Jénesis 16
16
Sarai no Hagar
1Sarai, Abrão nia feen, la iha oan. Nia iha atan feto ida nebee ema Ejitu, ho naran Hagar. 2No Sarai dehan ba Abrão, “Tebes, Nai prevene hau atu la bele iha oan. Favór ida, tama ba hau nia atan feto. Karik hau bele hetan oan sira liu hosi nia.” No Abrão rona tuir Sarai nia liafuan. 3Bainhira Abrão hela tinan sanulu ona iha rai Kanaan, Sarai, Abrão nia feen, foti ninia atan feto Hagar no foo ba ninia laen Abrão nudar Abrão nia feen kiik. 4Abrão tama ba Hagar, no Hagar isin rua. Bainhira Hagar haree katak nia isin rua ona, nia hateke ba ninia senhora no despreza nia. 5Sarai dehan ba Abrão, “Terus nebee kona hau nee mai tanba o nia sala! Hau foo tiha hau nia atan feto hodi o bele kous, no bainhira nia haree katak nia isin rua nia despreza fali hau. Nunee Nai sei tesi lia entre hau ho o!” 6Maibee Abrão dehan ba Sarai, “Tebes, o nia atan feto mak iha o nia liman. Halo ba nia tuir o nia hakarak.” Entaun Sarai hatuun Hagar, nunee Hagar halai hosi Sarai nia oin.
7Depois, Nai nia anju hetan Hagar besik bee matan iha rai fuik, nebee bee matan iha dalan ba Sur. 8No nia dehan, “Hagar, Sarai nia atan feto, o mai hosi nebee? O baa nebee?” No feto dehan, “Hau halai hosi hau nia senhora Sarai.” 9No Nai nia anju dehan ba nia, “Fila fali ba o nia senhora, no haraik aan ba ninia direitu.” 10Nai nia anju dehan ba nia, “Hau sei habarak o nia bei-oan sira hodi sai barak loos too la bele sura ema lubun boot nee.” 11No Nai nia anju dehan ba nia,
“Tebes, o isin rua ona,
no o sei hetan oan mane ida.
O sei hanaran nia Ismael,#16:11 Ismael iha sentidu katak ‘Maromak rona’.
tanba Nai rona ona kona ba o nia terus.
12Nia sei sai hanesan kuda buru fuik,
no ninia liman sei hasoru ema hotu,
no ema hotu nia liman sei hasoru nia,
no nia sei hela iha ninia maluk hotu nia oin.
13Hagar hanaran Nai nebee koalia ho nia, “Maromak nebee haree hau.” Tanba nia dehan, “Hau haree ona Nia nebee tau matan mai hau.”#16:13 Ka ‘Hau haree Nia nebee haree hau ka?’. 14Nunee sira bolu bee matan nee, Beer-Lahai-Roi,#16:14 Beer-Lahai-Roi iha sentidu, ‘Bee posu hosi Ida Nebee Moris nebee haree hau’. no tebes fatin nee iha Kades no Bered nia klaran.
15Hagar hetan oan mane ida ba Abrão. No Abrão hanaran ninia oan mane hosi Hagar nee Ismael. 16Abrão tinan ualu-nulu resin neen bainhira Hagar hetan oan mane ida ho Abrão.
Currently Selected:
Jénesis 16: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
