Jénesis 38

Judá No Tamar

1Iha tempu nebaa, Judá husik hela ninia maun-alin sira. Nia lao tuun no baa hela ho ema ida naran Hirá, nebee ema Adulam. 2Judá haree oan feto ida hosi Sua, ema Kanaan. Judá foti nia no toba ho nia. 3Feto nee isin rua no tuur ahi hetan oan mane ida. Nia hanaran oan nee Er. 4Nia isin rua fali no hetan oan mane ida fali. Nia hanaran oan nee Onan. 5Nia isin rua dala ida tan no hetan oan mane ida. Nia hanaran oan nee Selá. Judá iha Kezib bainhira feto nee tuur ahi.

6Judá foti feto ida hodi sai feen ba Er, nia oan primeiru. Feto nee nia naran mak Tamar. 7Er, Judá nia oan primeiru, mak ema nebee iha hahalok aat iha Nai nia oin. No Nai oho nia. 8Judá dehan ba Onan, “Toba ho o nia maun nia feen no kaben ho feto nee hodi foo oan ba o nia maun.” 9Maibee Onan hatene katak oan nee sei la sai ninian. Entaun, bainhira nia toba ho ninia maun nia feen, nia soe ninia been nee ba rai, hodi la foo oan ba ninia maun. 10No Nai la kontenti ho ninia hahalok nee, nunee Nai oho mos nia. 11Depois Judá dehan ba ninia feto foun, Tamar, “Hela iha o nia aman nia uma nudar feto faluk too hau nia oan mane Selá sai boot.” Tanba nia hanoin, keta halo be ninia oan ikun mos mate hanesan ninia oan mane sira seluk. Nunee Tamar baa no hela iha ninia aman nia uma.

12Liu tiha tempu nee, Sua nia oan feto, nebee Judá nia feen, mak mate. Bainhira tempu lutu nee hotu tiha, Judá sae ba Timna iha fatin nebee ema tesi ninia bibi malae nia fulun. Nia baa hamutuk ho nia kolega Hira, ema Adulam. 13Ema foo hatene ba Tamar dehan, “Tebes, o nia banin mane lao dadaun no sae ba Timna hodi tesi ninia bibi malae nia fulun. 14Entaun Tamar hasai ninia ropa faluk nian no taka nia oin ho veo ida. Nia hatais aan no tuur iha Enaim nia portaun, nebee iha dalan ba Timna. Tanba nia haree katak Selá boot ona no sira seidauk foo nia nudar feen ba Selá. 15Bainhira Judá haree nia, Judá hanoin katak nia mak feto luroon ida, tanba nia taka ninia oin. 16No Judá fila ba nia no dehan, “Favór ida, mai husik hau toba ho o.” Tanba Judá la hatene katak feto nee mak ninia feto foun. No feto nee husu, “Ita foo saida mai hau, hodi ita bele toba ho hau?” 17Judá hataan, “Hau sei haruka bibi oan ida hosi bibi lubun.” Nia dehan, “Ita bele foo buat ruma nudar garantia, too ita haruka buat nee?” 18Judá husu, “Hau bele foo saida ba o nudar garantia?” Nia hataan, “Ita nia kadeli karimbu,#38:18 Sira uza kadeli ho dezenhu espesiál nudar karimbu ba sira nia negósiu. ita nia tali no ita nia ai tonka iha ita nia liman.” Nunee Judá foo kedas sasaan nee. Judá toba ho nia no nia isin rua. 19Depois feto nee hamriik no sai ba. Nia hasai ninia veo no hatais fali ropa faluk nian.

20Depois Judá haruka bibi oan ida liu hosi ninia kolega, ema Adulam, hodi hetan ninia sasaan garantia hosi feto nee nia liman. Maibee kolega nee la hetan feto nee. 21Nia husu ema sira iha fatin nebaa no dehan, “Feto templu#38:21 Feto nebee foo aan hodi serví iha templu nudar feto aat. nee iha nebee, ida nebee tuur iha dalan ninin iha Enaim?” Ema sira nee hataan, “Iha fatin nee, feto templu la iha.” 22Entaun nia fila ba Judá no dehan, “Hau la hetan feto nee, no mos ema sira iha fatin nebaa hatete katak feto templu iha fatin nebaa la iha.” 23Judá dehan, “Husik hela sasaan nee ba nia hodi ema la hamoe ita. Tebes, hau haruka ona bibi oan nee no ita la hetan nia.”

24Liu tiha fulan tolu, ema foo hatene ba Judá no dehan, “Ita nia feto foun Tamar halo aan hanesan feto aat, no mos nia sai isin rua ona liu hosi sala seksuál nee.” Judá dehan, “Lori nia sai, no sunu tiha nia.” 25Bainhira sira lori nia sai dadaun, nia haruka lia menon ba ninia banin mane dehan, “Liu hosi sasaan nee nia nain mak hau sai isin rua. Favór ida, haree took sasaan nee see nian: kadeli karimbu, tali no ai tonka.” 26Judá haree di-diak sasaan nee no dehan, “Feto nee iha hahalok nebee loos liu fali hau, tanba hau la foo nia ba hau nia oan mane Selá.” No Judá la toba fali ho nia.

27Bainhira Tamar atu tuur ahi, nia iha oan kaduak iha ninia kabun laran. 28No bainhira nia tuur ahi, oan ida nia liman sai uluk. Parteira nee kesi kabas mean ida ba nia liman no dehan, “Oan ida nee sai uluk.” 29Depois oan nee dada fila fali ninia liman, no tebes ninia alin moris uluk nia. Entaun parteira dehan, “Oinsaa o sai mai?” Nunee oan nee nia naran mak Perez. 30Tuir mai, ninia maun moris mai, ida nebee iha kabas mean iha nia liman, no sira hanaran nia Zera.#38:30 Perez katak ‘Halees’, Zera katak ‘Mean Lakan’.

Currently Selected:

Jénesis 38: BK

Highlight

Copy

Compare