Jénesis 18

Maromak Vizita Abraão

1 Nai mosu mai ba Abraão iha ai huun boot sira iha Mamre. Abraão tuur iha ninia tenda nia odamatan iha oras nebee loron manas. 2Nia foti matan no nia haree ba, no tebes, nia haree mane nain tolu hamriik iha ninia oin. Bainhira nia haree sira, nia halai hosi ninia tenda nia odamatan hodi hasoru sira no nia hakruuk ba rai. 3Nia dehan, “Hau nia senhor, se karik hau hetan grasa iha ita boot sira nia oin, favór ida keta lao liu deit hosi ita boot sira nia atan hau. 4Favór ida, husik ema kuru bee uitoan hodi fasi ita boot sira nia ain no ita boot sira bele deskansa iha ai huun okos. 5No hau sei lori paun uitoan hodi haforsa ita boot sira nia laran. Depois ita boot sira bele kontinua lao ba, tanba ita boot sira mai tiha ona ba ita boot sira nia atan hau.” No sira hataan, “Bele halo tuir o nia liafuan nee.” 6Entaun Abraão halai ba nia tenda laran ba Sara no dehan, “Lalais, sukat trigu diak too baldi boot ida!#18:6 Ebreu dehan ‘trigu diak seá tolu’, nebee 1 seá = 7.3L. Kumu no halo paun.” 7No Abraão halai ba karau sira no foti karau oan ida nebee diak ho isin mamar, no nia foo ba joven mane ida hodi prepara. 8No nia foti keiju, susu been no naan karau nebee prepara ona no nia tau iha sira nia oin. Nia hamriik iha sira nia sorin no sira haan.

9Sira dehan ba nia, “O nia feen Sara iha nebee?” No nia hataan, “Tebes, iha tenda laran.” 10Nai#18:10 Ebreu dehan ‘Nia’. dehan, “Tinan oin tempu hanesan nee, Hau sei fila fali mai, no Sara sei iha oan mane ida.”#18:10 Haree Roma 9:9. No Sara rona hosi tenda nia odamatan iha sira nia kotuk. 11Abraão no Sara katuas no ferik no idade boot ona no Sara nia fulan la mai ona. 12Nunee Sara hamnasa iha nia laran no dehan, “Hau ferik ona, nunee hau bele sai kontenti ka? Hau nia senhor mos idade ona!” 13Nai dehan ba Abraão, “Tanba saa mak Sara hamnasa no dehan, ‘Hau sei hetan oan duni bainhira hau ferik ona ka?’ 14Iha buat ida nebee susar liu ba Nai ka? Tuir tempu nebee marka ona, Hau sei fila fali ba imi, tinan oin maizoumenus tempu hanesan nee, no Sara sei iha oan mane ida.” 15Maibee Sara nega liafuan nee no dehan, “Hau la hamnasa.” No Nia hataan, “Lae, maibee o hamnasa duni.”

16Depois ema sira nee hamriik no haree ba Sodoma no Abraão lao ho sira hodi foo adeus ba sira. 17No Nai dehan, “Hau sei subar hosi Abraão buat nebee Hau atu halo ka? 18Tanba Abraão sei sai nasaun ida nebee boot no forti, no nasaun hotu iha mundu sei hetan bensaun liu hosi nia. 19Tanba Hau hatene katak Abraão sei diriji ninia oan sira no ninia uma kain nebee tuir nia hodi sira halo tuir Nai nia dalan, liu hosi halao hahalok loos no justisa. Nunee Nai sei haraik ba Abraão buat nebee Nia promete ona ba Abraão.” 20No Nai dehan, “Tanba lian halerik hasoru Sodoma no Gomora, no sira nia sala mak todan duni, 21nunee Hau sei tuun hodi haree karik sira halo duni tuir lian halerik nebee too mai Hau ka lae. Se lae, Hau sei hatene.”

Abraão Koko Proteje Sodoma

22Depois mane sira nee see aan hodi lao ba Sodoma, maibee Abraão hamriik hela iha Nai nia oin. 23Abraão hakbesik ba Nia no husu, “O sei halakon ema nebee moris loos hamutuk ho ema nebee hahalok aat ka? 24Se karik O hetan ema nain lima-nulu nebee moris loos iha sidade laran, O sei harahun sidade nee no la husik fatin nee tanba ema moris loos nebee iha laran? 25Hadook tiha hosi O atu halo nunee, atu oho ema moris loos hamutuk ho ema aat sira, hodi ema moris loos hetan kastigu hanesan mos ema aat sira. Laos Juis ba mundu tomak sei halo loos ka?” 26No Nai hataan, “Se karik Hau hetan ema nain lima-nulu nebee moris loos iha sidade Sodoma, nunee Hau sei husik fatin nee tanba sira.”

27Abraão hataan, “Tebes, agora hau koko ona hodi koalia ba Nai, maski hau mak rai rahun no ahi kdesan. 28Se karik fatin nee falta nain lima hosi nain lima-nulu nebee moris loos, nunee O sei harahun sidade hotu tanba falta nain lima deit ka?” Nia dehan, “Se karik Hau hetan deit nain haat-nulu resin lima, Hau sei la harahun sidade nee.” 29No Abraão koalia tan no dehan, “Karik O hetan nain haat-nulu iha nebaa.” Nia dehan, “Hau sei la halo ida nee tanba nain haat-nulu.” 30Abraão dehan, “Oh Nai, keta hirus hau no hau sei koalia. Karik O hetan nain tolu-nulu iha nebaa.” Nia dehan, “Hau sei la halo, se karik Hau hetan nain tolu-nulu iha nebaa.” 31Abraão dehan, “Tebes, agora hau koko ona hodi koalia ho Nai. Karik O hetan nain rua-nulu iha nebaa.” Nia dehan, “Hau sei la halo tanba nain rua-nulu.” 32Abraão dehan, “Oh Nai, keta hirus hau no hau sei koalia dala ida tan. Karik O hetan nain sanulu iha nebaa.” Nia dehan, “Hau sei la halo tanba nain sanulu.” 33No bainhira Nai koalia hotu ona ho Abraão, Nia lao ba no Abraão fila fali ba ninia fatin.

Currently Selected:

Jénesis 18: BK

Highlight

Copy

Compare