Jénesis 14

Abrão Salva Ló

1Iha tempu nee, Amrafel liurai hosi Sinear, Arioke liurai hosi Elasar, Kedorlaomer liurai hosi Elam, no Tidal liurai hosi Goim, 2sira halo funu hasoru Bera liurai hosi Sodoma, no Birsa liurai hosi Gomora, Sinab liurai hosi Adma, Semeber liurai hosi Zeboim, no liurai hosi Bela, nebee Zoar. 3Sira hotu hasoru malu iha Rai Tetuk Sidim, nebee iha Tasi Masin.#14:3 Nee katak Tasi Mate. 4Sira serví Kedorlaomer too tinan sanulu resin rua, maibee iha tinan ba dala sanulu resin tolu sira kontra nia. 5Depois, iha tinan sanulu resin haat, Kedorlaomer mai ho liurai sira nebee hamutuk ho nia. Sira manaan ema Refaim sira iha Astoret-Karnaim, ema Zuzim sira iha Ham, ema Emim sira iha Savé-Kiriataim, 6no ema Hori sira iha foho Seir, too El-Parán nebee besik iha rai fuik. 7Depois sira fila ba too iha En-Mispat, katak Kades, no manaan fali rai hotu nebee ema Amalek sira nian, no mos ema Amoreu sira nebee hela iha Hazezon-Tamar.

8Depois liurai hosi Sodoma, liurai hosi Gomora, liurai hosi Adma, liurai hosi Zeboim no liurai hosi Bela, katak Zoar, sira hotu sai ba no halo funu iha rai tetuk Sidim. 9Sira hasoru Kedorlaomer liurai hosi Elam, Tidal liurai hosi Goim, Amrafel liurai hosi Sinar, no Arioke liurai hosi Elasar. Liurai nain haat hasoru liurai nain lima. 10Rai Tetuk Sidim nee iha rai kuak barak nebee nakonu ho alkatraun, no liurai sira hosi Sodoma no Gomora halai no monu iha nebaa, no ema restu halai ba foho. 11No sira nebee manaan funu nee foti sasaan hotu hosi Sodoma no Gomora, inklui sira nia ai haan hotu, no sira baa. 12No sira foti Ló, Abrão nia maun nia oan, nebee hela iha Sodoma, ho ninia sasaan no sira sai ba.

13Depois, ema ida halai no foo hatene ba Abrão, ema Ebreu nee. Nia hela iha ai huun boot iha Mamre nia rai. Mamre mak ema Amoreu, no nia maun-alin sira mak Eskol no Aner, no sira halo akordu ho Abrão. 14Bainhira Abrão rona katak ema kastigu ninia alin, nia halibur ninia ema nebee treinu ona, nebee moris iha ninia uma kain, ema nain atus tolu sanulu resin ualu (318), no nia duni sira too iha Dan. 15Nia fahe ninia atan sira hodi hasoru sira iha kalan, no nia manaan sira no duni sira too Hoba, nebee iha Damasku nia sorin karuk. 16Depois nia lori fali ba sasaan hotu, no mos nia lori fila fali ninia alin Ló, no Ló nia sasaan, no feto sira, no ema seluk.

Abrão Simu Bensaun Hosi Melkizedek

17Bainhira Abrão fila mai hosi funu nebee nia manaan Kedorlaomer, no liurai sira nebee hamutuk ho nia, liurai hosi Sodoma sai hodi hasoru nia iha Rai Tetuk Savé, nebee iha Rai Tetuk Liurai Nian. 18No Melkizedek, liurai hosi Salém, lori mai paun no tua uvas. Nia mak saserdote ba Maromak Nebee Aas Liu. 19Melkizedek foo bensaun ba Abrão no dehan,

“Bensaun ba Abrão hosi Maromak Nebee Aas Liu,

Maromak nebee kria lalehan no mundu;

20no adora#14:20 Iha lian Ebreu, liafuan ‘bensaun’ no ‘adora’ mak hanesan. ba Maromak Nebee Aas Liu,

nebee entrega ona o nia inimigu sira ba o nia liman.”

Abrão foo ba nia porsentu sanulu hosi sasaan hotu. 21Liurai hosi Sodoma dehan ba Abrão, “Foo fali ema sira nee maibee lori sasaan hotu.” 22Abrão hataan ba liurai hosi Sodoma, “Hau foti sae tiha hau nia liman hodi jura ba Nai, Maromak Nebee Aas Liu, Maromak nebee kria lalehan no mundu, 23katak hau sei la foti kabas lahan ida ka tali ida hosi sapatu ka buat naran deit nebee ita boot nian, hodi ita boot la bele dehan, ‘Hau mak halo Abrão sai riku.’ 24Só deit, buat nebee joven mane sira mak haan ona, no kona ba mane sira nebee baa hamutuk ho hau, mak Aner, Eskol no Mamre, husik sira foti parte nebee sira nian.”

Currently Selected:

Jénesis 14: BK

Highlight

Copy

Compare