Jénesis 17

Aliansa Sirkunsizaun Nian

1Bainhira Abrão tinan sia-nulu resin sia, Nai mosu mai no dehan ba nia, “Hau mak Maromak Kbiit Makaas,#17:1 Ebreu El Xadae. Haree Job 5:17 no nota. lao iha Hau nia oin ho hahalok perfeitu. 2No Hau sei halo aliansa entre Hau ho o, no hau sei halo o sai barak tebes.” 3Abrão hakruuk ho oin ba rai. Maromak dehan ba nia, 4“Tebes, Hau halo aliansa ho o, no o sei sai aman ba nasaun barak. 5No o nia naran laos Abrão ona, maibee o nia naran mak Abraão. Tanba Hau halo o sai aman ba nasaun barak.#17:5 Abrão iha sentidu ‘Aman Boot’. Abraão iha sentidu ‘Aman ba Lubun Boot’. Haree Roma 4:17. 6No Hau sei halo hodi o iha bei-oan barak,#17:6 Ebreu ‘fuan barak’. Maromak koalia kona ba oan no bei-oan sira hanesan fuan hosi ai huun nebee Abraão. no Hau sei halo nasaun sira hosi o, no liurai sira sei sai hosi o. 7Hau sei estabelese Hau nia aliansa ho o, no ho o nia bei-oan#17:7 Ebreu refere ba bei-oan sira ho liafuan ‘fini’. sira nebee tuir o hosi jerasaun ba jerasaun. No aliansa nee sei lao too tinan ba tinan. Hodi nunee Hau mak Maromak ba o no ba o nia bei-oan sira nebee tuir o. 8Hau sei foo rai Kanaan hotu ba o, no ba o nia bei-oan sira nebee tuir o. O sei hela nudar ema lao rai iha rai nee. Maibee rai nee sei sai o nian too tinan ba tinan. No Hau sei sai o nia bei-oan sira nia Maromak.”

9Maromak dehan ba Abraão, “O tenki halo tuir Hau nia aliansa, o no o nia bei-oan sira nebee tuir o iha sira nia jerasaun sira. 10Ida nee mak Hau nia aliansa nebee o sei halo tuir, entre Hau ho o, no o nia bei-oan sira nebee tuir o: oan mane ida-idak tenki hetan sirkunsizaun.#17:10 Kona ba: Sirkunsizaun. Mane Israel sira tenki hetan sirkunsizaun (sunat). Ema tesi kulit rohan hosi mane sira nia oin-lulik tutun. Se karik ema la hetan sirkunsizaun, sira la hola parte ho Israel, no la tuir Maromak no ema Israel haree sira nudar ema aat. Agora, Jesus mai ona mundu no halo aliansa foun. (Ebreu 12:24) Paulo hakerek katak ita la presiza hetan sirkunsizaun no tuir regulamentu hotu iha Testamentu Tuan hodi hetan salvasaun tanba ita fiar ba Jesus. Dala ruma ema koalia kona ba sirkunsizaun espirituál nebee halo ba fuan laran. (Galásia 5:2-6, Jénesis 34:14-25, Exodu 4:24-26, Deuteronómiu 10:16, Josué 5:2, Apostolu 15:1, Roma 2:28-29, Filipe 3:2-5, Kolose 2:11) 11Imi tenki hetan sirkunsizaun ba imi nia oin-lulik nia kulit rohan iha imi nia isin. Ida nee sei sai sinál ba aliansa entre Hau ho imi. 12Nia nebee halo loron ualu ona iha imi nia leet tenki hetan sirkunsizaun. Ida nee inklui oan mane hotu iha imi nia jerasaun sira, nia nebee moris iha imi nia uma kain, ka nia nebee imi sosa ho osan hosi estranjeiru see deit, nebee laos hosi imi nia bei-oan sira. 13Nia nebee moris iha imi nia uma kain, no nia nebee imi sosa ho osan tenki hetan sirkunsizaun. Hau nia aliansa sei iha imi nia isin hodi sai aliansa too tinan ba tinan. 14Oan mane nebee la hetan sirkunsizaun ba ninia oin-lulik nia kulit rohan iha isin nee, imi tenki hasai nia hosi ninia povu tanba nia kontra ona Hau nia aliansa.”

Maromak Promese Oan Isak

15Maromak dehan ba Abraão, “Kona ba o nia feen Sarai, o la bele bolu nia Sarai ona, tanba ninia naran sei sai Sara.#17:15 Sarai no Sarah iha sentidu katak liurai nia oan feto. 16No Hau sei haraik bensaun ba nia no foo oan mane ida ba o liu hosi nia. Hau sei foo bensaun ba nia no nia sei sai inan ba nasaun sira no liurai sira sei mai hosi nia.” 17Depois Abraão hakruuk ho oin ba rai no nia hamnasa no dehan iha nia fuan laran, “Ema ida nebee tinan atus ida sei hetan oan ka? No Sara nebee tinan sia-nulu sei tuur ahi ka?” 18Abraão dehan ba Maromak, “Oh katak Ismael bele hela iha O nia oin!” 19Maromak hataan, “Sara, o nia feen, nia sei tuur ahi duni no o sei hetan oan mane ida, no o sei hanaran nia Isak.#17:19 Isak iha sentidu katak ‘nia hamnasa’. No Hau sei estabelese Hau nia aliansa hodi sai aliansa too tinan ba tinan ho ninia bei-oan sira nebee tuir nia. 20Kona ba Ismael, Hau rona ona o nia liafuan. Tebes, Hau haraik bensaun ona ba nia, no Hau sei halo nia sai barak, no nia sei hetan oan barak tebes. Nia sei hetan liurai sanulu resin rua, no Hau sei halo nia sai nasaun ida nebee boot. 21Maibee Hau sei estabelese Hau nia aliansa ho Isak, nebee o hetan hosi Sara, iha tinan oin iha tempu hanesan nee.” 22Bainhira Nia koalia hotu ona ho Abraão, Maromak sae ba no husik hela Abraão. 23Abraão foti ninia oan mane Ismael, no ema hotu nebee moris iha ninia uma kain, no ema hotu nebee nia sosa ho osan. Nia foti mane hotu iha sira nia leet iha Abraão nia uma kain. No nia halo sirkunsizaun ba sira nia oin-lulik nia kulit rohan iha loron nebaa, tuir buat nebee Maromak hatete ona ba nia. 24Abraão tinan sia-nulu resin sia bainhira nia hetan sirkunsizaun iha ninia oin-lulik nia kulit rohan. 25No Ismael nia oan tinan sanulu resin tolu bainhira nia hetan sirkunsizaun iha ninia oin-lulik nia kulit rohan. 26Iha loron nebaa Abraão no ninia oan mane Ismael hetan sirkunsizaun. 27Mane hotu iha ninia uma kain, inklui sira nebee moris iha uma kain nee no sira nebee nia sosa hosi estranjeiru, sira hotu hetan sirkunsizaun hamutuk ho nia.

Currently Selected:

Jénesis 17: BK

Highlight

Copy

Compare