Jénesis 22

Sakrifísiu Ho Isak

1Liu tiha nee, Maromak koko Abraão no dehan ba nia, “Abraão!” No Abraão hataan, “Hau mak nee.” 2Maromak dehan, “Agora, lori o nia oan mane, o nia oan mane mesak Isak, nebee o hadomi, no lao ba rai Moriá.#22:2 Foho Moriá mos fatin nebee Salomão harii Templu. 1 Krónikas 3:1. No oferese nia iha nebaa nudar sakrifísiu tunu motuk iha foho ida nebee Hau sei hatudu ba o.” 3Entaun Abraão hadeer sedu iha dadeer-saan, no tau sela ba ninia kuda buru no lori joven mane nain rua hodi lao hamutuk ho nia no ninia oan mane Isak. Nia tesi ai ba oferta nee no nia hamriik no baa fatin nebee Maromak dehan ona ba nia. 4Iha loron terseiru, Abraão foti matan no haree fatin nee hosi dook. 5Abraão dehan ba ninia joven mane sira nee, “Hein iha nee ho kuda buru. Hau ho labarik#22:5 Ebreu uza liafuan hanesan ho ‘joven mane’, iha mos versíkulu 12. ida nee sei baa iha nebaa hodi adora no fila fali mai.” 6Abraão foti ai ba oferta tunu motuk no tau ba ninia oan mane Isak. Nia lori ahi no tudik iha ninia liman no sira nain rua lao hamutuk. 7Isak koalia ho ninia aman Abraão no dehan, “Apaa!” Abraão hataan, “Hau mak nee, hau nia oan.” Isak dehan, “Haree ba, ahi no ai sei iha. Maibee bibi hodi halo sakrifísiu tunu motuk nee iha nebee?” 8Abraão dehan, “Hau nia oan, Maromak rasik sei foo bibi nudar sakrifísiu tunu motuk.” No sira nain rua kontinua lao hamutuk.

9Bainhira sira too iha fatin nebee Maromak dehan nee, Abraão harii altár ida iha nebaa. Nia prepara ai no kesi nia oan mane Isak. Nia tau Isak iha altár nee iha ai nia leten. 10Abraão lolo ninia liman no foti ninia tudik atu oho ninia oan mane. 11Maibee Nai nia anju bolu ba nia hosi lalehan no dehan, “Abraão, Abraão!” Nia hataan, “Hau mak nee.”

12Anju dehan, “Keta book labarik nee no keta halo buat ida ba nia. Tanba agora Hau hatene ona katak o hamtauk Maromak no la tahan hosi Hau o nia oan mane, nebee o nia oan mane mesak.” 13Abraão foti nia matan no haree, no tebes, nia haree iha nia kotuk bibi malae aman ida. Bibi nee nia dikur kait hela iha ai sanak sira. Abraão baa no foti bibi malae aman nee no oferese nia nudar sakrifísiu tunu motuk troka ninia oan mane nia fatin. 14Abraão hanaran fatin nee ‘Nai Sei Foo,’ no sira dehan too ohin loron, ‘Iha Nai nia foho, Nia sei foo’.#22:14 Foo ka haree. Lian Ebreu: YHWH Yire. Nee duni NAI haree atu foo buat nebee ita presiza. Ikus mai Nia foo Jesus nebee Nia oan mane mesak hodi troka ita nia fatin iha foho nee duni (Templu iha Jerusalem harii iha foho Moria). Mateus 27.

15 Nai nia anju bolu Abraão ba dala rua, 16no dehan, “Liu hosi Hau nia aan rasik Hau jura,” hatete Nai, “tanba o halo ona ida nee, no la tahan o nia oan mane, nebee o nia oan mane mesak, 17nunee Hau jura katak Hau sei haraik duni bensaun ba o, no Hau sei habarak duni o nia bei-oan sira#22:17 Haree Ebreu 6:14. hanesan fitun iha lalehan, no hanesan rai henek iha tasi ibun. No o nia bei-oan sira sei hadau sira nia inimigu sira nia portaun. 18Nasaun hotu iha mundu sei simu bensaun liu hosi o nia bei-oan, tanba o halo tuir Hau nia lian.”#22:18 Haree Apostolu 3:25. 19Entaun Abraão fila fali ba ninia joven mane sira. Depois sira hamriik no fila hamutuk ba Beer-Seba. No Abraão hela iha Beer-Seba.

20Liu tiha nee, ema foo hatene ba Abraão dehan, “Tebes, Milka tuur ahi hetan oan sira ba ita nia maun Naor: 21oan boot naran Uz, nia alin Buz no Kemuél nebee Aram nia aman, 22no mos Kesed, Hazo, Pildash, Jidlaf no Betuél.” 23(Betuél hetan oan Rebeka.) Milka hetan oan ualu nee ba Naor, Abraão nia maun. 24No nia feen kiik, naran Reumá, nia mos hetan Teba, Gaham, Tahas no Maaka.

Currently Selected:

Jénesis 22: BK

Highlight

Copy

Compare