Jénesis 12

Maromak Bolu Abrão

1 Nai hatete ba Abrão, “Lao sai hosi o nia rai, hosi o nia família, no hosi o nia aman nia uma, no baa rai ida nebee Hau sei hatudu ba o. 2No Hau sei halo nasaun boot hosi o, no Hau sei haraik bensaun ba o, no Hau sei halo o nia naran boot, no o sei sai bensaun ida. 3Hau sei foo bensaun ba sira nebee foo bensaun ba o, no Hau sei foo malisan ba sira nebee foo malisan ba o, no família hotu-hotu iha mundu sei hetan bensaun liu hosi o.”#12:3 Haree Galásia 3:8.

4Nunee Abrão sai, tuir Nai nia liafuan ba nia. Ló mos baa ho nia. Abrão tinan hitu-nulu resin lima (75) bainhira nia sai hosi Haran. 5No Abrão lori nia feen Sarai, no nia alin nia oan Ló, no sira nia riku-soin hotu nebee sira halibur ona, no ema hotu nebee sira hetan iha Haran. Depois sira sai hodi baa rai Kanaan. Tuir mai sira too rai Kanaan. 6Abrão lao liu hosi rai nee too Sikém, iha fatin rai tetuk iha Moré. Iha tempu nee, ema Kanaan sira sei hela iha rai nee. 7Nai hatudu aan ba Abrão, Nia dehan, “Hau sei foo rai nee ba o nia bei-oan.”#12:7 Iha lian Ebreu, ‘bei-oan’ nee mak ‘fini’ katak ‘oan’. Haree mos iha Jénesis 13:15 no 24:7. Haree Galásia 3:16. Abrão harii altár ida ba Nai nebee hatudu aan ba nia. 8Abrão sai hosi fatin nee no baa too foho ida iha Betél nia sorin lorosae. Nia tau nia tenda iha nebaa. Betél iha sorin loromonu no Ai iha sorin lorosae. Iha fatin nee nia harii altár ida ba Nai, no nia bolu ba Nai nia naran. 9Depois Abrão lao fali no nia baa rai Negebe.

Abrão no Sarai iha Ejitu

10Iha tempu nee, akontese rai hamlaha boot. Abrão lao tuun too Ejitu hodi hela iha nebaa tanba rai hamlaha boot tebes. 11Bainhira nia besik atu tama ba Ejitu, nia dehan ba nia feen Sarai, “Haree lai, hau hatene katak o oin bonita loos. 12Nunee bainhira ema Ejitu sira haree o, sira sei hatete, ‘Feto nee mak nia feen.’ Depois sira sei oho hau maibee sira sei husik o moris. 13Favór ida, hatete deit katak o mak hau nia alin. Nunee sira sei haree hau diak no hau sei moris tanba o.” 14Hafoin Abrão tama ba iha Ejitu, ema Ejitu sira haree feto nee bonita loos. 15Faraó nia xefi boot sira mos haree feto nee no sira baa gaba feto nee iha Faraó nia oin. Nunee sira foti feto nee no lori nia ba Faraó nia uma. 16No Faraó halo diak ba Abrão tanba Sarai. Abrão hetan bibi, karau, kuda buru aman, atan mane, atan feto, kuda buru inan no kuda kamelu sira.

17Maibee Nai kastigu Faraó no nia uma kain ho terus boot tanba Sarai, Abrão nia feen. 18Faraó bolu Abrão no dehan, “Saida mak o halo mai hau? Tanba saa mak o la foo hatene katak nia mak o nia feen? 19Nusaa mak o hatete, ‘Feto nee mak hau nia alin?’ hodi nunee hau foti nia sai hau nia feen. Agora, haree o nia feen, foti nia no baa deit.” 20No Faraó foo orden ba ninia ema kona ba Abrão, no sira haruka Abrão sai hamutuk ho ninia feen no ho ninia riku-soin hotu.

Currently Selected:

Jénesis 12: BK

Highlight

Copy

Compare