora, hatama o nia liman ba o nia batina laran.” Nia hatama ninia liman ba ninia batina laran. Depois nia dada sai ninia liman no liman nee mutin, tanba moras lepra, no liman nee mutin hanesan neve. 7Depois Nai hatete, “Hatama fali o nia liman ba o nia batina laran.” Nia hatama fali ninia liman ba ninia batina laran, no bainhira nia dada sai fali ninia liman hosi batina laran, liman nee diak fali hanesan ninia isin tomak. 8“Tuir mai, se sira lakohi fiar ba o, ka sira la foo atensaun ba sinál primeiru, mak sira sei fiar ba sinál segundu. 9No se sira la fiar nafatin ba sinál rua nee no lakohi rona o nia liafuan, entaun o sei baa kuru bee uitoan hosi Mota Nilu no fakar iha rai maran, no bee nee sei sai raan iha rai maran.”

10Depois Moisés dehan ba Nai, “Oh hau nia Nai, hau laos ema ida nebee matenek atu koalia, hori uluk kedas no too agora, bainhira Nai koalia hela ho hau. Maibee hau nia ibun todan no nanaal toos.” 11Maibee Nai dehan ba nia, “See mak halo ema nia ibun? See mak halo ema monok ka ema diuk? Ka halo ema haree ka ema delek? Laos Hau, Nai? 12Entaun baa deit. Hau sei akompanha o nia ibun no hanorin o buat nebee o sei koalia.” 13Maibee Moisés dehan, “Oh hau nia Nai, favór ida, haruka deit ema seluk.” 14Depois Nai sai hirus tan ho Moisés no hatete, “Laos Arão iha nebaa, nebee o nia maun, ema Levi nee? Hau hatene katak nia matenek atu koalia. Agora nia lao dadaun iha dalan atu mai hasoru o, no bainhira nia haree o, nia sei haksolok iha nia fuan laran. 15O sei koalia ho nia no tau liafuan nee iha nia ibun. Hau sei akompanha o nia ibun no ninia ibun no hanorin imi buat nebee imi sei halo. 16Nia tenki koalia hodi o nia naran iha povu nia oin. Nia sei sai hanesan o nia ibun no o sei sai hanesan Maromak ba nia. 17No lori ai tonka nee iha o nia liman hodi o bele halo sinál sira.”

Moisés Fila Ba Ejitu

18Moisés fila ba Jetro nia uma, nebee nia banin mane, no dehan ba nia, “Favór ida, foo lisensa hodi hau bele fila ba Ejitu hodi vizita hau nia maun-alin sira hodi haree sira sei moris ka lae.” Jetro hataan ba Moisés, “Baa ho dame.”#4:18 Iha lian Ebreu, ‘dame’ nee mak salóm. 19No Nai dehan ba Moisés iha rai Midian, “Fila ba Ejitu, tanba ema hotu nebee hakarak oho o nee mate ona.” 20Entaun Moisés bolu nia feen ho nia oan mane sira no tula sira ho kuda buru no sira fila fali hamutuk ba rai Ejitu. No Moisés kaer Maromak nia ai tonka nee iha ninia liman.

21 Nai hatete ba Moisés, “Bainhira o fila tiha ba Ejitu o tenki halo milagre sira nee hotu iha Faraó nia oin, milagre sira nebee Hau foo ona ba o. Maibee, Hau sei halo nia fuan toos, hodi nia la husik povu nee atu baa. 22Nunee o tenki hatete ba Faraó, ‘Nai hatete nunee, “Israel mak Hau nia oan mane boot, 23nee duni Hau dehan ba o, ‘Husik Hau nia oan baa, hodi nia bele serví Hau.’ Maibee se o la hataan atu husik nia baa, mak Hau sei oho o nia oan mane boot!”’”

24Maibee iha dalan klaran, iha fatin ida nebee sira toba kalan, Nai hasoru Moisés atu oho nia. 25Depois Zipora foti fatuk kroat ida hodi tesi ninia oan mane nia oin-lulik nia kulit rohan#4:25 Lee kona ba halo sunat iha Jénesis 17:11 no nota. no kose buat nee ba Moisés nia ain no dehan, “Ita mak laen ida ke raan mai hau.” 26Iha tempu nee nia dehan ida nee, “Ita laen ida ke raan,” tanba iha relasaun ho sirkunsizaun. Nunee Nai husik Moisés.

27Iha tempu nee, Nai hatete ba Arão, “O ba hasoru Moisés iha rai fuik.” Arão baa no nia hasoru ninia alin iha Maromak nia foho, no Arão rei nia. 28Moisés konta ba Arão buat hotu nebee Nai hatete ba nia, bainhira Nai haruka nia, no mos milagre sira nebee nia tenki halo. 29Tuir mai Moisés no Arão baa no halibur lider sira hotu hosi ema Israel sira. 30Arão konta ba sira liafuan hotu nebee Nai hatete ba Moisés, no Moisés halo milagre sira iha ema sira nee nia oin. 31Entaun sira hotu fiar, no bainhira sira rona katak Nai vizita ona povu Israel no haree sira nia terus, sira hakneak hodi adora.

Currently Selected:

Exodu 4: BK

Highlight

Copy

Compare