Jénesis 19

Maromak Salva Ló

1Anju rua baa too iha Sodoma iha tempu rai nakaras no Ló tuur hela iha portaun Sodoma nian. Ló haree sira nain rua nee no nia hamriik hodi hasoru sira. Nia hakruuk ho nia oin ba rai. 2No nia dehan, “Hau nia senhor sira, favór ida, bele mai no tama ita boot sira nia atan hau nia uma. Bele toba kalan tomak, fasi ain, no hadeer sedu hodi kontinua ita boot sira nia viajen.” Sira hataan, “Lae, ami sei toba iha fatin liur deit.” 3Maibee nia obriga sira makaas, no sira ba ho nia no tama ninia uma. No nia foo hemu ba sira no tunu paun nebee fermentu la iha no sira haan.

4Maibee molok sira toba, mane sira hosi sidade nee, nebee ema Sodoma, haleu uma nee, ema katuas no ema joven, ema hotu hosi fatin hotu. 5Sira bolu Ló no dehan, “Mane sira nebee tama ba o nia uma iha kalan nee agora iha nebee? Lori sira mai ami nunee ami bele toba#19:5 Ebreu dehan ‘hodi ami bele konhese sira.’ Signifika katak sira hakarak halo sala seksuál ho ema nain rua nee. ho sira.” 6Ló sai hosi nia uma hodi hasoru sira no taka odamatan iha nia kotuk. 7Nia dehan, “Favór ida, maluk sira, keta halo buat aat nee. 8Tebes, hau iha oan feto rua nebee seidauk toba ho mane. Favór ida, husik hau bele foo sira ba imi hodi imi bele halo ba sira tuir imi nia hakarak. Maibee keta halo buat ida ba mane sira nee tanba sira tama ona iha hau nia uma kakuluk nia mahon.” 9Maibee sira dehan, “Sees tiha!” No sira dehan, “Mane ida nee mai nudar ema lao rai, no agora nia sai juis! Agora, ami sei halo aat ba o liu fali sira.” Sira dudu makaas Ló nee, no sira besik atu baku tuun odamatan. 10Maibee ema nain rua iha laran lolo liman no dada Ló tama ba uma laran, no sira taka tiha odamatan. 11No sira halo ema iha odamatan liur sai matan delek, ema kiik no boot. Ema iha liur buka la hetan odamatan nee too sira kole. 12No sira nain rua nee dehan ba Ló, “O iha família seluk iha nee ka lae? O nia mane foun, oan mane no oan feto sira ka ema seluk tan nebee hela iha sidade nee, lori sira sai hosi fatin nee. 13Tanba ami atu harahun fatin nee, tanba lian halerik hasoru povu nee sai makaas tebes iha Nai nia oin. Nunee Nai haruka ami mai harahun fatin nee.” 14Nunee Ló sai ba no koalia ho nia mane foun sira, nebee atu kaben ho nia oan feto sira, no nia dehan, “Hadeer lai, no sai hosi fatin nee, tanba Nai atu harahun sidade nee.” Maibee ninia mane foun sira hanoin katak nia koalia halimar deit.

15Iha dadeer-saan, anju sira nee obriga Ló no dehan, “Hadeer lai! No lori o nia feen no o nia oan feto nain rua nebee hamutuk ho o. Se lae, o sei lakon hamutuk ho sidade nia hahalok aat nee.” 16No bainhira Ló dada tempu, ema nain rua nee foti nia liman no nia feen nia liman, no nia oan feto nain rua nia liman, tanba Nai hanoin tebes sira. No ema nain rua nee lori sira sai ba sidade liur. 17Bainhira sira lori Ló sira ba liur ona, sira dehan, “Halai hodi salva imi nia moris. Keta hateke ba kotuk, no keta para iha nebee deit iha rai tetuk, maibee halai ba foho hodi imi la bele lakon.” 18Ló dehan ba sira, “Oh, la bele, hau nia Nai! 19Tebes, agora ita boot nia atan hau hetan grasa ona iha ita boot nia oin, no ita boot hatudu ona domin metin nebee boot mai hau. Maibee hau la bele halai ba foho, keta halo be buat aat akontese mai hau no hau mate. 20Tebes, sidade ida nee mak besik atu hau bele halai ba. Husik hau bele halai ba nebaa. Laos fatin nee kiik deit? No hau bele salva hau nia moris.” 21No nia dehan ba Ló, “Tebes, hau simu mos o nia liafuan kona ba ida nee, no hau sei la harahun aldeia nee, nebee o koalia tiha ona. 22Lalais, halai ba nebaa. Tanba hau la bele halo buat ida too o baa too aldeia iha nebaa.” Nunee aldeia nee hetan naran Zoar.#19:22 Zoar iha sentidu ‘kiik’.

Maromak Halakon Sodoma

23Loron matan sae ona iha rai nee bainhira Ló tama ona Zoar. 24Depois Nai fakar tuun fatuk klaak#19:24 Fatuk enxofre (sulfur), nebee kinur no bele halo lakan no nia dois makaas too ita la bele dada iis. no ahi hosi Nai, nebee hosi lalehan.

25No Nia harahun sidade sira nee, no rai tetuk hotu, no ema hotu iha sidade sira nee, no ai horis hotu nebee moris iha rai. 26Maibee Ló nia feen hateke ba kotuk no nia sai riin masin ida. 27Abraão hadeer sedu iha dadeer no nia baa fatin nebee uluk nia hamriik iha Nai nia oin. 28No nia hateke ba fatin Sodoma no Gomora, no ba rai tetuk tomak. Nia haree ba no tebes, ahi suar sae hosi rai nee hanesan ahi suar hosi fornu. 29Entaun bainhira Maromak halakon sidade sira iha rai tetuk, Nia hanoin Abraão no Nia haruka Ló sai hosi dezastre laran nee, iha tempu nebee Nia harahun sidade sira nebee uluk Ló mak hela.

Ló No Ninia Bei-oan Sira

30Ló sai hosi Zoar no hela iha foho ho nia oan feto nain rua. 31Oan feto boot dehan ba ninia alin, “Ita nia aman katuas ona, no ita la iha mane ida hodi toba ho ita hanesan baibain ema halo iha mundu tomak. 32Mai ita halo ita nia aman hemu tua no ita sei toba ho nia hodi ita bele hetan oan sira hosi ita nia aman.” 33Iha kalan nee, sira halo sira nia aman hemu tua, no oan feto boot tama ba no toba ho nia aman, no aman la hatene bainhira oan feto nee toba no bainhira oan feto nee hadeer. 34Tuir mai, iha aban dadeer, oan feto boot dehan ba ninia alin, “Tebes, hori kalan hau toba ho hau nia aman. Mai ita halo nia hemu tua orsida kalan mos. No o tama ba no toba ho nia hodi ita bele hetan oan sira hosi ita nia aman.” 35Sira halo sira nia aman hemu fali tua iha kalan nee. No alin feto hamriik no baa toba ho nia. Nia la hatene bainhira oan feto nee toba no bainhira oan feto nee hadeer. 36Nunee Ló nia oan feto nain rua hetan oan liu hosi sira nia aman. 37Oan feto boot tuur ahi hetan oan mane ida no hanaran nia Moab. Nia mak aman ba ema Moab sira too ohin loron. 38Oan feto kiik mos tuur ahi hetan oan mane ida no hanaran nia Ben-Ami. Nia mak aman ba ema Amon sira too ohin loron.

Currently Selected:

Jénesis 19: BK

Highlight

Copy

Compare