Jénesis 15

Maromak Nia Aliansa Ho Abrão

1Liu tiha nee, Nai nia liafuan mai Abrão iha vizaun ida, no Nia dehan, “Keta tauk, Abrão, tanba Hau mak o nia eskudu#15:1 Eskudu mak eskudu nebee proteje ema iha funu. Haree dezenhu iha Salmu 3. no o sei hetan prémiu boot tebes.” 2Abrão hataan, “Nai Maromak, O sei foo saida mai hau tanba hau la iha oan? Nunee ema ida nebee simu hau nia uma nudar liman rohan#15:2 Liman rohan mak riku-soin ka rai nebee aman foo ba nia oan bainhira aman nee mate. mak Eliezer hosi Damasku.” 3No Abrão dehan, “Tebes, O la foo oan mai hau, nee duni ema ida nebee moris iha hau nia uma kain mak hetan hau nia liman rohan.” 4No tebes, Nai nia liafuan mai Abrão, no Nia dehan, “Nia sei la hetan o nia liman rohan, maibee o nia oan mane rasik sei hetan o nia liman rohan.” 5Maromak lori Abrão sai ba liur no dehan, “Haree took ba lalehan no sura fitun sira nee, se karik o bele sura sira.” No Nia dehan ba Abrão, “O nia bei-oan sira sei sai hanesan nee.” 6Abrão fiar ba Nai, no Nai sura fiar nee nudar moris loos ba nia.#15:6 Ema presiza moris loos (ka hahalok loos) hodi hakbesik ba Maromak. Haree Roma 4:3, Galásia 3:6 no Tiago 2:23.

7 Nai dehan ba Abrão, “Hau mak Nai, nebee lori o sai hosi Ur nebee iha ema Kaldeia nia rai, hodi foo rai ida nee ba o nudar liman rohan.” 8No nia hataan, “Nai Maromak, oinsaa hau bele hatene katak hau sei simu rai nee nudar liman rohan?” 9Maromak dehan ba nia, “Foti karau inan nebee tinan tolu, bibi inan nebee tinan tolu, bibi malae aman nebee tinan tolu, manu lakateu ida no manu pombu oan ida.” 10Abrão lori buat hotu nee, no nia koa sira fahe ba rua. Nia tau naan nee hodi sorin ida hasoru sorin seluk, maibee manu sira nee nia la koa. 11No bainhira makikit sira tuun mai ba naan nee, Abrão duni sai sira.

12Bainhira loro matan monu dadaun, Abrão toba dukur haluha rai. No tebes, nakukun boot no terus monu ba nia. 13No Maromak dehan ba Abrão, “Hatene lo-loos katak o nia bei-oan sira sei sai estranjeiru iha rai nebee laos sira nian, no sira sei serví ema sira iha nebaa. No ema sira nee sei hanehan sira too tinan atus haat. 14No mos, Hau sei tesi lia ba nasaun nee, nebee sira serví. Liu tiha nee, sira sei sai ho sasaan barak. 15No o sei baa o nia bei-ala sira ho dame, no ema sei hakoi o ho idade boot nebee diak. 16Maibee iha jerasaun haat ba oin, sira sei fila fali mai iha nee, tanba ema Amoreu nia hahalok aat seidauk kompletu.”

17Bainhira loro matan monu ona no rai nakukun, tebes fugaun suar ida ho lampu lakan ida mai liu iha naan sira nia klaran. 18Iha loron nee, Nai halo aliansa ho Abrão no dehan, “Hau foo rai nee ba o nia bei-oan sira, hosi mota iha Ejitu too iha mota boot, katak Mota Eufrates. 19Nee mak rai hosi ema Keneu, ema Kenizeu, ema Kadmoneu, 20ema Hiti, ema Perizeu, ema Refaim, 21ema Amoreu, ema Kanaan, ema Girgaseu no ema Jebuseu sira.”

Currently Selected:

Jénesis 15: BK

Highlight

Copy

Compare