Exodu 8

Kastigu Ba Dala Rua: Manduku

1 Nai dehan ba Moisés, “Baa hasoru Faraó no hatete ba nia, ‘Nai hatete nunee: Husik Hau nia povu baa, atu nunee sira bele serví ba Hau. 2Se o lakohi husik sira baa, Hau sei kastigu o nia rai Ejitu tomak ho manduku. 3Mota Nilu nee sei iha manduku barak demais, no sira sei sae ba o nia uma no iha o nia kuartu, too iha o nia kama. Sira sei tama ba o nia atan sira nia uma, no ba o nia povu, no iha fugaun no iha fatin deut paun mos. 4Manduku sira nee sei sae ba no kona o, no o nia povu no mos o nia atan hotu nia isin lolon.’” 5Nai dehan ba Moisés, “Hatete ba Arão: Lolo o nia liman ho ai tonka nee ba Mota Nilu, no bee dalan sira no bee lihun sira, hodi halo manduku sira mosu mai ba rai Ejitu nee.” 6Depois Arão lolo liman ba bee fatin sira iha Ejitu. No manduku sira komesa mosu no taka rai Ejitu tomak. 7Maibee matan dook sira mos bele halo hanesan nee ho sira nia lulik, nunee sira mos halo manduku sira mosu iha rai Ejitu.

8Depois Faraó bolu Moisés no Arão no hatete, “Halo orasaun ba Nai, hodi hasai tiha manduku sira hosi hau no hosi hau nia povu, nunee hau sei husik povu nee baa, hodi sira bele halo sakrifísiu ba Nai.” 9Moisés dehan ba Faraó, “O bele hili tempu atu haruka hau halo orasaun ba Nai kona ba o, o nia atan sira no o nia povu, hodi hasai manduku sira nee hosi imi no imi nia uma. Nunee manduku sira bele hela deit iha Mota Nilu.” 10Nunee Faraó hataan, “Aban.” Depois Moisés dehan, “Ida nee sei akontese tuir o nia liafuan, hodi o bele hatene katak la iha ida hanesan Nai, ami nia Maromak. 11Nunee manduku sira nee sei sai hosi o, hosi o nia uma sira, hosi o nia atan sira, no hosi o nia povu. No manduku sira nee sei hela deit iha Mota Nilu.” 12Depois Moisés no Arão sai hosi Faraó. Moisés halo orasaun ba Nai kona ba manduku sira nebee Nia haruka mai hasoru Faraó. 13No Nai halo tuir Moisés nia liafuan. Nunee manduku sira nee mate no lakon hosi uma, hosi aldeia sira no hosi rai sira nee. 14Sira halibur manduku mate barak no rai nee dois loos. 15Maibee bainhira Faraó haree katak ida nee diak ona, ninia fuan sai toos no nia lakohi rona sira nain rua, hanesan Nai koalia ona.

Kastigu Ba Dala Tolu: Susuk

16 Nai dehan ba Moisés, “Hatete ba Arão: Lolo o nia ai tonka nee no baku rai rahun hodi sai kutun iha rai Ejitu tomak.” 17No sira halo tuir. Arão lolo liman ho ai tonka no baku rai. Depois kutun sira mai no tata ema no animál sira. Rai rahun sira hotu sai kutun iha Ejitu tomak. 18Matan dook sira mos koko halo hanesan nee ho sira nia lulik maibee sira la bele. Nunee kutun sira nee tata ema no animál. 19Depois matan dook sira nee hatete ba Faraó, “Ida nee mak Maromak nia liman.” Maibee Faraó nia fuan toos, no nia lakohi rona sira, hanesan Nai koalia ona.

Kastigu Ba Dala Haat: Lalar

20 Nai dehan ba Moisés, “Hadeer dadeer-saan sedu no hein Faraó iha tempu nebee baibain nia sai atu baa mota. No hatete ba nia, ‘Nai hatete nunee: Husik Hau nia povu baa, atu nunee sira bele serví ba Hau. 21Tanba se o la husik Hau nia povu baa, tebes Hau sei haruka lalar barak mai iha o, o nia atan sira, o nia povu no o nia uma sira. Nunee ema Ejitu sira nia uma no rai iha fatin nebee sira hamriik sei sai nakonu ho lalar barak. 22Maibee iha tempu nebaa Hau sei haketak rai Gosen, tanba Hau nia povu sira hela iha nebaa. Nunee rai iha nebaa sei la hetan lalar barak, no o sei hatene katak Hau, Nai, iha rai laran nee. 23Tanba Hau sei haketak Hau nia povu hosi o nia povu. Aban sinál nee sei akontese.’” 24Nai halo hanesan nee duni. Lalar barak demais mai iha Faraó nia uma no iha nia atan sira nia uma no iha rai Ejitu tomak. Rai nee sai aat tanba lalar barak nee.

25Depois Faraó bolu Moisés no Arão, no nia hatete ba sira, “Baa ona, halo sakrifísiu ba imi nia Maromak iha rai nee.” 26Maibee Moisés hatete, “Ami la bele halo hanesan nee. Tanba sakrifísiu nebee ami atu halo ba Nai, ami nia Maromak, nee ladiak ba ema Ejitu sira. Bainhira ami halo sakrifísiu nebee la diak ba ema Ejitu sira, iha sira nia oin, laos sira sei tuda ami ho fatuk? 27Ami tenki lao loron tolu baa iha rai fuik hodi halo sakrifísiu nee ba Nai, ami nia Maromak, hanesan Nia manda ona mai ami.” 28Depois Faraó hataan, “Hau sei husik imi baa hodi halo sakrifísiu ba Nai, imi nia Maromak, iha rai fuik. Maibee imi keta baa dook liu. No halo orasaun ba Nai kona ba hau.” 29Depois Moisés dehan, “Agora, hau sei husik hela ita, no halo orasaun ba Nai, hodi aban lalar barak sei sai hosi Faraó, hosi nia atan sira no hosi nia povu. Maibee Faraó keta bosok tan ema Israel sira hodi la husik sira baa halo sakrifísiu ba Nai.” 30Depois Moisés sai hosi Faraó, no nia halo orasaun ba Nai. 31No Nai halo tuir Moisés nia liafuan. Nia hasai tiha lalar barak nee hosi Faraó, hosi ninia atan sira no hosi ninia povu. La iha tan lalar ida iha nebaa. 32Maibee, iha tempu nee mos, Faraó halo nia fuan toos, no nia lakohi husik povu Israel baa.

Currently Selected:

Exodu 8: BK

Highlight

Copy

Compare