Jénesis 13

Abrão ho Ló Fahe Malu

1Abrão sai hosi Ejitu hamutuk ho ninia feen no ninia sasaan. No Ló baa hamutuk ho nia no sira tama ba rai Negebe.

2Abrão riku loos ho karau sira, osan mutin no osan mean. 3No nia halo viajen hosi Negebe too iha Betél. Nia baa fatin nebee uluk nia harii ninia tenda, entre Betél no Ai, 4iha fatin nebee uluk nia harii altár ida. Iha fatin nee, Abrão bolu ba Nai nia naran. 5No Ló, nebee baa hamutuk ho Abrão, nia mos iha karau, bibi no tenda. 6No rai nee la too ba sira hotu hodi sira bele hela hamutuk. Sira la bele hela hamutuk tanba sira iha sasaan barak. 7Nee duni Abrão nia bibi atan sira no Ló nia bibi atan sira istori malu. Iha tempu nebaa, ema Kanaan sira no ema Perizeu sira hela iha rai nee.

8Depois Abrão dehan ba Ló, “Ita la bele istori malu, entre hau ho o, ka hau nia bibi atan sira no o nia bibi atan sira, tanba ita maun-alin. 9Laos rai tomak iha o nia oin? Mai ita haketak malu. Se karik o baa sorin karuk, hau sei baa sorin loos; ka se o baa sorin loos, hau sei baa sorin karuk.” 10Ló foti matan no haree rai tetuk hotu iha Jordaun. Nia haree katak rai nee iha bee barak iha fatin hotu hanesan Nai nia jardín, hanesan rai Ejitu, iha dalan ba Zoar. (Ida nee uluk Nai estraga Sodoma no Gomora.) 11Entaun Ló hili rai tetuk hotu no nia lao ba área lorosae. Nunee sira fahe malu. 12Abrão hela iha rai Kanaan nian, no Ló hela iha sidade sira iha rai tetuk. Ló harii ninia tenda besik Sodoma. 13Maibee ema Sodoma sira nee aat tebes. Sira mak sala nain makaas iha Nai nia oin.

14Bainhira Ló husik tiha Abrão, Nai dehan ba Abrão, “Foti o nia matan, no haree hosi o nia fatin nee ba parte norte, parte súl, parte lorosae no parte loromonu. 15Tanba Hau sei foo rai hotu nebee o haree nee ba o no o nia bei-oan too tinan ba tinan. 16No Hau sei aumenta o nia bei-oan sira hanesan rai rahun iha mundu, no hanesan nee o sei iha bei-oan barak. 17Hamriik ba, lao ba-mai iha rai nee hosi leten ba kraik no sorin ba sorin, tanba Hau sei foo rai nee ba o.” 18Nunee Abrão foti nia tenda no nia baa no hela iha rai tetuk Mamre, nebee iha Hebron, no nia harii altár ida ba Nai.

Currently Selected:

Jénesis 13: BK

Highlight

Copy

Compare