Jénesis 40

José Foo Mehi Nia Sentidu Iha Komarka

1Liu tiha tempu nee, ema nebee toma konta ba buat nebee liurai Ejitu mak hemu no liurai nia padeiru halo sala hasoru sira nia senhor, liurai Ejitu. 2Faraó sai hirus ba ninia funsionáriu nain rua nee, ba xefi hemu nian no ba xefi padeiru. 3Liurai hatama sira ba kadeia iha xefi seguransa nia fatin, nebee iha komarka, iha fatin nebee José iha kastigu. 4Xefi seguransa foo knaar ba José hodi tau matan ba sira no nia serví sira. Nunee sira hela iha kadeia nee too tempu balu.

5Iha kalan ida, sira nain rua hetan mehi - liurai Ejitu nia xefi hemu nian no xefi padeiru nebee hetan kastigu iha komarka. Ida-idak hetan ninia mehi no mehi ida-idak iha ninia signifikadu. 6Iha dadeer-saan, José mai ba sira no haree sira nain rua hatudu hela laran tristi. 7Entaun José husu Faraó nia funsionáriu nain rua nebee iha ninia senhor nia kadeia hamutuk ho nia no dehan, “Tanba saa mak imi oin tristi ohin loron?” 8Sira hataan, “Ami hetan mehi no la iha ema ida nebee bele esplika signifikadu.” José dehan ba sira, “Laos signifikadu mak Maromak nian? Favór ida, konta took mai hau.”

9Entaun xefi hemu nian konta ninia mehi ba José no dehan, “Iha hau nia mehi, iha ai uvas huun ida iha hau nia oin. 10No ai uvas nee iha sanak tolu. Sanak nee dikin no funan mosu mai. Nia foo fuan kedas nebee iha uvas tasak. 11Hau kaer Faraó nia kopu iha hau nia liman no hau foti uvas sira nee no buti hodi nia been tama ba Faraó nia kopu. Depois hau foo kopu nee ba Faraó nia liman.” 12José dehan ba nia, “Ida nee mak signifikadu: ai sanak tolu mak loron tolu. 13Iha loron tolu nia laran, Faraó sei foti sae ita nia ulun no lori ita fila fali ba ita nia fatin. No ita sei servisu hodi foo kopu ba Faraó nia liman, hanesan tempu uluk bainhira ita toma konta ba liurai nia kopu hemu nian. 14Maibee bainhira ita hetan moris diak, hanoin hau no favór ida hatudu domin metin mai hau no foo hatene ba Faraó kona ba hau hodi hasai hau hosi kadeia nee. 15Tanba tuir lo-loos, ema naok hau hosi ema Ebreu sira nia rai no iha nee mos hau la halo buat ida hodi sira hatama hau ba rai kuak nee.”

16Bainhira xefi padeiru haree katak signifikadu nee diak, nia dehan ba José, “Hau mos iha mehi: raga tolu iha hau nia ulun ho paun. 17Raga ida iha leten liu iha hahaan oi-oin nebee tunu ba Faraó. No manu sira haan buat nee hosi raga nebee iha hau nia ulun leten.” 18José hataan ba nia no dehan, “Signifikadu mak nee: raga tolu mak loron tolu. 19Iha loron tolu nia laran Faraó sei foti sae ita nia ulun - hosi ita nia isin lolon! No nia sei tara ita iha ai huun ida no manu sira sei haan ita nia isin.”

20Liu tiha loron tolu, iha loron nebee Faraó halo tinan, no nia halo festa ida ba ninia atan sira hotu. Faraó foti sae ulun hosi xefi padeiru no xefi hemu nian iha ninia atan sira nia leet. 21No nia foo fali knaar ba xefi hemu nian hodi xefi nee bele foo hemu fali, no xefi nee foo fali kopu ba Faraó nia liman. 22Maibee Faraó tara mate xefi padeiru tuir signifikadu nebee José konta ona ba sira. 23Maibee xefi hemu nian nee la hanoin tan José, no nia haluha José.

Currently Selected:

Jénesis 40: BK

Highlight

Copy

Compare