Jénesis 11
11
Uma Aas iha Babel
1Mundu tomak iha lian ida deit, no koalia ho liafuan nebee hanesan. 2Bainhira sira muda hosi fatin lorosae, sira hetan rai tetuk iha rai Sinear, no sira hela iha nebaa. 3Sira dehan ba malu, “Mai, ita halo tijolu sira no tunu sira di-diak.” Sira uza tijolu hanesan fatuk, no sira uza alkatraun hanesan masa. 4No sira dehan, “Mai, ita halo sidade ida ho uma aas ida nebee nia tutun bele sae too lalehan. Hodi nunee ita hetan naran boot. Se lae, ita sei namkari ba rai hotu-hotu iha mundu tomak.” 5Depois Nai tuun mai hodi haree sidade nee no uma aas nebee ema sira nee harii. 6No Nai hatete, “Tebes, povu nee ida deit, no sira hotu iha lian ida deit. Sira foin mak hahuu atividade nee. Agora, la iha buat ida nebee sira la bele halo, tuir sira nia planu. 7Mai, Ita tuun ba no haketak sira nia lian hodi nunee sira la bele kompriende malu.” 8Entaun Nai halo ema sira nee namkari hosi fatin nee baa rai hotu iha mundu tomak. No sira husik planu atu harii sidade nee. 9Nunee fatin nee hanaran Babél tanba iha nebaa Nai haketak lian mundu tomak nian. No hosi fatin nee Nai halo ema namkari ba rai hotu iha mundu tomak.
Sem Nia Jerasaun
10Ida nee mak Sem nia jerasaun. Bainhira udan boot liu tiha ona tinan rua, no Sem tinan atus ida (100), nia hetan oan ida naran Arpaxad. 11Bainhira nia hetan ona Arpaxad, Sem sei moris tan tinan atus lima (500), no nia hetan oan mane no oan feto sira seluk.
12Bainhira Arpaxad tinan tolu-nulu resin lima (35), nia hetan oan ida naran Xela. 13Bainhira nia hetan ona Xela, Arpaxad sei moris tan tinan atus haat resin tolu (403), no nia hetan oan mane no oan feto sira seluk.
14Bainhira Xela tinan tolu-nulu (30), nia hetan oan ida naran Eber. 15Bainhira nia hetan ona Eber, Xela sei moris tan tinan atus haat tolu (403), no nia hetan oan mane no oan feto sira seluk.
16Bainhira Eber tinan tolu-nulu resin haat (34), nia hetan oan ida naran Peleg. 17Bainhira nia hetan ona Peleg, Eber sei moris tan tinan atus haat tolu-nulu (430), no nia hetan oan mane no oan feto sira seluk.
18Bainhira Peleg tinan tolu-nulu (30), nia hetan oan ida naran Reú. 19Bainhira nia hetan ona Reú, Peleg sei moris tan tinan atus rua sia (209), no nia hetan oan mane no oan feto sira seluk.
20Bainhira Reú tinan tolu-nulu resin rua (32), nia hetan oan ida naran Serug. 21Bainhira nia hetan ona Serug, Reú sei moris tan tinan atus rua hitu (207), no nia hetan oan mane no oan feto sira seluk.
22Bainhira Serug tinan tolu-nulu (30), nia hetan oan ida naran Naor. 23Bainhira nia hetan ona Naor, Serug sei moris tan tinan atus rua (200), no nia hetan oan mane no oan feto sira seluk.
24Bainhira Naor tinan rua-nulu resin sia (29), nia hetan oan ida naran Tera. 25Bainhira nia hetan ona Tera, Naor sei moris tan tinan atus ida sanulu resin sia (119), no nia hetan oan mane no oan feto sira seluk.
26Bainhira Tera tinan hitu-nulu (70), nia hetan oan sira naran Abrão, Naor no Haran.
Tera nia Jerasaun
27Tera nia jerasaun hanesan nee. Tera hetan oan sira naran Abrão, Naor no Haran. Haran hetan oan ida naran Ló. 28Haran mate iha nia aman Tera nia prezensa. Nia mate iha nia moris fatin nebee iha Ur, iha ema Kaldeia sira nia rai. 29Depois Abrão no Naor hola feto sira. Abrão nia feen nia naran Sarai no Naor nia feen nia naran Milka, nebee Haran nia oan feto. Haran mak Milka nia aman no Iská nia aman. 30Maibee Sarai la bele isin rua entaun oan la iha.
31Tera lori nia oan mane Abrão, no nia bei-oan Ló nebee Haran nia oan mane, no nia feto foun Sarai nebee nia oan mane Abrão nia feen, no sira hotu lao hamutuk sai hosi rai Ur, ema Kaldeia sira nia rai, hodi baa rai Kanaan. Maibee bainhira sira too iha rai Haran sira hela iha nebaa. 32Tera moris too tinan atus rua lima (205), depois nia mate iha Haran.
Currently Selected:
Jénesis 11: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
