Jénesis 39
39
José No Potifar Nia Feen
1Ema Ismael sira lori José tuun ba Ejitu. Iha nebaa, Potifar, Faraó nia funsionáriu nebee xefi seguransa, sosa José hosi ema Ismael sira nia liman. 2Nai hamutuk ho José no nia hetan susesu, no nia hela iha ninia senhor nia uma. 3Ninia senhor haree katak Nai hamutuk ho nia no Nai foo susesu ba buat hotu nebee nia halo. 4Entaun José hetan grasa iha ninia senhor nia oin no José serví ninia senhor. Senhor nee halo José sai mandór ba ninia uma, no entrega buat hotu ba José nia liman. 5Hosi tempu nebee José simu knaar sai mandór iha uma kain nee, ba buat hotu nebee nia senhor iha, Nai haraik bensaun ba ema Ejitu nee nia uma tanba José. No Nai nia bensaun kona buat hotu nebee iha ninia uma no iha ninia toos. 6Potifar husik buat hotu nebee nia iha ba José nia liman. No Potifar la hanoin kona ba buat nebee nia iha, só deit paun nebee nia haan. José mak ema diak no nia ema bonitu. 7Liu tiha tempu nee, José nia senhor nia feen haree ba José no nia dehan, “Toba lai ho hau.” 8Maibee José lakohi no dehan ba ninia senhor nia feen, “Tebes, hau nia senhor la hanoin kona ba saida mak iha hau nia liman iha nia uma nee. No nia entrega buat hotu nebee nia iha ba hau nia liman. 9La iha ema boot liu hau iha uma nee no senhor la tahan buat ida hosi hau só ita deit, tanba ita mak ninia feen. Entaun oinsaa hau bele halo sala boot hanesan nee? Oinsaa mak hau bele sala hasoru Maromak?” 10No bainhira feto nee koalia ho José loro-loron, José la rona tuir nia hodi toba ho nia ka tuur hamutuk ho nia.
11Iha tempu nebaa, José tama ba uma hodi halao ninia servisu no mane seluk iha uma laran nee la iha. 12Feto nee kaer José nia ropa no dehan, “Toba ho hau!” No José husik nia ropa iha feto nee nia liman no halai sai. 13Bainhira feto haree katak José husik nia ropa iha feto nee nia liman, no halai sai, 14nia hakilar ba mane sira hosi uma nee no dehan ba sira, “Haree took, senhor nee lori mai ema Ebreu hodi hamnasa ita. Nia tama hodi toba ho hau no hau hakilar ho lian makaas. 15No bainhira nia rona katak hau hakilar tiha, nia halai sai.” 16No feto nee rai José nia ropa too José nia senhor fila mai uma. 17Nia koalia ho senhor nee no dehan, “Ema Ebreu nebee ita lori mai, nia hakbesik mai hau hodi hamoe hau. 18No bainhira hau foti hau nia lian no hakilar nia husik ninia ropa ho hau no halai sai.” 19Bainhira José nia senhor rona ona ninia feen nia liafuan nebee nia foo hatene ba nia nee, “Ita nia atan halo hanesan nee mai hau,” nia sai hirus loos. 20José nia patraun kaer nia no hatama nia ba komarka, iha fatin nebee liurai nia ema dadur hetan kastigu. No José hela iha komarka nebaa. 21Maibee Nai hamutuk ho José no hatudu domin metin ba nia. Nai foo grasa ba nia iha xefi komarka nia oin. 22Xefi komarka entrega ema dadur hotu nebee iha komarka laran ba José nia liman. No buat hotu nebee halao iha nebaa, José mak halo. 23Xefi komarka la haree ba buat ida nebee iha José nia liman tanba Nai hamutuk ho nia. No Nai foo susesu ba buat hotu nebee nia halo.
Currently Selected:
Jénesis 39: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.
