Exodu 5

Servisu Todan Halo Tijolu

1Depois Moisés no Arão baa hasoru Faraó, no dehan ba nia, “Nai, Israel nia Maromak, hatete nunee, ‘Husik Hau nia povu atu baa, hodi sira bele halo selebra ba Hau iha rai fuik.’” 2Maibee Faraó dehan, “See mak Nai atu nunee hau tenki rona tuir Ninia liafuan hodi husik ema Israel sira baa? Hau la konhese Nai nee, no hau sei la husik ema Israel sira atu baa.” 3Depois sira dehan, “Ema Ebreu sira nia Maromak hasoru ona ami. Favór ida, husik ami lao too loron tolu ba rai fuik, hodi halo sakrifísiu ba Nai, ami nia Maromak, nunee Nia la haruka moras ka surik atu kona ami.” 4Maibee liurai hosi Ejitu hatete ba sira, “Moisés no Arão, tanba saa mak imi hakarak hasai povu nee hosi sira nia servisu? Baa ona, no halo imi nia servisu.” 5Faraó hatete tan, “Tebes, ema hosi rai nee agora barak ona. Tanba saa mak imi hapara sira hosi sira nia servisu!” 6Iha loron nee mos, Faraó foo orden ba povu nee nia mandór sira, no sira nia xefi sira, 7“Keta foo tan duut maran ba sira hanesan baibain hodi halo tijolu. Husik sira rasik atu baa buka duut. 8Maibee sira tenki halo nafatin tijolu sira hanesan uluk no la bele hamenus kuantidade nee, tanba sira baruk-teen. Tanba nee mak sira husu beibeik, ‘Husik ami baa hodi halo sakrifísiu ba ami nia Maromak.’ 9Aumenta sira nia servisu, nunee sira sei kontinua servisu nafatin no la bele rona liafuan bosok nee.”

10Nunee povu nia mandór sira no sira nia xefi sira sai ba no dehan ba povu, “Faraó hatete nunee: Hau la foo ona duut ba imi. 11Imi rasik baa buka duut iha fatin nebee deit imi bele hetan. Maibee imi nia servisu sei la hamenus.” 12Nunee ema Israel sira lao lemo rai iha Ejitu tomak atu halibur duut kain hodi uza nudar kain maran.#5:12 Ema halo tijolu ho rai liat kahur ho rai henek no duut kain nebee maran hanesan hare kain. Ho ida nee ita bele halo tijolu nebee toos no forti. 13Depois mandór sira obriga sira dehan, “Halo imi nia servisu loro-loron nian too hotu, hanesan uluk bainhira imi simu deit duut.” 14Depois Faraó nia mandór sira baku ema Israel sira nia xefi servisu sira, nebee mandór sira mak hili ona nee, no husu ba sira, “Tanba saa mak ohin no horiseik imi la halo tijolu hotu hanesan baibain?”

15Nunee ema Israel sira nia xefi sira baa hasoru Faraó no hakilar, “Tanba saa mak ita boot halo hanesan nee ba ita boot nia atan oan sira nee? 16Mezmu duut la foo ona mai ami, maibee sira dehan mai ami, ‘Halo tijolu sira!’ No sira baku tan ita boot nia atan sira nee, maibee tuir lo-loos, ita boot nia povu mak sala.” 17Maibee nia hatete, “Imi baruk-teen! Imi baruk-teen deit! Tanba nee mak imi hatete, ‘Husik ami baa halo sakrifísiu ba Nai!’ 18Nunee duni, agora baa no halo servisu! Hau sei la foo tan duut ba imi, maibee imi tenki halo tijolu too kuantidade nebee hanesan uluk.” 19Nunee ema Israel sira nia xefi sira hatene katak sira hetan tempu susar, tanba liafuan nee, “Imi la bele hamenus tijolu nebee imi halo loro-loron.” 20Bainhira sira sai hosi enkontru ho Faraó, sira hasoru Moisés no Arão nebee hein hela iha dalan. 21Depois xefi sira dehan ba sira nain rua, “Diak se Nai haree imi nia hahalok no kastigu imi, tanba imi halo ami nia naran dois iha Faraó nia oin, no nia atan sira nia oin, nunee imi foo ona surik iha sira nia liman hodi oho ami.”

22Entaun Moisés baa no halo orasaun ba Nai dehan, “Nai, tanba saa mak O foo terus ba povu nee? Tanba saa mak O haruka hau? 23Tanba dezde hau baa hasoru Faraó no koalia ho nia hodi O nia naran, nia halo aat ba povu nee, no O la foo liberdade ba O nia povu.”

Currently Selected:

Exodu 5: BK

Highlight

Copy

Compare