Jénesis 1
1
Maromak Kria Buat Hotu
1Hahuu fo-foun, Maromak kria lalehan no rai. 2Rai nee seidauk iha forma no mamuk. Nakukun taka hela fatin klean nia leten. No Maromak nia Espíritu book aan ba-mai iha bee nia leten.
3Maromak dehan, “Naroman mosu ba.”#1:3 Haree 2 Korinto 4:6. Depois, naroman iha. 4Maromak haree katak naroman nee diak. Maromak haketak naroman nee hosi nakukun. 5Maromak foo naran ba naroman nee, ‘Loron’, no nakukun nee Nia foo naran, ‘Kalan’. Hosi kalan too dadeer nee mak loron primeiru.
6Maromak dehan, “Fatin luan mosu ba iha bee nia leet, no buat nee bele haketak bee fatin ida hosi bee fatin seluk.” 7Maromak halo fatin luan nee no haketak bee nebee iha fatin luan nia okos hosi bee nebee iha fatin luan nia leten. Ida nee mosu duni. 8Maromak foo naran ba fatin luan nee, ‘Lalehan’.#1:8 Liafuan iha Ebreu bele iha sentidu ‘lalehan’ ka ‘loro leten’. Liafuan nee hanesan ho liafuan iha v.1. Hosi kalan too dadeer nee mak loron rua.
9Maromak dehan, “Bee iha lalehan okos halibur ba iha fatin ida, no rai maran mosu ba.” Ida nee mosu duni. 10Maromak bolu rai maran nee ‘Rai’. Ba bee nebee halibur hamutuk nee, Nia bolu ‘Tasi’. Maromak haree katak buat sira nee diak.
11Maromak dehan, “Duut moris ba hosi rai nee, no ai horis nebee foo musan, no ai huun nebee foo fuan ho nia musan iha laran, tuir ida-idak nia modelu, iha rai nee.” Ida nee mosu duni. 12Duut moris hosi rai nee, ho ai horis nebee foo musan tuir nia modelu, no ai huun nebee foo fuan ho musan tuir nia modelu. No Maromak haree katak buat sira nee diak. 13Hosi kalan too dadeer nee mak loron tolu.
14Maromak dehan, “Naroman sira mosu ba iha fatin luan iha lalehan hodi haketak loron hosi kalan. Sira sei sai sinál, no hatudu tempu, loron no tinan. 15Sira sei sai naroman iha fatin luan iha lalehan hodi foo naroman ba rai.” Ida nee mosu duni. 16Maromak halo naroman rua nebee boot: ida nebee boot liu hodi ukun loron, no ida nebee laduun boot hodi ukun kalan. No Nia halo mos fitun sira. 17Maromak tau naroman sira nee iha fatin luan iha lalehan hodi foo naroman ba rai, 18hodi ukun loron no kalan, no hodi haketak naroman hosi nakukun. Maromak haree katak buat sira nee diak. 19Hosi kalan too dadeer nee mak loron haat.
20Maromak dehan, “Kriatura bar-barak mosu ba iha tasi nee, no manu nebee semo mosu ba iha rai nia leten, iha loro leten nee.”#1:20 Ebreu dehan ‘iha fatin luan iha lalehan nia okos’. 21Maromak kria animál boot#1:21 Ebreu taneen hanesan samea naga, maibee animál nee la hatene loos. Bele haree iha Exodu 7:9, Deuteronómiu 32:33, Job 30:29, Salmu 148:7, Isaias 27:1, Jeremias 51:34, Ezekiel 29:3, Ezekiel 32:2. sira iha tasi, no kriatura hotu nebee nani ba-mai, no habarak iha tasi laran, tuir sira nia modelu. No Nia kria manu hotu-hotu nebee iha liras, tuir sira nia modelu. Maromak haree katak buat sira nee diak. 22Maromak foo bensaun ba sira no dehan, “Halo oan ba no aumenta barak too bee iha tasi nee sai nakonu. No husik manu bele aumenta barak iha rai nee.” 23Hosi kalan too dadeer nee mak loron lima.
24Maromak dehan, “Animál sira mosu ba hosi rai, tuir sira nia modelu: animál hakiak sira, buat hotu nebee dolar, no animál fuik sira nebee iha rai, tuir sira nia modelu.” Ida nee mosu duni. 25Maromak halo animál fuik sira iha rai, tuir sira nia modelu, no animál hakiak sira, tuir sira nia modelu, no buat hotu nebee dolar iha rai, tuir sira nia modelu. Maromak haree katak buat sira nee diak.
26Maromak dehan, “Mai Ita halo ema tuir Ita nia ilas, hanesan Ita nia Aan. Sira sei domina ikan iha tasi, no manu iha loro leten, no animál nebee hakiak, no rai tomak, no buat hotu nebee dolar iha rai.”
27Nunee Maromak kria ema tuir Ninia ilas rasik,
no tuir Ninia ilas Nia kria ema;
Nia kria mane no feto.
28Maromak foo bensaun ba sira, no Maromak dehan ba sira, “Halo oan ba no aumenta barak too rai nakonu. Ukun rai ba: domina ikan iha tasi, manu iha lalehan no buat hotu nebee moris no muda ba-mai iha rai.” 29Maromak dehan, “Haree ba, Hau foo ona ba imi ai horis hotu nebee iha musan, nebee iha rai leten, no ai huun hotu nebee iha fuan ho musan. Imi sei hetan buat sira nee nudar imi nia ai haan. 30Hau foo ai horis hotu hodi sai ai haan ba animál fuik hotu iha rai, no ba manu hotu iha loro leten, no ba buat hotu nebee dolar iha rai, buat hotu nebee dada iis.” Ida nee mosu duni. 31No Maromak haree buat hotu nebee Nia halo ona, no tebes, buat hotu nee diak loos. Hosi kalan too dadeer nee mak loron neen.
Currently Selected:
Jénesis 1: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
