Jénesis 37

José Nia Mehi

1Jacó hela iha rai Kanaan. Uluk ninia aman hela iha nebaa nudar ema estranjeiru.

2Ida nee mak Jacó nia jerasaun sira. Bainhira José tinan sanulu resin hitu, nia hein bibi ho ninia maun sira. Joven mane nee hamutuk ho oan mane sira hosi Bila no Zilpa, nebee ninia aman nia feen sira. No José foo hatene ba ninia aman kona ba buat aat nebee sira halo. 3Israel hadomi José liu fali oan mane sira seluk, tanba nia hetan José bainhira nia katuas ona. No Israel halo batina furak ba José. 4Bainhira nia maun sira haree katak sira nia aman hadomi nia liu fali nia maun sira hotu, nunee sira odi nia no lakohi koalia diak#37:4 Ebreu salóm katak ‘dame’. ho nia.

5José hetan mehi ida, no nia foo hatene ba ninia maun sira. Entaun sira odi nia liu tan. 6José dehan ba sira, “Favór ida, rona lai, hau hetan mehi ida. 7Tebes, ita kesi trigu halo futun sira nee iha rai luan. Tebes, hau nia futun hadeer no hamriik loos. Tebes, imi nia futun sira hamriik haleu hau nia futun no hakruuk ba nia.” 8No nia maun sira dehan ba nia, “O sei ukun fali ami ka? O sei domina fali ami ka?” No sira odi nia liu tan, tanba ninia mehi no ninia liafuan.

9Depois nia hetan mehi ida tan, no nia foo hatene ba ninia maun sira no dehan, “Tebes, hau hetan mehi ida tan. Tebes, loro matan, fulan no fitun sanulu resin ida hakruuk mai hau.” 10Nia konta mehi nee ba ninia aman no ninia maun sira. No ninia aman hasee nia no dehan ba nia, “Saida mak mehi nebee o hetan nee? Hau ho o nia amaa no o nia maun sira sei mai no hakruuk too rai iha o nia oin ka?” 11No ninia maun sira laran moras ba nia, maibee ninia aman hanoin hela liafuan nee.

José Nia Maun Sira Faan Nia

12José nia maun sira lori sira nia aman nia bibi lubun ba Sikém. 13Israel dehan ba José, “Laos imi nia maun sira hein bibi iha Sikém? Mai lai, no hau sei haruka o baa sira.” No nia dehan, “Hau prontu.” 14Israel dehan ba nia, “Favór ida, baa no haree o nia maun sira diak ka lae, no bibi lubun sira nee diak ka lae. No lori mai hau liafuan ruma kona ba sira.” Entaun Israel haruka nia sai hosi rai tetuk iha Hebron, no nia baa too iha Sikém. 15Mane ida hetan nia bainhira nia lao tuun-sae iha rai luan. Mane nee husu nia, “O buka saida?” 16Nia hataan, “Hau buka hau nia maun sira. Favór ida, bele foo hatene sira hein bibi iha nebee?” 17Mane ida nee dehan, “Sira sai ona hosi fatin nee, no hau rona sira dehan, ‘Mai, ita baa Dotan.’” Entaun José, buka tuir ninia maun sira no hetan sira iha Dotan.

18Bainhira José nia maun sira haree nia hosi dook, no molok nia too sira, sira halo planu aat hasoru nia hodi oho nia. 19No sira dehan ba malu, “Tebes, mehi door nee mai ona! 20Mai, ita oho nia no soe nia ba rai kuak ruma no ita bele dehan animál fuik mak haan nia. Depois ita sei haree oinsaa kona ba ninia mehi.” 21Ruben rona nunee no nia koko atu salva José hosi sira nia liman, no nia dehan, “Ita lalika oho nia.” 22No Ruben dehan, “Keta fakar raan, maibee soe nia ba rai kuak nee iha rai fuik maran, no lalika book nia.” Nia koalia hanesan nee hodi hasai José hosi sira nia liman, hodi foo fali nia ba ninia aman. 23Bainhira José foin too ona, ninia maun sira rakut sai tiha José nia batina. Ida nee mak batina furak nebee nia hatais. 24Sira foti nia no soe nia ba bee posu. Bee posu nee mamuk no iha laran bee la iha.

25Depois sira tuur hodi haan paun. No sira foti matan no haree ba, no tebes, ema Ismael lubun ida mai hosi Gilead ho sira nia kuda kamelu. Sira lori ai morin ladanu, mina balsamu no mira hodi tuun ba Ejitu. 26Judá dehan ba ninia maun sira, “Ita manaán saida se karik ita oho ita nia alin mane no subar ninia raan? 27Mai, ita bele faan nia ba ema Ismael sira, no la bele book nia. Tanba nia mak ita nia alin no isin rasik.” No ninia maun-alin sira kontenti ho liafuan nee. 28Entaun bainhira ema Midian sira nebee halo negósiu atu lao liu, José nia maun sira dada José sae hosi bee posu no faan nia ba ema Ismael sira no hetan osan mutin rua-nulu. No ema Midian sira lori nia ba Ejitu.

29Bainhira Ruben fila ba bee posu nee, tebes, José la iha bee posu laran. No Ruben lees ninia ropa. 30Nia fila ba ninia alin sira no dehan, “Labarik nee la iha, agora hau halo saida?” 31Sira foti José nia batina, no oho bibi ida no foti batina no reta iha bibi nia raan. 32Depois sira haruka batina furak nee, hodi lori ba sira nia aman no dehan, “Ami hetan buat nee. Haree took, karik ida nee mak ita nia oan mane nia batina ka lae.” 33Jacó haree no hatene, no nia dehan, “Ida nee mak hau nia oan mane nia batina. Animál aat ida mak haan nia. Loos duni, animál fuik ida lees tiha José nia isin.” 34Nunee Jacó lees ninia ropa, no hatais hena karoon iha nia kanotak, no nia tanis loron barak tanba ninia oan mane. 35Ninia oan mane no oan feto hotu mai hodi koko hamaus nia, maibee nia lakohi rona, no nia dehan, “Hau sei tuun ba rate laran ba hau nia oan mane ho tanis halerik.” Nunee José nia aman tanis ba nia. 36No ema Midian sira faan José iha Ejitu ba Potifar. Potifar mak Faraó nia funsionáriu ida nebee xefi seguransa.

Currently Selected:

Jénesis 37: BK

Highlight

Copy

Compare