Jénesis 21

Isak Moris

1 Nai mai ba Sara tuir Ninia liafuan no Nai halo ba Sara tuir Ninia promesa. 2No Sara isin rua no tuur ahi oan mane ida ba Abraão bainhira nia katuas ona, tuir tempu nebee Maromak hatete ona ba nia. 3Abraão hanaran oan mane nebee nia hetan liu hosi Sara ho naran Isak. 4Abraão halo sirkunsizaun ba ninia oan mane Isak bainhira nia moris loron ualu ona, tuir Maromak nia mandamentu ba Abraão. 5Abraão tinan atus ida bainhira nia hetan oan mane Isak. 6Sara dehan, “Maromak halo hau hamnasa, nunee ema hotu nebee rona sei hamnasa tanba hau.” 7No nia dehan, “Uluk nee, see mak bele dehan ba Abraão katak Sara atu foo susu ba oan ida? Maibee hau hetan oan mane ida ba nia bainhira nia katuas ona.”

Maromak Tau Matan Ba Hagar

8Labarik sai boot dadaun too loron nebee nia haketak susu. No Abraão halo festa boot iha loron nebee Isak haketak susu. 9Maibee Sara haree katak Hagar, ema Ejitu, nia oan mane nebee Hagar hetan ba Abraão nee goza fali Isak. 10Nunee Sara dehan ba Abraão, “Duni sai tiha atan feto nee no ninia oan mane, tanba atan feto nee nia oan mane sei la hetan liman rohan hamutuk ho hau nia oan mane Isak.”#21:10 Haree Galásia 4:30. 11Ida nee susar loos ba Abraão tanba ninia oan mane. 12Maibee Maromak dehan ba Abraão, “Keta laran susar tanba labarik mane nee no tanba o nia atan feto. Halo tuir buat hotu nebee Sara dehan ona ba o, tanba liu hosi Isak mak o sei hetan bei-oan atu lori o nia naran.#21:12 Haree Roma 9:7. 13No Hau halo mos atan feto nee nia oan mane sai nasaun ida tanba nia mak o nia oan.” 14Entaun Abraão hadeer sedu iha dadeer-saan no foti paun no bee iha kulit ida#21:14 Iha tempu nebaa sira uza bibi kulit hodi tau bee hemu bainhira halo viajen. no foo ba Hagar. Abraão tau ba feto no labarik nia kabaas no haruka sira sai. Nunee sira sai no lao ba-mai iha rai fuik iha Beer-Seba.

15Bainhira bee nee hotu ona, Hagar husik nia oan iha ai badak ida nia okos. 16Nia baa no tuur dook uitoan, ho distánsia hanesan ema hana rama oan. Nia dehan, “Keta husik hau haree labarik nee mate.” Nia tuur iha nebaa no tanis ho lian makaas. 17No Maromak rona lian hosi labarik nee no anju ida bolu Hagar hosi lalehan no dehan ba nia, “Hagar, nusaa? Keta tauk, tanba Maromak rona ona labarik nee nia lian hosi nia fatin. 18Hamriik ba, foti labarik nee no kaer ninia liman, tanba hau sei halo nia sai nasaun boot ida.” 19Maromak loke Hagar nia matan no nia haree bee posu ida. Nia baa no enxe bee nakonu iha kulit no foo hemu ba ninia oan. 20Maromak hamutuk ho labarik nee no nia sai boot no hela iha rai fuik no sai hanadór. 21Nia hela iha rai fuik naran Paran, no ninia inan foti feto ida hosi Ejitu hodi sai ninia feen.

Aliansa Ho Abimelek

22Tuir mai, iha tempu nebaa, Abimelek no Fikól, nebee komandante ba ninia forsa, koalia ho Abraão no dehan, “Maromak hamutuk hela ho ita ho buat hotu nebee ita halo. 23Nunee jura mai hau liu hosi Maromak katak ita la bosok hau, ka hau nia oan, ka hau nia bei-oan sira. Maibee tuir domin metin nebee hau hatudu ona ba ita, nunee ita mos sei hatudu domin metin mai hau no ba rai nebee ita lao dadaun iha laran nee. 24Abraão hataan, “Hau jura.”

25Depois Abraão kesar Abimelek kona ba bee posu ida nebee Abimelek nia atan sira hadau. 26Abimelek dehan, “Hau la hatene see mak halo ida nee. No ita seidauk foo hatene mai hau no hau seidauk rona kona ba ida nee too agora.” 27Abraão foti bibi no karau sira no foo ba Abimelek, no sira nain rua halo aliansa. 28No Abraão haketak bibi malae oan hitu hosi bibi sira seluk. 29Abimelek dehan ba Abraão, “Tanba saa mak ita haketak bibi malae oan hitu nee?” 30Abraão hataan, “Tanba ita atu simu bibi malae oan hitu nee hosi hau nia liman, hodi sira bele sai sasin katak hau mak kee ona bee posu nee.” 31Nunee Abraão bolu fatin nee Beer-Seba,#21:31 Beer-Seba nee katak ‘bee posu hitu nian’ ka ‘bee posu juramentu’. tanba sira nain rua halo aliansa iha nebaa. 32Entaun sira halo aliansa iha Beer-Seba. Depois Abimelek hamriik, hamutuk ho Fikól nebee komandante forsa nian, no sira fila fali ba rai Filistia. 33Abraão kuda ai tamargeira#21:33 Karik Tamarix aphylla nebee ai huun boot nebee bele moris iha rai fuik maran. ida iha Beer-Seba no iha nebaa nia bolu ba Nai, Maromak Rohan Laek, nia naran. 34No Abraão lao ba-mai too tempu kleur iha ema Filisteu nia rai.

Currently Selected:

Jénesis 21: BK

Highlight

Copy

Compare